I Tavvu —“Awan tu Pakkurangan na nga Regalu” na Yama Tam
“Ngamin i mapia anna awan tu pakkurangan na nga regalu. . . . naggafu ta Yama.”—SANT. 1:17.
KANSION: 148, 109
1. Anni i posible ira nga bendision megafu ta tavvu?
ARU nga bendision i nabbalin tu posible megafu ta sakrifisio nga tavvu ni Jesu-Cristo. Nangivuka yatun tu dalan para ta ngamin nga gaka ni Adan nga mangiddu ta kinatunung nga mabbalin gabbalaman tu parte na familia na Dios. Megafu gapa ta tavvu, posible para nittam nga magayaya nga mattolay tu mannanayun. Ngem, ari laman nga mangiyawa tu makakkasta nga mappange para ta minattuppal nga totolay yatun. Megafu ta natay si Jesus tu matunung, matabbag ira i importante nga gannug ta uniberso.
2. (a) Anni ira nga gannug nga importante ta uniberso i masingan ta pakimallo ni Jesus? (Innan i letratu ta gafu na artikulo.) (b) Anni i ikonsidera tam taw nga artikulo?
2 Maddua ragun nige na patay ni Jesus tapenu mabbalin tu tavvu, sinudduanna i apostolesna tu makimallo: “Ama mi nga egga ta langi, marayaw paray i ngagam-mu; maparattal paray i Pammagurem. Makua i urem toye ta davvun kunne ta langi.” (Mat. 6:9, 10) Tapenu mas maappresia tam i tavvu, ikonsidera tam nu anni i koneksionna yaw ta pamakasanto ta ngagan na Dios, pammaguray na Pappatulan na Dios anna ta ketuppal na gakkag na Dios.
“MARAYAW PARAY I NGAGAM-MU”
3. Anni i nelavu ta ngagan ni Jehova, anna kunnasi nga pinara-parake ni Satanas yatun nga sagradu nga ngagan?
3 Pinagollu ni Jesus nga kagian i pamakasanto ta ngagan na Dios ta modelo nga pakimallo. Alalawa i sakupan na ngagan ni Jehova, nelavu ngana i katannanna, kappabbona, anna kinasantona. Ta tadday paga nga pakimallo, tinukoy ni Jesus si Jehova nga “Masanto nga Yama.” (Juan 17:11) Megafu ta masanto si Jehova, masanto gapa i ngamin nga prinsipio anna dorob nga naggafu sa. Ngem maski kunnatun, ta hardin na Eden, ma-uto nga kinuestion ni Satanas i kepangngattan na Dios nga mangipay tu estandarte ira para ta totolay. Gukaban na palladdug ni Satanas meyannung kani Jehova, pinara-parakena i masanto nga ngagan na Dios.
4. Kunnasi nakoffun si Jesus ta pamakasanto ta ngagan na Dios?
4 Ngem, talaga iniddu ni Jesus i ngagan ni Jehova. (Juan 17:25, 26) Nakoffun si Jesus ta pamakasanto ta ngagan na Dios. (Bibbigan i Salmo 40:8-10.) Gukaban na perfekto nga pattolay ta davvun, napakurug ni Jesus nga rasonable anna matunung para kani Jehova nga mangipay tu estandarte ira para ta intelihente ira nga pinaratuna. Maski paga mataka-taki nga patay i nipa-ekspiriensa ni Satanas kani Jesus, nattalupaddian yaya nga matalo ta nelangitan nga Yamana. Megafu tatun, napakurug ni Jesus nga mawayya na perfekto nga tolay nga mattalupaddian nga minattuppal ta matunung ira nga estandarte na Dios.
