MAGGA naobserbam ngana nga aru ta relihion ira i makkakkagi nu sitaw anna nu kanni nga makimallo. Ngem ituttuddu kari na Biblia nga egga laman i espesipiko nga lugar anna oras tapenu makimallo?

Kagian na Biblia nga egga ira i tiempo nga mawag tu makimallo ittam. Angngariganna, nige nga nakipakkan si Jesus ta disipulosna, nakimallo yayya tapenu mappabalo ta Dios. (Lucas 22:17) Nu maggarammammung gapa i disipulosna tapenu maddayaw, makimallo ira. Sinuttulda i nabayag ngana nga kukukuan na Judio ira ta sinagoga ira anna templo ta Jerusalem. Nipataddag na Dios i templo tapenu mabbalin tu “balay na akkimallakkan na ngamin nga totolay ta utun na davvun.”​—Marcos 11:17.

Nu maggarammammung i aripan ira na Dios tapus makimallo ira, ginnan na Dios i pakimalloda. Nu fustu i motiboda anna mekunnay ta uray na Dios i pakimalloda, ginnan yatun na Dios. Yatun paga lagu i awayyana tu mamaguyu nisa tapenu kuan i gannug nga arianna nakuan nga kuan. (Hebreo 13:18, 19) Makimallo i Saksi ira ni Jehova nige anna kabalin na paggarammammudda. Puede ka nga magatende tatun tapenu maginnam mismu danatun nga pakimallo.

Ngem awan tu kagian na Biblia nga espesipiko nga oras onu lugar tapenu makimallo. Mabibbig tam paga ta Biblia i meyannung ta aripan ira na Dios nga nakimallo ta nadduruma nga oras anna lugar. Kunnaw gapa i kagian ni Jesus: “Nu maddasal ka, tullung ka ta kuartom, serram-mu i puerta, ay makimallo ka ta Yamam nga ari nga masingan. Ay yaya nga makasingan ta kuam-mu ta sekreto, ay bala-balattan naka.”​—Mateo 6:6.

Kakkasta yatun nga imbitasion. Makaranni ka ta Katannangan ta interu nga uniberso ta maski anni nga oras, maski nu magitetadday ka, anna makasiguradu ka nga ginnan naka. Ari ngana gafu ittam makaddag nga mamippiga nga nagitetadday si Jesus tapenu makimallo. Mittan, pattanga-gabi yayya nga nakimallo ta Dios nige yayya nga nagangngua tu importante nga desision.​—Lucas 6:​12, 13.

Mabibbig tam gapa ta Biblia i karuan nga lallaki anna babbay nga nakimallo turi ta magangngua ira tu importante ira nga desision onu egga i madammo nga problemada. Nu mittan, iyassikadda i pakimalloda, anna nu karuan ari gapa nga maginna yatun. Egga gapa ira i tiempo nga makkaravulu ira nga nakimallo anna egga gapa yuri magitetadday ira. Ngem i importante ay nakimallo ira. Kagian paga lagu na Dios ta aripanna ira: “Maddasal kamu ta ngamin nga tiempo.” (1 Tesalonica 5:​17) Ari yayya molang nga magginna turi ira ta magaggangngua ta urena. Talaga makakkasta yatun nga pribilehio!

Ta maddaggun, aru nga totolay i ari nga mangurug nga importante i pakimallo. Baka meyavu mu, ‘Moffunannà kari talaga natun?’