NAMIPPIGA ngana nga nipakimallo na Cristiano ira i modelo nga pakimallo ni Jesus nga magalan gapa tu Pakimallo na Yafu onu i Ama Mi. Ngem ari talaga malippawa na magaru ta totolay nga makatotoli nga mangipakimallo tatun i kebalinan natun. Ngem manaki ni Jesus nga basta ngana laman nga itotoli na totolay yatun nga pakimallo. Kunnasi tam nammuan yatun?

Nige nga ituddu ni Jesus yatun nga pakimallo, kinagina: “Nu makimallo kamu, ariannu nga itotoli i kakkagiannu.” (Mateo 6:7, NW ) Ngatta gafu ta nituddu ni Jesus i modelo nga pakimallo? Manakina nga basta kabisaduattam yatun tapus itotoli tam. Tuttudduanna ittam lallagu nu anni ira i pinaka-importante nga gannug nga ipakimallo tam. Sinaggi-taddayattam danatun. Mabibbig yatun nga pakimallo ta Mateo 6:9-13.

Nituddu gafu ni Jesus ta tagatuttulna ira nga mawag tu ta Yamana laman nga Jehova ira nga makimallo. Ngem ammum kari nu ngatta kuruga importante i ngagan na Dios anna nu ngatta mawag tu marayaw yatun, onu mapabbalin tu masanto?

Ta gafu pagalaman na historia na totolay, aru ngana nga kinaladdug meyannung ta Dios i nanaral ta ngaganna. Kayà na kalaban na Dios nga si Satanas nga mangurug ittam nga si Jehova ay makasarili, malladda-laddug, anna awan tu kepangngattanna nga mammaguray ta pinaratuna ira. (Genesis 3:1-6) Aru i pimmanig kani Satanas. Ituttudduda gapa nga i Dios ay awan tu allona, vayolente, anna manakina i mamakoma. Kakkagian paga lagu na karuan nga awan tu Dios. Inalsa paga na karuan i ngagan na Dios nga Jehova ta transleysion na Biblia anna nigammada i pangusa tatun.

Ituttuddu na Biblia nga itunung noka na Dios ngamin danaw nga kawan tu hustisia. (Ezekiel 39:7) Sonu kuanna yatun, meyawana i kada pakawagammu anna masolbana i ngamin nga problemam. Kunnasi? Matabbag yatun ta tumunug nga kinagi ni Jesus nga ipakimallo tam.

Madduruma i pakalippawa na mattuttuddu ira tu relihion meyannung ta Pappatulan na Dios. Ngem ammu danuri na nakaginna ta pakimallo ni Jesus nga nipromesa na Dios nga maddog yayya tu tadday nga Mesias nga mammaguray noka ta Pappatulan nga manguli ta paddia-paddian na mundo. (Isaias 9:6, 7; Daniel 2:44) Pakasantowan naw nga Pappatulan i ngagan na Dios. Pakuruganna nga laddug si Satanas anna alsan natun si Satanas anna itoli ngamin nga zinaralna. Pangultimuan gapa noka na Pappatulan na Dios i gerra, taki, bisin, anna maski patay. (Salmo 46:9; 72:12-16; Isaias 25:8; 33:24) Kada ipaka-pakimallo mu nga maparattal nakuan i Pappatulan na Dios, ipaka-pakimallo mu nga mesimmu nakuan ngamin danatun nga promesa.

Ipasingan na kinagi ni Jesus nga siguraduan noka na Dios nga makua i urena taw ta davvun kagitta ta langi. Ngatta makagi tam yatun? Megafu ta pinapanaw na Ana na Dios si Satanas tuange ta demoniona ira ta langi tapus netabbo ira ta davvun, yayya nga makua ngana i uray na Dios ta langi. (Nepakannammu 12:9-12) Ta nikiddaw ira ni Jesus ta pakimallona, malippawa tam nga mas importante i uray na Dios anne ta uray tam. Kanayun nga pammakapianattam i uray na Dios, yayya nga kinagi mismu ni Jesus ta Yamana: “Ari tu i urè i matuttul nu ari i urem.”​—Lucas 22:42.

Nipasingan ni Jesus nga awayya tam gapa nga ipakimallo i kawagattam ta kada aggaw. Nu kuattam yatun, manono tam nga si Jehova mismu “i mangiyawa tu inango, tu pattolay anna ngamin nga ganna-gannug ta ngamin nga totolay.” (Kingngua 17:25) Ipasingan na Biblia nga megitta yayya ta tadday nga Yama nga iddukanna i ánana anna magayayya yayya nga iyawa i pakawagadda. Ngem kagitta na tadday nga masippo nga Yama, nu makkiddaw ittam tu tadday nga gannug nga ari tu makasta i efektona ta nittam, arianna nga iyawa yatun.

Talaga kari nga kawagattam i pamakoma na Dios? Aru sangawe i ariadda ammu nu anni i katagarulian onu liwa, anna i kadammo na liwa. Ngem ituttuddu na Biblia nga i liwa i makagafu ta pinakagrabe ira nga problema tam megafu ta yatun gapa i rason nu ngatta matay ittam. Neyana ittam ngamin nga minattagaruli, yayya nga kanayun ittam nga makangngua tu liwa. Malawa tam laman i mannanayun nga inango nu pakoman na Dios i liwi-liwa tam. (Roma 3:23; 5:12; 6:23) Yayya nga mababbannayan ittam nu mabibbig tam yaw nga kagian na Biblia: “Mapia ka anna minammakoma ka, AFU.”​—Salmo 86:5.

Mangurug ka kari nga talaga kawagammu i proteksion na Dios? Manaki na aru i mangurug nga egga i Satanas onu i “Marakay.” Ngem nituddu ni Jesus nga kuru-kurug si Satanas, anna inagalanna paga lagu yayya nga “mammaguray ta mundo.” (Juan 12:31; 16:11) Pinabbalin ni Satanas nga kitaddake yaw nga mundo nga pammagurayanna anna kayà naka gapa nga influwensian tapenu ari ka mapeggan tu madukko nga relasion ta Yamam nga si Jehova. (1 Pedro 5:8) Ngem ararayyu nga mas makapangngua si Jehova anne kani Satanas, anna kayàna nga protektan danuri mangiddu nisa.

Aru i nagigiammu tam meyannung ta modelo nga pakimallo ni Jesus, ngem aru paga i awayya tam nga ipakimallo. Daddamman nga kagian nittam na 1 Juan 5:14 meyannung ta Dios: “Tangngagan na ittam ta anni laman nga kiddawat-tam sa nga metuttul ta uray na.” Yayya nga kammu nonopan nga ari tu puede nga ipakimallo i problemam ira megafu ta ari mabba tu importante danatun.​—1 Pedro 5:7.

Kunnasi gafu gapa i oras anna i lugar? Importante kari nu kanni anna nu sitaw ittam nga makimallo?