Neyana ngà ta Acul. Nesisina nga ili ta western highlands na Guatemala. Tadday i familia mi ta tribu na Ixil, tadday nga etniko nga tribu nga naggafu ta gaka na Maya. Fuera paga ta Spanish nga lengguahe, maguvovug ngà gapa tu lengguahe na tribu mi. Egga i gerra sibil ta Guatemala nga nagadde ta 36 nga dagun, anna naddetakku yatun ta kabbikku. Aru i natay nga Ixil tatun nga tiempo.

Turi ta appa i dagukku, gaya-gayaman na manung ku nga pitu i dagunna i tadday nga granada anna aksidente nga nassabug yatun. Navulag ngà anna natay i manung ku. Kabalin natun, naddian ngà ta institusion para ta vulag nga abbarabbing ta Guatemala City. Tatukku nagigiammu i Braille. Ariakku mantindian nu ngatta, ngem nigamma na staff ira nga makibbida ngà ta tanakuan tu abbarabbing, anna lillitaddà gapa na kaklasè ira. Kanayun ngà nga maraddam, anna iinnaggakku i dua-vulan nga bakasiokku kada dagun megafu ta kanappakku i lubbe anna makavulu si yenà nga masissippo anna minangngikallo. Natay yayya turi ta mafulu pagalaman i dagukku. Grabe i daddam ku megafu ta nawawan i tattadday nga mangiddu niakan.

Turi ta 11 i dagukku, limibbe ngà ta diammi anna naddian ngà ta manung ku ta yama kavulu i familiana. Meyawada i pisikal nga pakawagakku, ngem ariaddà moffunan ta emosional. Nu mittan, itatangi ku ta Dios: “Ngatta natay si yenà? Ngatta navulag ngà?” Kagian na totolay nga uray na Dios i nesimmu ira niakan. Yatutta nanono ku nga awan tu pangikallo na Dios anna ari yayya patas. Kayà ku i mappakamatay ngem ariakku ammu nu kunnasi kuan yatun.

Megafu ta vulag ngà, ariakku maprotektan i baggì. Ta kabbikku, namippiga ngà na-rape. Ariakku nidanug yatun megafu ta awan mabba tu pakialam na tanakuan niakan. Ariakku makikkibbida ta maski sinni, anna bihira gapa nga kibbidannà na totolay. Kanayun ngà magitetadday anna depres ngà, anna awan tu tiwala ku ta maski sinni.

Turi ta 13 i dagukku, inaranniannà na dua nga Saksi ira ni Jehova (magatawa) turi ta maddaggun i recess mi ta eskuela. Zinog ira na mestrà nga bisitaddà megafu ta ikabbinà. Nikagida niakan i promesa na Biblia nga mapaginnolay noka i natay ira anna makasingan noka i vulag ira. (Isaias 35:5; Juan 5:28, 29) Kakayà ku i ituttudduda niakan ngem marigatan ngà nga makiyuvovug nira megafu ta ari ngà sanay. Maski paga nu kunnatun, masippo anna pinasensiaddà nga bisitan tapenu tudduan paga meyannung ta Biblia. Mallakag yaw nga magatawa tu 10 kilometro ta vukig tapenu madde i diammi.

Kinagi na manung ku nga makakkasta i passinnudda maski ari ira nga mariku. Ngem kanayun ira nga mangiyawa niakan tu simple nga regalu nga mangipasingan nga ikavurungaddà. Makagì nga i kurug laman nga Cristiano i makapassakrifisio tu kunnatun.

Ginigiammù i Biblia gukaban na Braille ira nga publikasion. Malippawa ku i giggigiammuakku ngem marigatan ngà nga akseptan yatun. Angngariganna, marigatan ngà nga kurugan nga ikavurungannà mismu na Dios anna kunnatun gapa i matageno na tanakuan niakan. Malippawa ku nu ngatta temporario nga ipamavulun ni Jehova i kinamarake, ngem marigatan ngà nga ibilang yayya tu kurug nga minaggiddu nga Yama. *

Sisinu nga nanguli i pagimamma ku megafu ta nagigiammù ira ta Biblia. Angngariganna, nagigiammù nga matageno na Dios i pazziga-riga na totolay. Kinagi na Dios ta namaltratu ira nga maddayaw nisa: “Talaga nasingakku i pazziga-riga na totolè . . . ammù i taka-taki nga idaga-ragidda.” (Exodo 3:7) Turi ta naappresià i makakkasta ira nga kualidad ni Jehova, nidedikà i pattolè nisa. Turi ta 1998, nabawtisowan ngà bilang tadday nga Saksi ni Jehova.

Tanga-ragun kabalikku nabawtisowan, naggigiammu ngà tu kurso nga para ta vulag aranni ta siudad na Escuintla. Nammuan na tadday nga elder mi nga marigatan ngà nga magatende ta study maggafu ta diammi megafu ta i karannian nga kongregasion ta diammi ay kagitta na karayyu na lakaran na magatawa nga nagistudy niakan. Inuffunannà natun nga elder. Nagaleg yayya tu tadday nga Saksi nga familia ta Escuintla nga awayyà paddianan tapenu maka-atende ngà ta study ira. Adde sangawe, uuffunaddà anna nibilangdà tu kafamiliada.

Aru ira i ekspiriensà nu kunnasi nipasingan na kakongregasiokku i kurug nga pangayada niakan. Megafu tatun, kumbinsidu ngà nga bilang tadday nga Saksi ni Jehova, kavulu ku i kurug ira nga Cristiano.​—Juan 13:34, 35.

Ariakku ngana matageno nga awan tu sesserbì anna awan tu iddanamà. Egga ngana i gakkag na pattolè. Bilang tadday ta ngamin tiempo nga ministro na Saksi ni Jehova, nakafokus ngà ta panuddu ta kinakurug ira ta Biblia imbes tu maffokus ngà ta diferensià. Neddan ngà gapa tu pribilehio nga masserbi tu elder ta kongregasion, anna mangiyawa tu nebase-Biblia nga palappa ta kongregasion ira. Neddan ngà gapa tu pribilehio nga mappalappa ta rehional ira nga kombension nu sitaw rinivu ira i magginna.

Turi ta 2010, naggradua ngà ta Ministerial Training School (magalan ngana sangawe tu School for Kingdom Evangelizers) ta El Salvador. Noffunannà na pagiskuelà tatun tapenu mas metuppal ku paga tu mapia i annungakku ira ta kongregasion. Megafu taw nga passanay, mas natageno ku nga tagibaloran anna iddukannà ni Jehova nga Dios, i mamabbalin ta tadday tu kualipikadu para ta trabahuna.

Kinagi ni Jesus: “Mas dakal i pagayaya ta pangiyawa anne ta pangalawa.” (Kingngua 20:35) Makagì nga magayayya ngà ngana, anna maski nu manono ku dati nga gittana imposible, matageno ku ngana nga egga meyuffukku ta tanakuan.