MAKIMALLO i totolay ta interu mundo maski nu anni i kultura onu relihiodda. Makimallo ira nu magitadday onu nu makkaravulu. Umay ira ta simbahan, ta templo, sinagoga, mosque, onu ta santuario ira tapenu makimallo. Mangusa gapa ira tu prayer rug, rosariu, prayer wheel, imahen ira, prayer book, onu pakimallo ira nga netura ta baraddi nga tabla nga nebesing ta nadduruma nga lugar.

Megafu ta pakimallo, neruma i totolay ta ngamin nga tanakuan paga nga pinaratu taw ta davvun. Kurug gapa nga aru i napparehassattam ta aya-ayam. Kagittada, mawag tam i makan, ayre, anna danum. Kagittada gapa, meyana ittam, mattolay, tapus matay ittam. (Eclesiastes 3:19) Ngem ngatta tamma ta totolay laman i makimallo?

Megafu ta kawagattam nga kuan yatun. Magaru ta totolay nga makimallo ay gakkagda nga makibbida ta Dios. Kagian na Biblia nga naparatu ittam nga dati ngana nga egga kunnatun nga pakawagattam. (Eclesiastes 3:11) Kinagi bi ni Jesu-Cristo: “Magayayya danuri sigga-nono ta espiritual nga kawagadda.”​—Mateo 5:3, NW.

Sittam ngamin egga i ‘espiritual nga kawagattam.’ Yatun i rason nu ngatta napakaru i relihion anna aru i lugar nga puede angngayan na totolay tapenu maddayaw anna tapenu makimallo. Ngem matageno na karuan nga ariadda kawagan i Dios. Kurug kari yatun? Megafu ta limitadu laman i makua na totolay, ababba laman i inango tam, anna aru i gannug nga ariattam malippawa, mawag tam gafu i manguffun nittam. Mawag tam i tadday nga mas masirib, mas masikan, anna mas apaddu i pattolena anne nittam. Anni gafu ira i espiritual nga pakawagan nga mawag tu ipakimallo tam?

Nonopammu yaw: Nagawag ka ngana kari tu uffun, sirib, onu tabbag ira ta pakkiavu mu nga awan vuluvuga tu makatabbag? Nagawag ka ngana kari tu banna-bannay turi ta natayakka, onu tabarang tapenu makangngua ka tu importante nga desision, onu pamakoma megafu ta sobra nga makokkonsensia ka?

Segun ta Biblia, ngamin danatun ay makasta nga rason tapenu makimallo. Moffunan ittam na Biblia nga mammuan nu kunnasi ittam nga makimallo anna nu anni i ipakimallo tam megafu ta mabibbig ta Biblia i pakimallo na aru nga matalo nga lallaki anna babbay. Nakimallo ira para ta banna-bannay, tabarang, pamakoma, anna tabbag ta pinakamariga ira nga pakkiavuda.​—Salmo 23:3; 71:21; Daniel 9:4, 5, 19; Habakuk 1:3.

Egga i napparehassan ngamin danatun nga pakimallo. Ammu danatun nga lallaki anna babbay i tadday ta pinaka-importante nga gannug meyannung ta pakimallo nga nakattaman na aru nga totolay sangawe. Ammuda nu kaninni ira makimallo.