Profesiya 6. Pallayyagayya ta Interu Mundo
Profesiya 6. Pallayyagayya ta Interu Mundo
“Melayya-gayya noka ta tanga-ravvunan yaw nga Mapia nga Dumug na Pammaguray na Dios.”—MATEO 24:14.
● Maddian si Vaiatea ta tadday nga baddi anna ararayyu nga isla ta Pacific Ocean. Balabaddi i maddian tatun nga parte na mundo. Maggi 16,000 laman i populasion tatun. Ngem naka-uvovug na Saksi ira ni Jehova si Vaiatea anna i kalugaranna ira. Ngatta? Megafu ta kayà na Saksi ira nga ikagi i mapia nga dumug meyannung ta Pappatulan na Dios ta ngamin nga totolay maski nu sitaw i paddianadda.
ANNI I IPASINGAN NA REPORT IRA? Melayyagayya ngana i mensahe na Pappatulan ta interu mundo. Ta 2010 laman, nangusa i Saksi ira ni Jehova tu 1.6 billion nga oras ta pangilayyagayya taw nga mapia nga dumug ta 236 nga nasion. Kayàna kagian, kadaggaw, mallayyagayya tu maggi 30 minuto i kada Saksi. Ta nappasa nga dekada, nakeyimprenta paga ira anna naketaneg tu maturu tu 20 billion nga kopia na literatura meyannung ta Biblia.
ANNI I OPINION NA KARUAN? Rinivu dagun ngana nga melayyagayya i mensahe na Biblia.
KURUG KARI YATUN? Fustu gapa nga aru ngana i nallayyagayya meyannung ta mensahe na Biblia. Ngem manganannuan anna limitadu laman i sakup na magaru tatun. Ngem organisadu i pallayyagayya na Saksi ira ni Jehova. Interu mundo i sakup natun anna ginatu ngana nga million i naddena. Ari vuluvuga nagimmang i Saksi ira ta pallayyagayyada maski nu grabe i pangokkontra nira na karuan ta pinakamakapangngua anna vayolente nga organisasion na totolay. * (Marcos 13:13) Awan paga lagu tu sueldu na Saksi ira ni Jehova nga mallayyagayya. Boluntariu nga iyusada i tiempoda anna iyawada i literaturada nga awan tu pagana. Masussuportan i trabahuda gukaban laman na boluntariu ira nga kontribusion.
ANNI I MAKAGIM? Melayyagayya ngana kari ta interu mundo i ‘mapia nga dumug na Pammaguray na Dios’? Ipasingan kari na ketuppal naw nga profesiya nga egga i makasta ira nga gannug nga aranni ngana nga mesimmu?
[Footnote]
^ par. 6 Para ta mas aru paga nga informasion, girawan i tallu nga dokumentariu nga video nga “Faithful Under Trials,” “Purple Triangles,” anna “Jehovah’s Witnesses Stand Firm Against Nazi Assault,” nga nipublisa na Saksi ira ni Jehova.
[Blurb ta pahina 9]
“Adde ta ipamavulun ni Jehova, ariattam iyemmang i matalikarag nga pangilayyagayya ta mapia nga dumug na Pappatulan anna kuattam i ngamin nga mawayya tam tapenu madde i totolay.”—2010 TAUNANG AKLAT NG MGA SAKSI NI JEHOVA.