1, 2. (a) Anni i nipakannammu ni Jehova nittam? (b) Anni nga pamasiguradu i mabibbig tam ta Isaias 46:10, 11 anna 55:11?

SIMPLE ngem dakal i kebalinan na ollu ira nga uvovug ta Biblia: “Ta gafa-gafu pinaro na Dios i langi anna i davvun.” (Gen. 1:1) Fustu nga egga laman i baddi nga ammu tam ta napakaru nga pinaratu na Dios, kagitta na langi, nawag, anna grabidad, anna balabaddi paga laman i nasingattam ta uniberso. (Ecl. 3:11) Ngem, nipakannammu ni Jehova nittam i gakkagna ta davvun anna ta totolay. Mabbalin tu makakkasta i davvun nga paddianan na totolay nga naparatu ta imahena. (Gen. 1:26) Ira i mabbalin tu ánana anna si Jehova i Yamada.

² Kagitta na neyesplika ta mekatallu nga kapitulo na Genesis, egga i nangifugag ta gakkag ni Jehova. (Gen. 3:1-7) Ngem ari gapa nga awan tu solusionna yatun nga problema. Awan vuluvuga tu makefugag kani Jehova. (Isa. 46:10, 11; 55:11) Yatutta, makasiguradu ittam nga metuppal ta eksakto nga tiempo i orihinal nga gakkag ni Jehova!

3. (a) Anni ira nga kinakurug i importante ta pangalippawa tam ta mensahe na Biblia? (b) Ngatta repasuattam yatun ira nga tuttuddu? (c) Anni ira nga pakkiavu i ikonsidera tam?

³ Siguradu nga familiar ittam ta kinakurug ta Biblia meyannung ta gakkag na Dios para ta davvun anna totolay anna meyannung  ta importante nga papel ni Jesu-Cristo ta pattuppal ta gakkag na Dios. Importante yatun ira anna siguradu nga yatun ira i ollu nga nagigiammu tam turi ta namegafu ittam nab-Bible study. Kaya tam gapa nga uffunan danuri sinsero nga totolay nga mabbalin tu familiar taw nga importante nga tuttuddu. Durante nga gigiammuattam yaw nga artikulo ta kongregasion, mappursigi ittam nga imbitan i totolay adde ta posible nga magatende ta Memorial na patay ni Cristo. (Luc. 22:19, 20) Matudduan tu mapia danuri magatende meyannung ta gakkag na Dios. Yatutta, ta piga nga aggaw nige na Memorial, makasta nu nononopattam i espesipiko ira nga pakkiavu nga usattam tapenu maginteres i Bible study tam ira anna tanakuan taw nga importante nga okasion. Ikonsidera tam i tallu nga pakkiavu: Anni i orihinal nga gakkag na Dios para ta davvun anna totolay? Anni i nesimmu? Ngatta i sakrifisio nga tavvu ni Jesus i mangirattal ta ketuppal na gakkag na Dios?

4. Kunnasi melammuyag na pamaratu i gloria ni Jehova?

⁴ Kappabbaw nga Namaratu si Jehova. Segun ta atannang ira nga estandarte i ngamin nga pinaratuna. (Gen. 1:31; Jer. 10:12) Anni i magigiammu tam ta kasta anna unnug nga masingattam ta pamaratu? Nu magobserba ta pamaratu, mappabbaw ittam nu kunnasi pinadday ni Jehova tu egga i gakkag na ngamin nga pinaratu—baddi onu dakal. Sinni i ari mappabbaw ta kinakomplikadu na selula na tolay, ta bagu keyana nga abbing, onu kasta na pallammag na bilag? Kakayà tam yatun ira nga pinaratu megafu ta egga i natural nga panageno tam nu anni talaga i makasta.—Bibbigan i Salmo 19:1; 104:24.

5. Kunnasi siguraduan ni Jehova nga makka-uffu-uffun ngamin i pinaratuna?

⁵ Kagitta na masingan ta pamaratu, meddu nga nangiyawa tu limitasion si Jehova. Parehu nga niyawana i moral anna i natural nga dorob ta pallevu tapenu masiguradu nga maffunsina tu makasta i ngamin. (Sal. 19:7-9) Ngem, egga i neyunnug nga lugar anna keyusan na ngamin nga gannug segun ta papelda ta gakkag na Dios. Nangiyawa si Jehova tu estandarte nu kunnasi makka-uffu-uffun i pinaratuna ira. Yatutta, megafu ta dob na grabidad, aranni i atmosfera ta davvun, makontrol i pala-palung anna bebay ira, anna makoffun ta pisikal nga unnug nga importante ta inango ta davvun. Ngamin nga pinaratu, nelagum i totolay, ay magguyu anna maffunsina segun taw ira nga limitasion. Manawag nga ebidensia yaw nga egga i gakkag na Dios para ta davvun anna ta totolay. Ta ministerio tam, malà tam kari i interes na tanakuan ta Naggafuanna yaw nga makapabbaw nga unnug?—Nep. 4:11.

