Sinni i Mangiyorollu ta Totolay na Dios ta Maddaggun?
“Daddamman nu i darakal nu gari.”
KANSION: 125, 43
1, 2. Kabalin ni Jesus nappalangi, anni i awayya nga ninono na apostolesna?
SIMINADDAG i apostol ira ni Jesus ta Vukig na Olibo, nga agga-tangag ta langi. Kababalidda nga nasingan i yafu anna i kofudda nga si Jesus, nga nappalangi anna kinallabban na kunam. (King. 1:9, 10) Dua-ragun nga sinudduan, pinagaram, anna niyorollu ira ni Jesus. Tapus, nawawan ngana yaya. Anni i kuadda?
2 Minanduan ni Jesus i disipulosna: “Ay sikamu i mamakurug niakan ta Jerusalem, ta interu Judea tuange ta Samaria adde ta ngamin nga tuppu-tuppag na davvun.” (King. 1:8) Kunnasi tamma metuppal yatun nga asayment? Ta kakuruganna, nipasiguradu ni Jesus nira nga makalawà ira tu masanto nga espiritu. (King. 1:5) Ngem, kawagan nga egga mangidirekta anna mangorganisa para ta interu mundo nga pallayyagayya. Nangusa si Jehova tu totolay gari nga mangigiya anna mangorganisa ta totolena. Baka nanono na apostolesna ira, ‘Manunno ngana kari si Jehova tu bagu nga lider?’
3. (a) Kabalin nga nappalangi ni Jesus, anni nga importante nga desision i kuan na matalo nga apostoles? (b) Anni i ikonsidera tam taw nga artikulo?
King. 1:15-26) Ngatta importante nira anna kani Jehova yaw nga pappili? Kinumpletona i importante nga pakawagan ta organisasion. * Pinili ni Jesus i apostolesna ari laman tapenu egga makavvuluna ta ministerio, nu ari, tapenu mangiyabaga ta importante nga papel ta totolay na Dios. Anni yatun nga papel, anna kunnasi ira sinanay ni Jehova gukaban ni Jesus tapenu tuppalan yatun? Anni nga kaparehu nga unnug i masingan ta maddaggun ta totolay na Dios? Kunnasi tam ‘daddamman i darakal tam,’ netallugaring danuri “mekatalo anna nannono nga doroban”?
IYOROLLU NI JESUS I MANANGNGAL NGA BAGGI
4. Anni i papel na apostoles anna karuan nga elder ta Jerusalem turi ollu siglo?
4 Turi Pentecostes 33 C.E., namegafu ngana nga iyorollu na apostoles i Cristiano nga kongregasion. Tatun nga okasion, “nanaddag si Pedro tuange ta karattadday” anna nangikagi yaya tu makepaliag-inango ira nga kinakurug ta dakal nga grupo na Judio anna proselita ira. (King. 2:14, 15) Aru nira i nabbalin tu kapangngurug. Tapus, yaw nga bagu ira nga Cristiano “ay inusa da i tiempo da ta pakituddu da ta apostol ira.” (King. 2:42) I apostoles i manangngal ta finansial nga pakkukua na kongregasion. (King. 4:34, 35) Ira i manangngaw ta espiritual ira nga pakawagan na totolay na Dios, nga kudda: “Matangngaw mi i paddasa-dasal anna pallayya-gayya ta uvovug.” (King. 6:4) Nappili ira tu ekspiriensadu ira nga Cristiano tapenu mapprogreso i trabahu nga pallayyagayya ta bagu ira nga teritoria. (King. 8:14, 15) Tapus, nelavu i karuan nga nazelugan nga elder ta panangngal na apostoles ta unnug ira na kongregasion. Bilang manangngal nga baggi, nangiyawa ira tu instruksion para ta ngamin nga kongregasion.
5, 6. (a) Kunnasi pinasikan na masanto nga espiritu i manangngal nga baggi? (Innan i letratu ta gafu na artikulo.) (b) Kunnasi inuffunan na anghel ira i manangngal nga baggi? (c) Kunnasi nigiya na Uvovug na Dios i manangngal nga baggi?