5. Kunnasi ittam makoffun ta pamakasanto ta ngagan na Dios?
5 Kunnasi tam mepasingan nga ayatattam i ngagan ni Jehova? Gukaban na kondukta tam. Ikiddaw ni Jehova nga mappakasanto ittam. (Bibbigan i 1 Pedro 1:15, 16.) Kayà na kagian, si Jehova laman i interu futu nga tuttulan anna dayawattam. Maski paga mapeppersigi ittam, mattolay tam nakuan nga mekunnay ta matunung ira nga estandarte anna dorobna. Gukaban na pangngua ira tu matunung, panawagattam i nawag tam nga mappagloria ta ngagan ni Jehova. (Mat. 5:14-16) Bilang masanto nga totolay, nu mattolay ittam mekunnay ta dorob ni Jehova, mapakurug tam nga mapia yatun anna falso i akusasion ni Satanas. Nu makaliwa ittam, kagitta na kanayun nga makua tam, napafutuan nga mabbabawi anna lillitattam i annangngua nga makepasiran kani Jehova.
6. Ngatta posible nga matunung i pagimamma ni Jehova nittam, maski nu imperfekto ittam?
6 Megafu ta passakrifisio ni Cristo, pakoman ni Jehova danuri mangurug sa. Akseptanna nga maddayaw sa danuri mangidedika ta baggida sa. Ideklara ni Jehova nga matunung nga ánana i nazelugan ira nga Cristiano anna i “tanakuan nga karneru” nga kokkofunna. (Juan 10:16, NW; Roma 5:1, 2; Sant. 2:21-25) Maski ta maddaggun, posible i matunung nga taddag ta Yama tam anna manguffun ta pamakasanto ta ngaganna.
“MAPARATTAL PARAY I PAMMAGUREM”
7. Anni ira nga bendision i posible ta pammaguray na Pappatulan megafu ta tavvu?
7 Ta modelo nga pakimallo, tumunug nga nikiddaw ni Jesus: “Maparattal paray i Pammagurem.” Anni i koneksion na tavvu ta Pappatulan na Dios? Posible nga pattaraddayan i 144,000 nga mabbalin Nep. 5:9, 10; 14:1) Si Jesus anna i kavuluna ira nga mammaguray, nga mabbuu ta Pappatulan na Dios, i mangiyawa ta benefisio ira na tavvu ta minattuppal nga totolay ta unag na marivu nga dagun. Mabbalin tu paraiso i davvun, anna mabbalin tu perfekto ngamin nga matalo nga totolay, nga mamattaradday ta nelangitan anna neravvunan nga parte na familia na Dios. (Nep. 5:13; 20:6) Mammokan ni Jesus i ulu na serpiente anna alsan ta uniberso ngamin i resulta na rebelyon ni Satanas.
8. (a) Kunnasi inuffunan ni Jesus i disipulosna nga tagibaloran i Pappatulan na Dios? (b) Kunnasi tam masuportan i Pappatulan?
8 Ta kegga ni Jesus ta davvun, inuffunanna i disipulosna nga tagibaloran i Pappatulan na Dios. Kabalin na bawtismona, insigida nga nilammuyagna i “Mapia nga Dumug nga meyannung ta Pammaguray na Dios” ta ngamin nga lugar. (Luc. 4:43) Nigena nanoli ta langi, pinagaramna i disipulosna nga mamakurug ira ta “adde ta ngamin nga tuppu-tuppag na davvun.” (King. 1:6-8) Gukaban na pallayyagayya ta Pappatulan, mapeggan tu oportunidad i totolay ta interu mundo nga magigiammu i meyannung ta tavvu anna mabbalin tu sakup na Pappatulan na Dios. Ta maddaggun, masuportattam i Pappatulan gukaban na panguffun ta wawwaragi ni Cristo ta davvun ta trabahuda nga pangilayyagayya ta mapia nga dumug na Pappatulan ta interu mundo.
“MAKUA I UREM”
9. Ngatta makapakkomfiansa ittam nga tuppalan ni Jehova i gakkagna para ta totolay?
9 Anni i kayà kagian ni Jesus ta pakkagina tu: “Makua i urem”? Si Jehova i Namaratu. Nu kagianna nga mesimmu i tadday nga gannug, kagitta na nesimmu ngana yatun. (Isa. 55:11) Arianna ipamavulun nga daralan na rebelyon ni Satanas i gakkagna ta totolay. Ta ollu paga laman, ginakkag ni Jehova nga mapannu i davvun tu perfekto nga ána da Adan anna Eva. (Gen. 1:28) Nu natay da Adan anna Eva nga awan tu ána, awan nakuan tu mesimmu ta gakkag na Dios nga pannuan i davvun tu ánada. Yatutta turi nattagaruli da Adan anna Eva, nipamavulun ni Jehova nga maggaka ira. Gukaban na tavvu, iddan na Dios i ngamin nga mangurug sa tu oportunidad nga mabbalin tu perfekto anna mattolay nga mannanayun. Iddukan ni Jehova i totolay, anna urena nga mattolay ira nga minattuppal segun ta kayàna.
