Profesiya 2. Bisin

“Duttal i bisin.”​—MARCOS 13:8.

● Tadday nga lalaki i minay ta bario na Quaratadji, Niger tapenu magaleg tu makan. Minay gapa tari i kakkapittana anna wawwaragina nga naggafu ta arayyu nga parte natun nga nasion megafu ta mabisi-bisin ira. Ngem magitetadday nga naka-idda i lalaki ta dapang nga egga ta davvun. Ngatta magitetadday yayya? “Arianna mapakan i familiana yayya nga arianna megutu nga innan ira ta mata,” kunni Sidi nga panakallan na bario.

ANNI I IPASINGAN NA REPORT IRA? Ta interu mundo, maggi 1 ta kada 7 nga tolay i ari makalanno i kananna ta kada aggaw. Ngem mas grabe ta sub-Saharan Africa, nu sitaw 1 ta kada 3 i sobra i bisinna. Tapenu mas mabi nga matindian, imajinammu i tadday nga familia nga egga i yama, yena, anna beybi. Nu makalanno laman ta dua nga tolay i makan, sinni gafu i ari kuman? I yama? I yena? Onu i beybida? Yatun nga paddesision i mawag nga kuan na kunnatun ira nga familia ta kada aggaw.

ANNI I OPINION NA KARUAN? Mawayya nga iyawa na davvun i mas aru paga nga makan para ta ngamin. Siguraduattam laman nga malawa na ngamin i makan.

KURUG KARI YATUN? Kurug nga mas aru nga makan i maapit anna mebiahe na kusetcheru anne tagga. Mawag nakuan nga tangngallan tu mapia na gobiernu i suplay na makan tapenu masolba i bisin. Ngem kadda lapa makua yatun maski nu aru ngana nga dekada nga ikagumadda nga solban yatun.

ANNI I MAKAGIM? Matuttuppal ngana kari i Marcos 13:8? Maski nu moderno ngana i teknolohia, nasolba kari natun i pakkurang tu makan ta interu mundo?

I lunig anna bisin i kegafuan na tadday paga nga problema nga neprofesiya ta Biblia nga mesimmu ta pangurianan ira nga aggaw.

[Blurb ta pahina 5]

“Matolay paga nakuan i maturu tu one third (1/3) na abbarabbing nga natay ta pneumonia, diarrhea anna karuan paga nga taki nu ari ira nga nebisinan.”​—ANN M. VENEMAN, DATI NGA EXECUTIVE DIRECTOR NA THE UN CHILDREN’S FUND.

[Picture Credit Line ta pahina 5]

© Paul Lowe/​Panos Pictures