Nasingan na tadday nga abbing i atu nga naggafu ta pabrika tapus mappa-utun nga gitta na kunam. Pagabbona nga i pabrika i paggafuan na kunam. Kaggalo yatun nga nanonona. Ngem egga ira pagabbo nga dakal i efektona ta pattoletam. Angngariganna, peligroso i resultana nu mali i pakalippawamu ta instruksion ta bote na medisina.

Mas dakal i efektona nu mali i pakalippawamu meyannung ta espiritual nga ganna-gannug. Angngariganna, mali i pagabbo na karuan ta tuttuddu ni Jesus. (Juan 6:48-68) Imbes tu gigiammuan paga, ariadda inalawa i tuttuddu ni Jesus. Kenga laman!

Bibbigammu kari i Biblia para ta giya? Makomendan yatun. Ngem egga kari i peligro nu mali i pagabbomu ta nabibbigmu? Mesissimmu yatun ta aru nga totolay. Innattam i tallu nga gagangay nga mali nga pagabbo.

• Mali i pakalippawa na karuan ta kagian na Biblia nga “maganassing ka ta kurug nga Dios.” Pagabboda nga mawag tu sobra i paganassing tam ta Dios. (Eclesiastes 12:13) Ngem manaki na Dios nga kunnatun i matageno na maddayarayaw ira sa. Kagianna: “Ari ka nga maganassing, ta egga ngà nikaw. Ari ka nga mavurung, ta sakan i Diosmu. Patuyaggattaka, wan, uffunattaka.” (Isaias 41:10) Kayà kagian na paganassing ta Dios nga mawag tu monag nga respetuan anna dayawan yaya.

• Mali i pakalippawa na karuan taw nga teksto: “Egga i natullo nga tiempo ta kada gannug, . . . tiempo na keyana anna tiempo na patay.” Pagabboda nga nadisidi ngana na Dios i eksakto nga tiempo na patay na kada tolay. (Eclesiastes 3:1, 2) Ngem i siklo na pattolay laman i tukuyanna yaw nga teksto anna kagianna nga ngamin ay matay. Ituddu paga na Uvovug na Dios nga egga efekto na desisiottam ira ta kapaddu na pattoletam. Angngariganna, mabibbig tam: “I paganassing kani Jehova papidduanna i pattolay.” (Proverbio 10:27; Salmo 90:10; Isaias 55:3) Kunnasi? Megafu ta pangirespeto tam ta Uvovug na Dios, lillitattam i pagillellaw anna imoralidad nga makafekto ta gawa-gawayyattam.—1 Corinto 6:9, 10.

• Literal gapa i pangalippawa na karuan ta kagian na Biblia nga “matuggi ira noka” i langi anna davvun, anna pagabboda nga daralan na Dios yaw nga planeta. (2 Pedro 3:7) Ngem nipromesa na Dios nga arianna vuluvuga ipamavulun nga madaral i davvun. “Pinataddag [na Dios] i davvun ta patuno nga maladda, ay ari nga mayayyag vuluvuga.” (Salmo 104:5; Isaias 45:18) I marake nga sistema na mundo i permanente nga madaral, nga gittana natuggi, ari nga i literal nga davvun. Nu literal gapa nga langi, awayyana nga tukuyanna yaw i masingattam ta utun, i mabitun nga uniberso, onu i langi nga paddianan na Dios. Awan taw ira i madaral.

Gitta na napansinmu tatun ira nga angngarigan, maruddu nga mali i pagabbo na totolay ta mabibbigda ta Biblia. Ngatta gafu ipamavulun yatun na Dios? Kunna karuan: ‘Nu masirib i Dios anna ammuna ngamin, nangiyawa nakuan yaya tu libru nga mabi malippawa na ngamin. Ngatta tamma arianna kingngua yatun?’ Innan i tallu nga rason nu ngatta maruddu nga mali i pakalippawa ta Biblia.