10. Kunnasi mabenefisiowan ta tavvu i totolay nga natay?
10 Kunnasi gafu danuri binillion nga totolay nga natay nga ariadda vuluvuga nammuan onu pinasserbian si Jehova? Posible i paginnolay na natay megafu ta tavvu. Paginnolayan ira na minaggiddu nga nelangitan nga Yama tam anna iddanna ira tu oportunidad nga mammuan i gakkagna anna makalawà tu mannanayun nga inango. (King. 24:15) Kayà ni Jehova nga matolay i totolay, ari tu matay. Megafu ta yaya i Paggafuan na inango, mabbalin yaya tu Yama danuri mapaginnolay. (Sal. 36:9) Yatutta mepangngo laman nga ituddu ni Jesus nittam nga ipakimallo: “Ama mi nga egga ta langi.” (Mat. 6:9) Niddan ni Jehova si Jesus tu importante nga trabahu ta pamaginnolay ta natay. (Juan 6:40, 44) Ta Paraiso, matuppal ni Jesus i papelna bilang “i paginnolay anna inango.”
11. Anni i gakkag na Dios para ta “magaru”?
11 Ari laman nga limitadu ta piga nga tolay i pabbalin ni Jehova tu minangngiyawa, ta kinagi ni Jesus: “Ta sinni laman Mar. 3:35) Gakkag na Dios nga mabbalin tu maddayaw sa i “magaru nga totolay nga awan tu makabilang ta karu da” nga naggafu ta nasa-nasion, tribu, anna lengguahe ira. Danuri mangurug ta tavvu ni Cristo anna mangngua ta uray na Dios i mebilang ta mangikulle: “I kapaliag ay maggafu ta Dios tam nga agga-itubang ta trono, tuange gapa ta Kordero!”—Nep. 7:9, 10.
nga mangngua ta uray na Dios ay yaya i yenà anna i wagì.” (12. Kunnasi nepasingan ta modelo nga pakimallo i gakkag ni Jehova para ta minattuppal nga totolay?
12 Masingan i gakkag ni Jehova para ta minattuppal nga totolay ta kiddaw ira ta modelo nga pakimallo ni Jesus. Mekunnay tatun nga pakimallo, kayà tam kuan i adde na mawayya tam nga dayawan, onu kuan nga masanto i ngagan ni Jehova. (Isa. 8:13) I kebalinan mismu na ngagan ni Jesus ay “Si Jehova i Kepaliag,” anna i kepaliag tam gukaban na tavvu i mangiyawa tu kekakua anna gloria ta ngagan ni Jehova. Mosa i Pappatulan na Dios tapenu meyaplika i benefisio ira na tavvu ta minattuppal nga totolay. Wan, ipasiguradu na modelo nga pakimallo nga awan vuluvuga tu makefugag ta ketuppal na uray na Dios.
IPASINGAMMU I PAPPABALO TA TAVVU
13. Anni i ipasingan na pappabawtiso tam?
13 Tadday nga importante nga makua tam tapenu mepasingan i pappabalo tam ta tavvu ay gukaban na paddedika tam kani Jehova megafu ta pangurug tam ta tavvu anna pappabawtiso. Ipasingan na pappabawtismo tam nga “para ta Yafu” ittam nga si Jehova. (Roma 14:8) Irepresentana yatun i kiddaw tam nga marenu nga konsensia ta Dios. (1 Ped. 3:21) Tabbagan ni Jehova yatun gukaban na pangiyaplika ta sakrifisio nga mamakarenu nga daga na Cristo para nittam. Buu i pattalo tam nga tuppalanna ngamin i nipromesana.—Roma 8:32.