5 Ammu na Cristiano ira turi ollu siglo nga si Jehova i mangiyorollu ta manangngal nga baggi gukaban na liderda nga si Jesus. Ngatta siguradu ira tatun? Ollu, megafu ta pinasikan na masanto nga espiritu i manangngal nga baggi. (Juan 16:13) Neddan tu masanto nga espiritu ngamin nga nazelugan nga Cristiano, ngem espesipiko tapenu meyabaga na apostoles anna karuan nga elder ta Jerusalem i papelda bilang manangngal. Angngariganna turi ta 49 C.E., nigiya na masanto nga espiritu i manangngal nga baggi tapenu makapaddesision ira ta isyu na pakkugi. Sinuttul na kongregasion ira i direksiodda anna “nassikan i angngurug na iglesia ira anna nammungan i bilang da ta kagaggaw.” (King. 16:4, 5) Mabibbig gapa ta desision na manangngal nga baggi nga nangipasingan ira tu vunga na masanto nga espiritu na Dios, nelagum ngana i aya anna pangurug.
6 Mekadua, inuffunan na anghel ira i manangngal nga baggi. Nige nabawtisowan si Cornelio bilang i ollu nga ari nakugi nga Hentil nga Cristiano, tadday nga anghel i King. 11:13-18) Aktibo nga nipoppollu anna pinalistu na anghel ira i pallayyagayya nga tangngallan na manangngal nga baggi. (King. 5:19, 20) Mekatallu, nigiya na Uvovug na Dios i manangngal nga baggi. Maski nu egga i solbadda nga isyu ira ta doktrina onu mangiyawa ira tu direksion ta organisasion, nigiya na Katurakan yatun ira nga sinunno na espiritu ira nga elder.
7. Ngatta makagi tam nga si Jesus i nangiyorollu ta ollu-siglo nga Cristiano?
7 Maski egga i autoridad na manangngal nga baggi ta ollu-siglo nga kongregasion, umanugu ira nga si Jesus i Liderda. “Yaya [i Cristo] i nangiyawa tu regalu” ta karuan nga apostol, kunni apostol Pablo. “Mawag tu mas paga nga mapagamu i ketadday tam kani Cristo nga ulu tam.” (Efe. 4:11, 15) Imbes nga ingagadda i baggida base ta tadday nga prominente nga apostol, ‘nangaganan i tumuttul ira kani Jesus tu Cristiano.’ (King. 11:26) Kurug nga kinagi ni Pablo i importansia na ‘paddaddam anna panuttul ta ngamin nga netuddu nira,’ onu tradision ira nga nebase ta Biblia, nga niyawa na apostoles anna karuan nga nangiyorollu nga lallaki. Kinagina paga: “Ngem ikaya ku tu kannammuan nu tu si Cristo i pakiyafuan na ngamin nga lallaki, [nelagum i kada miembro na manangngal nga baggi] . . . anna i Dios i Yafu ni Cristo.” (1 Cor. 11:2, 3) Wan, ta pammaguray na uluna nga si Jehova, iyorollu na ari masingan anna nagloria nga si Jesu-Cristo i kongregasion.
“ARI TU TRABAHU YAW NA TOLAY”
8, 9. Ta pangultimuan na meka-19 siglo, anni i importante nga papel ni Brother Russell?
