Boring? Onu makarefresko? Kunnasi i pabbibbig tu Biblia nikaw? Nakadepende yatun tu aru nu kunnasi i pabbibbigmu. Innattam nu anni i makuam tapenu mas makapa-interes anna magenjoy ka tatun.

Pilian i mapammakatalakkan anna moderno nga bersion. Nu mabbibbig ka tu material nga aru i mariga onu dana ira nga terminona nga ariammu ammu, siguradu nga ariammu ma-enjoy i pabbibbig tatun. Yatutta magaleg tu Biblia nga mabi malippawa nga makatukkal ta futum. Ngem, mawag tu memmugug anna fustu i nike-transleyt na. *

Usan i moderno nga teknolohia. Ta maddaggun, available i Biblia ari laman ta neyimprenta nga libru, ngem maski gapa ta digital nga format. Egga karuan nga Biblia nga mabibbig online onu me-download para mabibbig ta computer, tablet, onu ta cellphone. Egga ira i bersion nga awayyam insigida masingan i tanakuan nga bersikulo na Biblia ta parehu nga topiko onu ikumpara ta karuan nga bersion. Nu mas kayàmu magginna anne ta mabbibbig, egga gapa i Biblia nga nerekord. Aru nga tolay i magenjoy nga magginna durante nga mabbiahe ira, mabbabbal, onu mangngua tu maski anni laman nga trabahu nga awayyada magginna. Ngatta ariammu purueban nu anni i mepangngo nikaw?

Usan i tool ira na Biblia. Makoffun i tool ira na Biblia tapenu mas mabenefisiowakka ta  pabbibbigmu. Egga ira i mapa na lugu-lugar ta Biblia, nga makoffun nikaw tapenu masingammu i lugar ira nga mabibbigmu anna makoffun ta imahinasiommu. Egga ira artikulo taw nga magazina onu ta seksion nga “Turo ng Bibliya” ta website nga jw.org/tl nga makoffun tapenu malippawamu i kebalinan na parte ira na Biblia.

Padduruman i istilom ta pabbibbig. Nu kagitta na mariga nga tulu-tuloy nga bibbigan i interu Biblia, ngatta ariammu purueban nga igafu ta parte nga kakayàmu? Nu kayàmu nga mannammuan i popular ira nga tolay ta Biblia, awayyam bibbigan i parte ira nga nallawanadda. Masingammu i sampol natun ta kahon nga “ Pakkokkog ta Biblia Gukaban na Karakterna Ira.” Onu baka kayàmu nga bibbigan i Biblia base ta topiko onu base ta patturunug na nesimmu ira. Ngatta ariammu purueban i maski anni taw?