EGGA kari i pammakapianattam ta pakimallo? Wan. Segun ta Biblia, nammakapia i matalo ira nga aripan na Dios ta pakimalloda ira. (Lucas 22:40; Santiago 5:13) Yatutta aru i meyuffun nittam na pakimallo. Moffunan ittam natun tapenu maddukko ta Dios anna makoffun gapa yatun ta emosional anna ta pisikal nga gawa-gawayyattam. Kunnasi?

Angngariganna, nu nakalawa ittam tu tadday nga regalu kayà tam nga ikagi i pappabalo tam. Ngatta importante yatun? Megafu ta nu ikagi tam i pappabalo tam, mas matageno tam nga kayà tam talaga i mappabalo. Kunnatun kari gapa nu makibbida ittam ta Dios? Siempre gapa! Innattam i karuan nga angngarigan.

Pakimallo para ta pappabalo. Nu mappabalo tam ta Yama tam gafu ta makasta ira nga gannug nga mesissimmu nittam, makafokus ittam ta bendision tam ira. Megafu tatun, mabbalin ittam nga mas minappabalo, mas magayayya, anna mas positibo.​—Filipos 4:6.

Angngarigan: Nikagi ni Jesus i appabalona ta gininna anna sinabbag na Yamana i pakimallona ira.​—Juan 11:41.

Pakimallo para ta kapakoma. Nu makkiddaw ittam ta Dios tu pamakoma, mas malippawa tam nu anni i fustu onu anni i mali, mas mabbabawi ittam ta nakaliwatattam ira, anna mas malippawa tam nu kunnasi ka-importante i mattuppal ta Dios. Mapalubbangan ittam gapa ta pakkakonsensia.

Angngarigan: Nikagi ni David i pabbabawi anna i daddamna ta pakimallona.​—Salmo 51.

Pakimallo para ta pangigiya anna sirib. Nu ikiddaw tam kani Jehova nga igiyana ittam onu iddanna ittam tu sirib nga kawagattam tapenu makangngua tu makasta ira nga desision, mabbalin ittam tu kurug nga mapakalinno. Masingattam gapa nga kawagattam i uffun ni Jehova anna mawag tu mattalo ittam nisa.​—Proverbio 3:5, 6.

Angngarigan: Mapakalinno nga nikiddaw ni Solomon i pangigiya anna sirib tapenu merolluanna i Israel.​—1 Patul Ira 3:5-12.

Pakimallo nu egga i madammo nga problema. Ivuvvu tam ta Dios i mataga-tageno tam nu fermi i nikadismaya tam anna nu ariattam ngana ammu i kuattam. Mabanna-bannayan ittam anna mas mattalo ittam kani Jehova imbes tu ta baggi tam.​—Salmo 62:8.

Angngarigan: Nakimallo si Patul Asa turi ta neparubang yayya ta kappaganassing nga kalaban.​—2 Cronicas 14:11.

Pakimallo para ta tanakuan. Makoffun nittam i kunnatun ira nga pakimallo tapenu malillitan i mabbalin tu makasarili anna mas makepasingan tu pangikallo anna pakipattageno.

Angngarigan: Nipakimallo ni Jesus i tagatuttulna ira.​—Juan 17:9-17.

Pakimallo tapenu maddayaw. Nu dayawattam si Jehova megafu ta kappabbaw ira nga kingngua anna kualidadna, mas nga irespeto anna appresiattam yayya. Makoffun gapa i kunnatun ira nga pakimallo tapenu mas mabbalin ittam nga madukko ta Dios anna Yama tam.

Angngarigan: Zinayaw ni David i Dios megafu ta pinaratuna ira.​—Salmo 8.

Tadday paga nga benefisio na pakimallo ay makeyawa yatun tu ‘imammo na Dios nga ari malippawa na tolay.’ (Filipos 4:7) Mariga i mapeggan tu imammo taw nga magulu nga mundo. Ngem nu memammo ka, makoffun yatun ta gawa-gawayyammu. (Proverbio 14:30) Ngem mapeggan ittam kari tu imammo na Dios megafu laman ta sarili tam nga appursigi? Onu egga paga i mawag nga kuattam?