Kunnasi tam mepasingan i pappabalo tam ta tavvu? (Innan i parapo 13, 14)
14. Ngatta nebilin nga ayatattam i karruba tam?
14 Kunnasi tam paga mepasingan i pappabalo tam ta tavvu? Megafu ta nainfluwensian na aya ngamin i kukukuan ni Jehova, urena gapa nga ipasingan na maddayarayaw sa i aya bilang dominante nga kualidadda. (1 Juan 4:8-11) Mapakurug tam nga kayà tam mabbalin tu ‘ána na Yama tam ta langi’ nu ayatattam i karruba tam. (Mat. 5:43-48) Mekadua laman i bilin nga ayatan i karruba ta bilin nga ayatan si Jehova. (Mat. 22:37-40) Mepasingattam yatun nga aya ta karruba nu tuttulattam i dob nga ilayyagayya i mapia nga dumug na Pappatulan na Dios. Durante nga ipasingattam i aya ta kasittoletam, mepasingattam i gloria na Dios. Ta kakuruganna, “awan tu pakkurangat-tam ta pangaya” ta Dios nu tuppalattam i dob nga ayatan i tanakuan, mas ngana i wawwaragi tam.
MATTUPPAL I TAVVU TU “BANNA-BANNAY” NGA NAGGAFU KANI JEHOVA
15. (a) Anni ira nga bendision i malawà tam ta maddaggun kani Jehova? (b) Anni ira nga bendision i iinnaggattam?
15 Malawà tam i buu nga pamakoma nu mangurug ittam ta tavvu. Nipasiguradu nittam na Uvovug na Dios nga ‘mapakoma’ i katagaruliattam. (Bibbigan i Kingngua 3:19-21.) Gittana nekonsidera ta gafu, megafu ta tavvu, nibilang ni Jehova tu ánana danuri aripanna nga sinunno na espiritu. (Roma 8:15-17) Para nittam nga “tanakuan nga karneru,” kagittana nangngua tu kontrata si Jehova nga ampunan ittam. Kabalittam mabbalin tu perfekto anna malampasan i pangurianan nga kapurueba, magayaya si Jehova nga firman i kontrata, anna ampunanna ngamin ittam nga meddu nga neravvunan nga ánana. (Roma 8:20, 21; Nep. 20:7-9) Mannanayun i aya ni Jehova ta nabalor ira nga ánana. Awan tu pangurianan na benefisio ira na tavvu. (Heb. 9:12) Ari vuluvuga mawawan i balorna yatun nga regalu. Awan tu tolay onu pakapangngua i makalsa nittam tatun.
16. Kunnasi ittam mapaliag tu buu na tavvu?
16 Awan vuluvuga tu makua na Diablo nga fugaddan ngamin nga napafutuan nga mabbabawi ta pabbalin gabbalaman tu parte na familia ni Jehova. “Mittan laman adde noka” nga minay ta davvun si Jesus anna natay. Yatutta, permanente ngana nga napagan i tavvu. (Heb. 9:24-26) Alsanna tu buu i pakkastigu nga narensia kani Adan. Mabbalo ta sakrifisio ni Cristo, napaliag ittam ngana ta ke-aripan taw nga mundo nga kontroladu ni Satanas, anna ariattam ngana maganassing ta patay.
17. Anni i kebalinan na aya ni Jehova nikaw?
17 Talaga mapattalakkan i promesa ira na Dios. Nu kunnasi nga ari maffaliu i dorobna ta pamaratu, ari gapa nga maffaliu nittam si Jehova. Arianna manguli. (Mal. 3:6) Mas anne paga ta regalu nga inango i iyayawa nittam ni Jehova. Iyawana nittam i ayana. “Ammu anna kurugat-tam tu ayatan ittam na Dios. I Dios ay aya.” (1 Juan 4:16) Mabbalin tu makapabbaw nga paraiso i interu nga davvun, anna ipasingan na ngamin nga egga ta davvun i aya na Dios. Makiggiddang tam nakuan ta matalo ira nga pinaratu ta langi ta pakkagi: “Meyawa paray ta Dios tam i dayaw, kekakua, ka-uto, pabbala-balo, pammakakua, pakawayya, anna pakapangngua nga awan tu panuppalan na! Amen!”