Imajinammu i yama nga magistoria ta abbing nga anana. Kinagina, “Ta ollu nga tiempo, pinaratu na Dios i davvun anna i ngamin nga egga tatun. Kingnguana gapa i bilag, i vulan, anna i biti-bitun.” Nannono i abbing anna niyavuna ta yamana, “Pa, sinni i namaratu ta Dios?”

Nitabbag na yamana, “Awan tu namaratu ta Dios. Awan tu naggafuanna.” Natabbag natun i pakkiavu na abbing. Ngem ta paddakalna, arianna lagapa mattaman yatun nga pakkiavu. Marigatan yayya nga alippawatan nga awan tu namegafuanan na Dios, megafu ta ammuna nga maski i uniberso ay egga namegafuananna. Yatutta nononopanna, ‘Egga kari i namegafuanan na Dios?’

Anni i tabbag na Biblia? Kaparehuna i tabbag na yama ta gafu. Nitura ni Moises: “O Afu, . . . nage na nikaparo na vuku-vukig anna tanga-ravvunan, mannanayun nga Dios ka gari ngana, anna mannanayun nga Dios adde noka.” (Salmo 90:​1, 2) Kinagi gapa ni profeta Isaias: “Ariammu kari ammu? Ariammu kari naginna? Si Jehova, i Namaratu ta ngamin nga egga ta davvun, ay Dios adde noka”! (Isaias 40:28) Kinagi gapa ni Judas nga egga ngana i Dios “namegafu paga gari.”​—Judas 25.

Suportan yatun ira nga teksto i kinagi ni apostol Pablo nga i Dios i “Patul adde noka.” (1 Timoteo 1:​17) Kebalinan gafu natun nga maski nu toliattam adde ta gafa-gafuna, awan tu namegafuanan na Dios anna mannanayun i keggana. (Nepakannammu 1:8) I mannanayun nga keggana i mangipasingan nga yayya i Makapangngua sa Ngamin.

Ngatta marigatan ittam nga alippawatan yatun? Ababba laman i pattoletam yari tu neruma i pagimamma tam ta tiempo kumpara ta pagimamma ni Jehova. Gafu ta mannanayun i Dios, gittana tangaggaw laman nisa i tanga-rivu nga ragun. (2 Pedro 3:8) Angngariganna: Malippawa kari na tadday nga ganta nga mattolay laman tu 50 nga aggaw, i kapaddu na pattoletam nga magadde ta 70 onu 80 nga dagun. Ari! Ngem kinagi na Biblia nga megitta ittam laman ta ganta kumpara ta Namaratu nittam. Ari tam gafu nga megitta i appanono tam ta appana-panonona. (Isaias 40:22; 55:​8, 9) Aru gafu i meyannung kani Jehova i ari vuluvuga malippawa na totolay ira.

Maski nu mariga nga malippawa, kurug tu mannanayun i Dios. Nu egga i tadday nga namaratu ta Dios, siguradu nga yayya i mepangngo nga magalan nga Namaratu. Ngem kagian na Biblia nga pinaratu ni Jehova i ngamin. (Nepakannammu 4:​11) Awan paga i uniberso dati. (Genesis 1:​1, 2) Naggafuan gafu natun? Siguradu nga egga i Namaratu tatun. Egga ngana yayya nige paga na intelihente ira nga pinaratu, kagitta na tattadday nga Anana anna i anghel ira. (Job 38:4, 7; Colosas 1:15) Manawag nga magitetadday laman yayya ta gafa-gafu. Awan tu namaratu ta nisa.

Sittam anna i interu nga uniberso i mamakurug nga egga i mannanayun nga Dios. Yatutta i mannanayun nga keggana i mamaguyu anna mangontrol ta interu uniberso. Yayya laman gapa i egga pakawayyana nga mangiyawa tu inango ta ngamin.​—Job 33:4.