8 Ta pangultimuan na meka-19 siglo, kinaragatan ni Charles Taze Russell anna karuan nga kakavvuluna nga pataddaggan uli i kurug nga paddayarayaw na Cristiano. Tapenu moffunan ira nga mangiwara tu kinakurug na Biblia ta nadduruma nga lengguahe, nabbalin tu legal nga korporasion i Zion’s Watch Tower Tract Society turi 1884. Si Brother Russell i presidentena yatun. * Malalaki yaya nga estudiante na Biblia, anna magutu nga kinontrana i falso ira nga doktrina gitta na Trinidad anna imortalidad na kararua. Nalippawana nga ari tu masingan i panoli ni Jesus, anna i “ketuppal na tiempo” na nasa-nasion ay nangultimo turi 1914. (Luc. 21:24) Inusa ni Brother Russell i tiempo, sikan, anna kuartuna tapenu melayyagayya i kinakurug ta karuan. Manawag nga si Brother Russell i inusa ni Jehova anna na ulu na kongregasion tatun nga tiempo na dakal nga panguli.
9 Manaki ni Brother Russell nga dayawan yaya na totolay. Niturana turi 1896: “Ariammi kayà i madayaw, onu magloria megafu ta niturami ira; onu kinaragatammi nga magalan tu Reverend onu Rabbi. Onu magalan maski i sinni ta ngagammi.” Tapus kinagina: “Ari tu trabahu yaw na tolay.”
10. (a) Kanni sinunno ni Jesus i “mekatalo anna nannono nga doroban”? (b) Iyesplika nu kunnasi sesenu nga nesinna i Manangngal nga Baggi ta Watch Tower Society.
10 Turi 1919, tallu-ragun kabalin na patay ni Brother Russell, sinunno ni Jesus i “mekatalo anna nannono nga doroban.” Ngatta? Tapenu iddan i karuan nga dorobanna tu “kanad-da ta gagangay nga oras nga akkakan.” (Mat. 24:45) Maski tatun nga daga-ragun, mapprepara anna mangitaneg tu espiritual nga makan ta taga-tuttul ira ni Jesus i baddi nga grupo na nazelugan nga brother nga masserbi ta hedkuarter ta Brooklyn, New York. Namegafu ta dekada 1940, nallawan ta publikasiottam i termino nga “governing body” (manangngal nga baggi) turi nalippawada i koneksionna yatun ta Watch Tower Bible and Tract Society. Ngem ta 1971, napadduma i Manangngal nga Baggi ta Watch Tower Society
I manangngal nga baggi, dekada 1950
11. Kunnasi maffunsina i Manangngal nga Baggi?
11 Maddesision bilang grupo i Manangngal nga Baggi ta importante ira nga gannug. Kunnasi? Linigguan ira nga mammiting, tapenu egga i kanayun nga komunikasion anna pattaradday. (Prov. 20:18) Kada dagun, mattarali ira bilang tserman natun ira nga miting, megafu ta awan tu miembro na Manangngal nga Baggi i mas importante anne ta tanakuan. (1 Ped. 5:1) Kunnatun gapa i pattarali na tserman ta kada annam ira nga komite na Manangngal nga Baggi. Imammatan na kada miembro i baggina nga ari nga lider na kapangngurugna, nu ari, tadday ta “karuan ira nga doroban” nga pakanan na mekatalo nga doroban anna sakup na panangngalda.
Namegafu ta katunno na matalo nga aripan turi 1919, mapprepara ira tu espiritual nga makan para ta totolay na Dios (Innan i parapo 10, 11)
“SINNI GAFU I MEKATALO ANNA NANNONO NGA DOROBAN?”
12. Megafu ta ari nainspiran onu perfekto i Manangngal nga Baggi, anni ira i mepakkiavu?
12 Awan tu direkta nga pakiyuvovug na Manangngal nga Baggi ta Dios anna ari gapa ira perfekto. Yatutta, awayyada nga makkamali ta doktrina onu ta pangidirekta ta organisasion. Ta kakuruganna, nelagum ta Watch Tower Publications Index i “Beliefs Clarified,” nga lista na panguli ira ta pangalippawa ta Biblia namegafu ta 1870. Siempre, ari kinagi ni Jesus nga mangiyawa tu perfekto nga espiritual nga makan i matalo nga aripanna. Yatutta, kunnasi tam tabbagan i pakkiavu ni Jesus: “Sinni gafu i mekatalo anna nannono nga doroban?” (Mat. 24:45) Anni i mamakurug nga i Manangngal nga Baggi i makappapel tatun? Ikonsidera tam i tallu nga gannug nga nangidirekta ta manangngal nga baggi turi ollu-siglo.
