Profesiya 4. Kawan tu Negagangay nga Pangaya

“Mawawan noka i . . . negagangay nga pangaya na totolay ta familiada.”​—2 TIMOTEO 3:1-3, God’s Word Bible

● Mattattrabahu si Chris ta tadday nga grupo ta North Wales nga mangungnguffun ta biktima ira na kinavayolente ta familia. “Manono ku bi i tadday nga babay nga minay nio. Sobra yayya nga nabubbubbug, yayya nga ariakku ngana nga makilala yuri dati bi nga nasingakku,” kunni Chris. “Egga gapa i karuan nga babbay nga sobra i daddamda yayya nga kanayun ngana laman ira nga agga-dukag.”

ANNI I IPASINGAN NA REPORT IRA? Ta tadday nga nasion ta Africa, maggi 1 ta kada 3 nga babbay i biktima na seksual nga pangabuso ta kabbidda. Tatun gabbalaman nga nasion, maturu tu one third (1/3) na lallaki i makkakkagi nga ayus laman nga bubbugadda i atawada. Ngem ari laman tu babbay i biktima na kinavayolente ta familia. Angngariganna, ta Canada, maggi 3 ta kada 10 nga lallaki i binubbubbug onu inabuso na karelasiodda.

ANNI I OPINION NA KARUAN? Dati ngana nga egga i kinavayolente ta unag na familia. Mas mapansin laman gare yatun sangawe anne ta nappasa.

KURUG KARI YATUN? Ta nappasa ira nga dekada, mas ngana nga mapansin i kinavayolente ta familia. Ngem napakarianan kari natun i kaso ira na kinavayolente ta familia? Ari. Mas lallagu nga masingi-singattam ngana sangawe i kawan tu negagangay nga pangaya.

ANNI I MAKAGIM? Matuttuppal kari ngana i 2 Timoteo 3:1-3? Mawawawan kari ngana na aru nga totolay i negagangay nga pangaya nakuan ta familiada?

Meyannung ta planeta nga davvun nga paddianattam i mekalima nga profesiya nga matuttuppal ngana. Innattam i kagian na Biblia tatun.

[Blurb ta pahina 7]

“Tadday i kinavayolente ta familia ta krimen ira nga ari kuruga mereport ta pulis. Ta average, mami-35 nga beses labbi nga maltratuan na lalaki i atawana onu i karelasionna nige nga maddanug i babay ta pulis.”​—TADDAY NGA SPOKESWOMAN PARA TA WALES DOMESTIC ABUSE HELPLINE.