6, 7. Anni ira i niregalu ni Jehova kada Adan anna Eva?

⁶ I orihinal nga gakkag ni Jehova para ta totolay ay mattolay tu mannanayun taw nga davvun. (Gen. 1:28; Sal. 37:29) Niddanna da Adan anna Eva tu aru nga nabalor nga regalu tapenu makapagayaya ira ta pattolay. (Bibbigan i Santiago 1:17.) Egga i lallagureda, abilidad nga marrason, anna kapasidad nga mangiddu anna makikofun. Nakiyuvovug i Namaratu kani Adan anna sinudduanna yaya nu kunnasi nakuan yaya mattuppal. Nagigiammu gapa ni Adan nu kunnasina tangngallan i pakawaganna ira anna nu kunnasina tangngawan i aya-ayam anna i davvun. (Gen. 2:15-17, 19, 20) Pinaro gapa ni Jehova da Adan anna Eva nga egga i panamtam, panageno, paningan, pagginna, anna pangagugda. Yatutta talaga makapagayaya  ira ta kasta anna abundansia ta Paraiso nga paddianadda. Para ta ollu nga magatawa, napakaru i awayyada makua, matuppal, anna madiskubre nga makapagayaya nira.

⁷ Anni paga i nelagum ta gakkag na Dios? Pinaro ni Jehova da Adan anna Eva nga egga abilidadda nga mapeggan tu perfekto nga ána. Pinlano na Dios nga maggaka i ánada, adde ta mapannu tu totolay i interu davvun. Kayà ni Jehova kada Adan anna Eva anna ngamin nga magana nga ayatadda i ánada kagitta na pinangayana ta ollu nga perfekto nga anana nga tolay. I davvun, nelagum i ngamin nga egga tatun, i mabbalin tu permanente nga paddianadda.—Sal. 115:16.

8. Anni i gakkag na dob nga mabibbig ta Genesis 2:16, 17?

⁸ Ari insigida nesimmu i ginakkag na Dios. Ngatta? Nangiyawa si Jehova kada Adan anna Eva tu simple nga dob tapenu mammuan nu ammuda i limitasion na lallagureda. Kinagina: “Awayyam kanan i vunga na kada kayu ta hardin adde ta mabattug ka. Ngem nu meyannung ta kayu na pakannammu tu mapia anna marake, ari ka kuman tatun, megafu ta, ta mismu nga aggaw nga kuman ka tatun siguradu nga matay ka.” (Gen. 2:16, 17) Ari tu mariga intindian yaw nga dob para kani Adan anna Eva; onu mariga nga tuppalan yatun. Megafu ta sobra i makan kumpara ta mawayyada nga kanan.

9, 10. (a) Anni i akusasion ni Satanas kontra kani Jehova? (b) Anni i dinisidi da Adan anna Eva? (Innan i letratu ta gafu na artikulo.)

⁹ Nangusa i Diablo nga si Satanas tu serpiente tapenu illokuan si Eva nga ari tuttulan i Yamana nga si Jehova. (Bibbigan i Genesis 3:1-5; Nep. 12:9) Namalattuag si Satanas tu isyu nga ari pamavulunan na Dios i ánana nga tolay nga kuman “ta kada kayu ta hardin.” Kagittana kakkagianna: ‘Kayàna kagian ariammu makua nu anni i kayàmu?’ Tapus, nalladdug yaya: “Siguradu nga ari ka matay.” Pinuruebanna nga kumbinsian si Eva nga arianna ngana kawagan nga ginnan i Dios. Kunna: “Ammu na Dios nga ta mismu nga aggaw nga kumakka tatun, mavukatan i matam anna mabbalikka tu kagitta na Dios nga makannammu tu mapia anna marake.” Pinalawan ni Satanas nga manakî ni Jehova nga kanadda i vunga megafu ta manawagan i nonoda. Nappromesa paga nga falso si Satanas: “Mabbalikka tu kagitta na Dios nga makannammu tu mapia anna marake.”