13. Kunnasi inuffunan na masanto nga espiritu i Manangngal nga Baggi?
13 Ebidensia nga egga nira i masanto nga espiritu. Inuffunan na masanto nga espiritu i Manangngal nga Baggi tapenu malippawada i kinakurug ira ta Katurakan nga ari nalippawa dati. Angngariganna, nonopammu i lista na nepakanawag ira nga pangurug nga nakagi ta nappasa nga parapo. Siguradu nga awan tu tolay nga medayaw ta paddiskubre anna ta pangiyesplika tatun ira nga “kononaggan nga uray na Dios”! (Bibbigan i 1 Corinto 2:10.) Parehu i pagimamma na Manangngal nga Baggi ta nitura ni apostol Pablo: “Maguvovug kami ari tu segun ta tuttuddu na tolay, nu ari segun ta nituddu na Espiritu.” (1 Cor. 2:13) Kabalin na piga siglo nga apostasia anna espiritual nga zibbo, egga kari i makeyesplika ta alistu nga pannawag na pangalippawa ta espiritual namegafu ta 1919 fuera paga ta masanto nga espiritu?
14. Segun ta Nepakannammu 14:6, 7, kunnasi uffunan na anghel ira i totolay na Dios ta maddaggun?
14 Ebidensia na panguffun na anghel ira. Ta maddaggun, daka-dakal nga trabahu i kuan na Manangngal nga Baggi ta panangngalda ta interu mundo nga pallayyagayya ta maturu nga walu million ira nga evanghelisador. Ngatta kuruga efektibo yatun nga trabahu? Tadday nga rason i uffun na anghel ira. (Bibbigan i Nepakannammu 14:6, 7.) Ta aru nga situasion, negiya i wawwaragi ta totolay nga makimallo para ta uffun! * Nabbalin laman tu posible i papprogreso na pallayyagayya anna pangngua tu disipulo maski ta grabe nga pangokkontra ta karuan nga nasion megafu ta uffun na anghel ira.
15. Anni i nadduman na Manangngal nga Baggi ta lider ira na Kakristianuan? Mangiyawa tu angngarigan.
15 Pattalo ta Uvovug na Dios. (Bibbigan i Juan 17:17.) Ikonsidera i nesimmu turi 1973. Nepakkiavu ta Hunio 1 nga isyu na The Watchtower: “Nu egga gafu i totolay nga ariadda paga nalsa i pakka-adikto ta tabaku, kualipikadu kari ira para ta bawtismo?” I tabbag: “Segun ta Katurakan, makagi nga ari ira kualipikadu.” Kabalin nga nangusa tu massuporta ira nga teksto, niyesplika na The Watchtower nu ngatta mawag tu madisfellowship i ari mabbabawi nga massigariliu. (1 Cor. 5:7; 2 Cor. 7:1) Kunna: “Ari nga babbasta nga mekiddaw onu mefuersa yatun. Naggafu yatun nga istrikto nga bilin ta Dios, nga maguvovug gukaban na netura nga Uvovugna.” Egga kari tanakuan nga relihion nga buu i pattalona ta Uvovug na Dios, maski nu marigatan i karuan nga miembrona nga tuttulan yatun? Tadday nga libru ta relihion ta United States i nakkagi: “Kanayun nga ulian na lider ira nga Cristiano i tuttudduda tapenu suportan i kuru-kurugan anna opinion na magaru ta miembroda anna na totolay ta komunidad.” Nu ibase na Manangngal nga Baggi i desisiodda ta Uvovug na Dios imbes nga ta opinion na magaru, sinni talaga i mangiyorollu ta totolay na Dios ta maddaggun?
