Namegafu ta kabbikku, kakayà ku ngana i pinaratu ta pallevu. Maruddu nga magayayya i familia mi nga mappasiar ta makasta ira nga kavukiran anna weg ta pallevu na ili mi ta Jyväskylä ta Central Finland. Kakayà ku gapa i aya-ayam. Ta kabbikku, kayà ku nga gakkopan i ngamin nga masingakku nga kitaw anna kitu! Ta paddakal ku, madismaya ngà nu masingakku i totolay nga mangabuso ta aya-ayam. Turi kua, nakisali ngà ta organisasion nga mapprotekta ta aya-ayam nu sitaw nakilalà i kagittà ira nga mangitaki ta aya-ayam.

Aru i kingngua mi tapenu maprotektan i aya-ayam. Nangiwara kami tu informasion anna nangiyunnug kami tu protesta ira anna demonstrasion kontra ta pallakuan ira tu sinnung nga napadday ta duddu anna tabbi na ayam anna pangusa ta aya-ayam ta eksperimento. Nabbuu kami paga tu bagu nga organisasion nga mapprotekta ta aya-ayam. Megafu ta ipapilit mi i kayà mi, maruddu nga makkaproblema kami ta autoridad anna mamippiga ngà nga naaresto anna neyangay ta korte.

Ari laman tu ayam i ikavurungakku, mavurung ngà gapa ta tanakuan nga problema na mundo. Tapus nakisali ngà gapa ta aru nga organisasion gitta na Amnesty International anna Greenpeace. Inusà i ngamin nga sikakku tapenu suportan i aktibidadda. Nidefensà i kepangngattan na pobre, mabisi-bisin, anna karuan nga magawag tu uffun.

Ngem sisinu nga nalippawa ku nga ariakku moli i situasion. Maski nu nasolba gapa natun ira nga organisasion i baraddi nga problema, mas maggrabe lagapa i darakal nga problema. Maggrabe la nga maggrabe i kinadake ta interu mundo anna awan tu pakialam na totolay tatun. Awan tu makuà.

Maraddam ngà ta awan tu makuà. Megafu tatun, nanono ku i meyannung ta Dios anna i Biblia. Dati ngà nakipaggigiammu tu Biblia ta Saksi ira ni Jehova. Maski nu maappresià i Saksi ira megafu ta sippoda anna ta interesda niakan, awan paga ta nono ku nga ulian i pattolè tatun nga tiempo. Ngem nanguli ngà.

Inà ku i Biblià anna binibbig ku yatun tapus nabanna-bannayan ngà. Aru nga teksto ta Biblia i nabibbig ku nga mangituddu nittam nga masippo nakuan i pattratu tam ta aya-ayam. Angngariganna, kagian na Proverbio 12:10 nga “tangngawan na masippo ira nga totolay i aya-ayamda.” (Good News Translation) Nagigiammù gapa nga ari tu i Dios i kegafuan na problema ira ta mundo, nu ari, naggrabe i problema ira megafu ta magaru nga totolay i ari manuttul nisa. Napaguyu ngà turi ta nammuakku i aya anna pappasensia ni Jehova.​—Salmo 103:8-14.

Tatun gabbalaman nga tiempo, nakasingan ngà tu coupon para ta libru nga Anni Talaga i Ituttuddu na Biblia? yayya nga nakkiddaw ngà tu kopia natun nga libru. Ari nabbayag, binisitanà na magatawa nga Saksi tapus inoferaddà tu paggigiammu ta Biblia. Inakseptà yatun anna nakistudy ngà ngana gapa ta Kingdom Hall. Megafu tatun, minatto niakan i magiggigiammù ta Biblia.

Pia ngana laman ta egga i Biblia. Aru i nolì ta pattolè. Nagimmang ngà massigariliu anna ari ngà ngana magillellaw. Inulì i itchurà anna niyemmakku i paggageg. Makimoray ngà ngana gapa ta autoridad ira. (Roma 13:1) Niyemmakku gapa i imoral nga pattolè nga dati, normal laman niakan.

I pinakamariga nga panguli para niakan ay i kapeggan tu fustu nga pagimamma ta organisasion ira nga mapprotekta ta kepangngattan na totolay anna aya-ayam. Ari tu mabi yatun. Ta gafu, matageno ku nga gittana pattraydor nu panawakku danatun nga organisasion. Ngem natindiakku nga i Pappatulan laman na Dios i makasolba ta problema ira na mundo. Yayya nga nadesisiokku nga usan i ngamin nga sikakku tapenu suportan i Pappatulan anna uffunan i tanakuan tapenu makannammuan i meyannung tatun.​—Mateo 6:33.

Tagga ta aktibista ngà paga, nononopakku nga egga laman i dua nga klase na tolay—masippo onu marake. Labanakku danuri ibilakku nga marake. Ngem megafu ta Biblia, ariakku ngana ikalussaw i tanakuan. Ipasingakku ngana i nacristianuan nga aya para ta ngamin nga totolay. (Mateo 5:44) I pangilayyagayya ta mapia nga dumug na Pappatulan na Dios i tadday nga makuà tapenu mepasingan yaw nga aya. Megafu taw nga trabahu, mapeggan tu imammo, pagayayya, anna kurug nga iddanama i totolay. Magayayya ngà nga makasingan tatun.

Megafu ta nitalo ku ngana kani Jehova i ganna-gannug, memammo ngà ngana. Yayya i Namaratu yatutta kumbinsidu ngà nga kanna pagurayan nga mannanayun nga maabuso i aya-ayam anna i totolay. Kanna gapa vuluvuga pagurayan nga madaral i makakkasta nga davvun nga paddianattam. Aranni ngana nga pakappian na Pappatulanna i ngamin nga marake nga nesimmu. (Isaias 11:1-9) Talaga magayayya ngà nga mammuan danaw nga kinakurug. Magayayya ngà gapa nga uffunan i tanakuan tapenu mangurug tatun. Ariakku ngana nga nononopan nga mawag ku ulian i situasion.