¹⁰ Maddesision ngana da Adan anna Eva nu anni i kuadda. Tuttuladda kari si Jehova, onu ginnadda i serpiente? Dinisidida nga ari ginnan i Dios. Sinuportadda gafu i rebelyon ni Satanas. Pinammanakitadda si Jehova bilang Yamada anna nawawadda i proteksion na pammagurena.—Gen. 3:6-13.

11. Ngatta ari kinunsinti ni Jehova i rebelyon?

¹¹ Megafu ta parrebelde da Adan anna Eva kani Jehova, ari ngana ira perfekto. Narresulta paga yatun tu kesinna kani Jehova megafu ta ‘kuruga marenu i matana ira nga maningan ta marake.’ Yatutta, ‘arianna pagurayan i kinadake.’ (Hab. 1:13) Nu pinamavulunanna yatun, mappeligro i paddia-paddian na ngamin nga pinaratu nga egga inangona—ta langi anna ta davvun. Pinaka-importante paga, nu pinagurayan na Dios i nesimmu nga liwa ta Eden, kuestionable nakuan i kinamapattalakkanna. Ngem matalo si Jehova ta sarilina ira nga estandarte; kanayunna nga tuppalan yatun ira. (Sal. 119:142) Megafu ta egga lallaguray nga mappili da Adan anna Eva, arianna kayà kagian nga awayyada balewalaan i  dob na Dios. Bilang resulta na parrebelde kontra kani Jehova, natay ira anna nanoli ira ta gavu nga nakapaddayadda.—Gen. 3:19.

12. Anni i nesimmu ta gaka-gaka ni Adan?

¹² Turi ta kinan da Adan anna Eva i vunga, nipeda i baggida ta posision nga ariadda ngana malawà ta tanga-uniberso nga familia na Dios. Pinapanona ira ta Eden, anna awan ngana vuluvuga tu tiansada nga manoli. (Gen. 3:23, 24) Ta pangnguada tatun, mepangngo laman nga kastiguan ira ni Jehova ta desisiodda. (Bibbigan i Deuteronomio 32:4, 5.) Megafu ta imperfekto ngana i tolay, ari ngana nga perfekto tu mepasingan na tolay i kualidad ira na Dios. Ari laman nga nawawan ni Adan i makakkasta nga mappange para ta baggina, nu ari, nepasana paga ta gaka-gakana i kina-imperfekto, tagaruli, anna patay. (Roma 5:12) Niyetuna i iddanama nga mattolay adde noka. Ari ngana nga maggaka tu perfekto da Adan anna Eva, kunne na gapa ta maski sinni ta ánada. Kabalin nga meyarayyu na Diablo ta Dios da Adan anna Eva, nitulu-tuloyna lagapa nga illokuan i totolay adde ta maddaggun.—Juan 8:44.

13. Anni i kayà ni Jehova para ta totolay?

¹³ Ngem, ari nawawan i aya na Dios ta totolay. Maski narrebelde da Adan anna Eva, kayà ni Jehova nga magayaya i totolay ta makasta nga relasion sa. Arianna karagatan nga matay i maski sinni. (2 Ped. 3:9) Yatutta insigida kabalin na rebelyon, nangiyunnug i Dios tapenu metoli i pakikofun na totolay sa durante nga tuttuladda gapa i matunung ira nga estandartena. Kunnasi yaw matuppal ni Jehova?

14. (a) Segun ta Juan 3:16, anni i probision na Dios tapenu metoli i relasion na totolay sa? (b) Anni nga pakkiavu i awayya tam ikonsidera ta interesadu ira?

¹⁴ Bibbigan i Juan 3:16. Kabisadu na aru ta imbitattam para ta Memorial yaw nga bersikulo. Ngem, Kunnasi mabbalin tu posible i pattolay tu mannanayun megafu ta sakrifisio ni Jesus? I pagimbita tam ta Memorial, i Memorial mismu, anna i panoli tam uli ta nagatende ira ay awayyana nga mangiyawa tu oportunidad ta sinsero ira nga magaleg tu kinakurug tapenu malippawa i tabbag tatun nga importante nga pakkiavu. Mas maginteres danatun nu malippawada ngana i aya anna sirib ni Jehova nga masingan ta tavvu. Anni ira i awayya tam ikagi meyannung ta tavvu?