“DADDAMMAN NU I DARAKAL NU”
16. Kunnasi tam daddamman i darakal tam?
16 Bibbigan i Hebreo 13:7. I termino nga “daddamman” ay metransleyt gapa nga “ikagi.” Tadday gafu nga makua tapenu ‘daddamman i darakal tam’ ay nu ikagi onu ilavu tam i Manangngal nga Baggi ta pakimallo tam ira. (Efe. 6:18) Nonopammu i responsibilidadda nga mamakan ta espiritual, mangiyorollu ta interu mundo nga pallayyagayya, anna manangngal ta fundu na donasion ira. Talaga kawagadda i awan tu immanna nga pappakimallo tam para nira!
17, 18. (a) Kunnasi tam maki-koopera ta Manangngal nga Baggi? (b) Kunnasi massuporta i pallayyagayya tam ta matalo nga aripan anna kani Jesus?
17 Siempre, ariattam laman kagian nga daddammattam i Manangngal nga Baggi, nu ari, maki-koopera tam gapa ta pangiyorolluda. Igiya ittam na Manangngal nga Baggi gukaban na publikasion ira, study ira, asembli, anna ta kombension ira. Manunno gapa ira tu manangngal ira ta sirkito, nga manunno gapa tu elder ira na kongregasion. Daddamman na manangngal ta sirkito anna na elder ira i Manangngal nga Baggi gukaban na memmugug nga panuttul ta direksion ira nga meyawa nira. Mepasingattam i parrespeto ta Lider tam nga si Jesus nu minattuppal anna minappasakup ittam ta lallaki nga usu-usanna nga mangiyorollu nittam.
18 Tadday paga ta makua tam tapenu daddamman i Manangngal nga Baggi ay nu matalikarag ittam nga mallayyagayya. Kakuruganna, nipagaram ni Pablo ta Cristiano ira nga parigan i pangurug danuri na darakal tam. Nipasingan na matalo nga aripan i daka-dakal nga pangurugda gukaban na matalikarag nga pangipoppollu anna pangitaneg ta mapia nga dumug na Pappatulan. Tadday ka kari ta tanakuan nga karneru nga massussuporta ta nazelugan taw nga importante nga trabahu? Talaga kappagayaya i matagenomu nu kagian na Lidermu nga si Jesus: “Nu kingngua nu i kunnaw ta tadday ta wawwagì ira nga kalinnakkan ta paddia-paddian, bali sakan i nangnguan nu!”
19. Ngatta determinadu ittam nga tuttulan i Lider tam nga si Jesus?
19 Turi nanoli si Jesus ta langi, arianna pinagurayan i disipulosna ira. (Mat. 28:20) Ammuna mismu nu kunnasi nga nakoffun sa i masanto nga espiritu, i anghel ira, anna i Uvovug na Dios tapenu mangiyorollu turi ta keggana ta davvun. Yatutta kunnatun gapa ira usanna tapenu suportan i matalo nga aripan ta maddaggun. Bilang nazelugan nga Cristiano, i miembro ira na aripan ay “mevulu-vulu ira sangoye ta Kordero ta maski sitaw nga angayan na.” (Nep. 14:4) Nu tuttulattam i pangiyorolluda, tuttuttulattam gapa i Lider tam nga si Jesus. Aranni ngana nga iyorolluna ittam mappange ta mannanayun nga inango. (Nep. 7:14-17) Awan tu lider nga tolay nga makepromesa tatun!
^ par. 3 Manawag nga ginakkag ni Jehova nga egga i 12 nga apostoles tapenu mabbuu ta mappange nga ‘karaddua nga patuno’ na bagu nga Jerusalem. (Nep. 21:14) Yatutta, ari ngana mawag nga talianan i maski sinni nga apostol nga natay nga matalo.
^ par. 8 Namegafu ta 1955, yatun nga korporasion ay nabbalin ngana tu Watch Tower Bible and Tract Society of Pennsylvania.
^ par. 14 Innan i ‘Lubusang Magpatotoo Tungkol sa Kaharian ng Diyos,’ p. 58-59.