1. Nadisenio i Biblia tapenu malippawa danuri minappakalinno anna sigga-paran nga maggigiammu. Kinagi ni Jesus ta Yamana: “Ama nga Yafu na langi anna davvun, mabbala-balo ngà nikaw ta nipakannammum ta awan tu ginigiammu da i ganna-gannug nga ariam-mu nga nipakannammu ta ma-uto ira anna egga i ginigiammu  da.” (Lucas 10:21) Malippawa laman danuri egga mapia nga appana-panonoda i mensahe na Biblia. Egga tendensia nga mali i pakalippawa ta Biblia danuri minappakatannang nga totolay—gagangay nga ugali na “ma-uto ira anna egga i ginigiammu da.” Ngem mabendisionan tu pakalippawa ta mensahe na Biblia i totolay nga mabbibbig tu Biblia nga i appana-panonoda ay kagitta na “awan tu ginigiammu da”—minappakalinno anna sigga-paran nga maggigiammu. Talaga makasta i pakkadisenio na Dios ta Biblia!

2. Malippawa laman na totolay nga sigga-paran nga mappoffun ta Dios i Biblia. Nipasingan ni Jesus nga mawag na totolay i uffun tapenu malippawa i tudduna. Kunnasida yatun malawa? Niyesplika ni Jesus: “I manguffun, i masanto nga espiritu, nga iyawa na Yama ta ngagakku, yatun i manuddu nikamu ta ngamin nga gannug anna mangiparaddam ta ginnonopannu ta ngamin nga gannug nga kinagì nikamu.” (Juan 14:26, NW) Yari tu iyawa na Dios i masanto nga espirituna—i makapangngua nga fuersana—ta totolay tapenu malippawada i mabibbigda ta Biblia. Ngem arianna iyawa yatun ta totolay nga ari mappoffun sa, yari tu ariadda malippawa i Biblia. Paguyuan gapa na masanto nga espiritu i Cristiano ira nga egga ngana pakannammuda nga uffunan danuri makkaraga nga malippawa i Biblia.—Kingngua 8:26-35.

3. Matindian laman i karuan nga rekord ta Biblia ta fustu nga tiempo. Angngariganna, nepatura kani Daniel i mensahe nga para ta mappange. Kinagi sa na anghel: “Daniel, ilimagmu i uvovug ira, anna selyowammu i libru adde ta pangurianan nga tiempo.” Ta pappasa na aru nga siglo, aru ngana i nakabibbig ta libru na Biblia nga Daniel ngem ariadda malippawa. Kakuruganna, maski si Daniel mismu arianna nalippawa i karuan ta niturana. Sipapakalinno nga kinagina: “Naginnà, ngem ariakku malippawa.” Magga malippawa gabbalaman na totolay i profesiya na Dios nga nitura ni Daniel, ngem ta fustu nga tiempo nga pinili na Dios. Nipakanawag na anghel: “Umay ka, Daniel, megafu ta melimag i uvovug ira anna naselyowan adde ta pangurianan nga tiempo.” Sinni i makalippawa ta mensahe na Dios? “Awan ta marake ira i makalippawa; ngem danuri egga pakalippawada ay makalippawa.” (Daniel 12:4, 8-10) Ipakannammu laman gafu na Dios i kebalinan na karuan nga rekord ta Biblia ta fustu nga tiempo.

Nakkamali kari ngana gapa i Saksi ira ni Jehova ta pakalippawa ta Biblia megafu ta ari paga tu fustu i tiempo? Wan. Ngem nu duttal i tiempo na Dios para ipakanawag i ganna-gannug, sigga-paran i Saksi ira nga ulian i pakalippawada. Mangurug ira nga paparigadda i apostoles ni Cristo, nga sipapakalinno nga nanguli ta appana-panonoda kada itunung ira ni Jesus.—Kingngua 1:6, 7.

Awayyana tu kappagalo i mali nga pagabbo na abbing meyannung ta paggafuan na kunam. Ngem dakal i efekto nikaw na tuttuddu na Biblia. Ariammu malippawa yatun nu sikaw laman. Mappoffun gafu tapenu malippawamu i bibbibbigammu. Mappoffun ta maggiggigiammu ira tu Biblia, ta totolay nga sipapakalinno nga maddepende ta masanto nga espiritu na Dios tapenu malippawa i Biblia, anna kumbinsidu nga egga ittam ngana ta tiempo nga kakayà na Dios nga malippawa tam i Biblia. Ariammu mappasirang nga makiyuvovug ta Saksi ira ni Jehova onu bibbigan i nagigiammuda ta website nga jw.org. Nipromesa na Biblia: “Nu magagal ka para ta pakalippawa . . . , malegammu i pakannammu ta Dios.”—Proverbio 2:3-5.