15. Kunnasi neruma i tolay nga si Jesus kani Adan?

¹⁵ Nangiyawa tu perfekto nga tolay si Jehova nga mabbalin tu tavvu. Kawagan nga mabbalin tu matalo yatun nga tolay kani Jehova anna sigga-paran nga isakrifisio i inangona para ta nasentensian nga totolay. (Roma 5:17-19) Niyali ni Jehova i inango na ollu nga pinaratuna nga naggafu ta langi ta davvun. (Juan 1:14) Yatutta nabbalin tu perfekto nga tolay si Jesus kagitta ni Adan. Ngem ari kagitta ni Adan, nattolay si Jesus ta estandarte ni Jehova para ta perfekto nga tolay. Ari vuluvuga nga nakaliwa onu ari sinuppal ni Jesus i dorob na Dios maski ta pinakamaziga ira nga kapurueba.

16. Ngatta nabalor nga regalu i tavvu?

¹⁶ Bilang perfekto nga tolay, mepaliag ni Jesus i totolay ta tagaruli anna patay gukaban na patena para nira. Eksakto nga sinaliananna i ngamin nu anni nakuan si Adan—perfekto nga tolay, kuruga matalo anna minattuppal ta Dios. (1 Tim. 2:6) Nabbalin si Jesus tu sakrifisio nga tavvu nga nangivuka tu mannanayun nga inango para ta “aru nga totolay”—lallaki, babbay, anna abbarabbing.  (Mat. 20:28) Wan, i tavvu i nangivuka tu dalan para ta ketuppal na orihinal nga gakkag na Dios. (2 Cor. 1:19, 20) Nangiyawa i tavvu tu iddanama ta matalo nga totolay nga mattolay tu mannanayun.

17. Anni i posible megafu ta tavvu?

¹⁷ Daka-dakal i nawawan kani Jehova ta nipangiyawana ta tavvu. (1 Ped. 1:19) Kuruga iddukanna i totolay yari tu sigga-paran yaya nga matay i tattadday nga anana para nira. (1 Juan 4:9, 10) Kayàna nga kagian, sinalianan ni Jesus i orihinal nga tolay nga yama tam, si Adan. (1 Cor. 15:45) Ta pangngua tatun, netoli ni Jesus i mas paga anne ta inango; niddanna ittam tu oportunidad nga makatoli gabbalaman noka ta familia na Dios. Wan, megafu ta sakrifisio ni Jesus, awayyana ittam akseptan uli ni Jehova ta familiana nga ari ikompromiso i kinatununna. Ari kari nga makapagayaya nga nonopan i tiempo sonu mabbalin tu perfekto ngamin i matalo nga tolay? Mattaradday ngana noka i nelangitan anna neravvunan ira nga parte na familiana. Mabbalin ittam ngana ngamin tu ána na Dios.—Roma 8:21.

18. Sonu anni nga “mammaguray ta ngamin” si Jehova?

¹⁸ Ari nakefugag kani Jehova i rebelyon ni Satanas ta pangipasingan tu ayana ta totolay, onu nafugaddan i imperfekto nga totolay nga mabbalin tu matalo kani Jehova. Gukaban na probisionna nga tavvu, uffunan ni Jehova ngamin i gakana nga mabbalin tu matunung. Nonopan i pattolay sonu ngamin nga “makasingan anna mangurug ta Ana” ay mapeggan tu mannanayun nga inango. (Juan 6:40) Gukaban na dakal nga aya anna sirib, pabbalinan ni Jehova tu perfekto i totolay, segun ta orihinal nga gakkagna. Sonu duttal yatun, si Jehova nga Yama tam, i “mammaguray ta ngamin.”—1 Cor. 15:28.

19. (a) Kunnasi ittam nakuan mapaguyu na pappabalo tam ta tavvu? (Innan i kahon nga “ Kanayun nga Alegattam Danuri Mapia i Giffutuadda.”) (b) Anni nga aspeto na tavvu i tumunug nga ikonsidera tam?

¹⁹ I pappabalo tam ta tavvu i mamaguyu nakuan nittam nga kuan i adde na mawayya tam nga kannammuan na tanakuan nga mabbenefisio ira tatun nga kuruga nabalor nga regalu. Mawag nga makannammuan na totolay nga megafu ta tavvu, meddu nga niyawa ni Jehova i iddanama nga mattolay tu mannanayun. Ngem, mas paga anne tatun i tuppalan na tavvu. Ikonsidera na tumunug nga artikulo nu kunnasi tabbagan na sakrifisio ni Jesus i moral nga isyu nga pinalattuag ni Satanas ta hardin na Eden.