Neyana ngà ta Paddington, lugar ta London, England nga dakal i populasionna. Kavuluku ta balay i yenà anna tallu nga manangku. Minaggillellaw i yamà yari tu mammaggi ariammi yaya nakakkavulu.

Kustu abbing ngà, sinudduannà ni yenà nga maddasal kada gabi. Egga baddi nga Biblià nga Salmo laman i naddianna, anna niddakku tu tono tapenu makansiokku. Ariakku mattaman i nabibbigku ta tadday nga libru: “Duttal i tiempo nga mangultimo i ngamin.” Megafu tatun, ariakku kuruga makakatrug ta agga-nonoku i mappange. ‘Siguradu nga ari laman tu kunnaw i pattolay,’ nanonoku. ‘Ngatta egga ngà taw ta mundo?’ Manakiku i matay!

Pinaginteresakku i okulto. Pinuruebakku i makibbida onu makiergo ta natay, minay kami ta sementeriu na kaeskuelà ira, anna naggiraw kami tu pelikula ira nga horror. Kappaganassing, ngem kakayàmi.

Nawawan i direksion na pattolè turi mafulu paga laman i dagukku. Nassigariliu ngà, tapus naadik ngà insigida. Turi kua, nangusa ngà tu marijuana. Mininum ngà ngana gapa tu binarayang kustu 11 anios ngà. Manakiku i lasana, ngem kakayàku i mellaw. Mahilig ngà gapa ta musika anna mattala onu mabbayle. Umu-umay ngà ta party anna disco ira. Kadabes ngà mattammang nu gabi tapus manoli ngà nige duttal i umma. Kommanganna, gafu ta nabannag ngà, kanayun ngà nga magabsent. Tapus nu tullung ngà, minum ngà tu binarayang nigeku umay ta tumunug nga klasè.

Kitabbaba i grade-ku ta ultimo nga dagukku ta eskuela. Awan tu ammammu ni mamà ta nesissimmu niakan yari tu kuruga nadismaya anna nakaporay yaya. Naddama kami yari tu nanaw ngà ta balemi. Naddiang ngà tu manganannuan ta boyfriend-ku nga si Tony, nga tadday nga Rastafarian. Mallalaku tu droga anna kilala yaya nga kuruga vayolente. Tapus, navussi anna nagana ngà tu lalaki kustu 16 anios ngà paga laman.

Ollu nga nakilalà i Saksi ira ni Jehova turi ta naddiang ngà ta hostel nga para ta single ira nga yena kavulu i ánada.  Egga kuartò tatun nga niyawa na gobiernu. Regular nga mabbisita i dua nga Saksi nga babay ta karuan nga mabbing nga yena. Mittan, nevulu ngà ta paggiristoriada. Kayàku nga pakurugan tu mali i Saksi ira. Ngem kalmadu anna manawag nga sinabbagda ta Biblia i kada pakkiavuku. Masippo anna malumamo ira, yari tu nagustuakku ira. Yatutta, nappa-bible study ngà nira.

Egga nagigiammù ta Biblia nga nanguli ta pattolè. Abbing ngà paga laman, maganassing ngà ngana matay. Ngem nammuakku i tuddu ni Jesus meyannung ta paginnolay! (Juan 5:28, 29) Nammuakku paga nga talaga ikavurungannà na Dios. (1 Pedro 5:7) Natukkal i futù ta kinagi na Jeremias 29:11, kunna: “‘Ammù i pana-panono nga nononopakku tannikamu,’ kagian ni Jehova, ‘i pana-panono ta imammo, ari tu kalamidad, tapenu mangiyawa nikamu tu mappange anna iddanama.’” Mangurug ngà ngana nga egga i iddanamà nga mattolay tu mannanayun ta Paraiso nga davvun.—Salmo 37:29.

Kurug nga aya i nipasingan niakan na Saksi ira ni Jehova. Ta ollu nga pagatendè ta study-da, makasta i pinangalawada niakan—masippo ira ngamin! (Juan 13:34, 35) Dakal i nikedumanna ta simbahan ta lugarmi. Inalawadà na Saksi ira maski kunnaw ngà. Niddadda tu oras, pangikavurung, anna atension, kunne na gapa tu praktikal ira nga uffun. Natagenoku nga parte ngà na dakal anna meddu nga familia.

Ta paggigiammù tu Biblia, nammuakku nga mawag tu uliakku i pattolè tapenu maddeku i atannang nga moral nga estandarte ira na Dios. Narigatan ngà iyemmang i passigariliu. Nammuakku gapa nga egga ira i musika nga maka-influwensia niakan tapenu mangusa ngà mana tu marijuana, yari tu nilillitakku danatun. Tapenu makontrolku i pagillellaw, niyemmakku i maki-party anna maki-disco. Anna nagaleg ngà tu bagu nga kakavvulu nga makoffun niakan tapenu manguli.—Proverbio 13:20.

Nappa-bible study gapa si Tony ta Saksi ira ni Jehova. Nakumbinsi gapa yaya nga kurug i magiggigiammuna megafu ta sinabbag na Saksi ira ta Biblia i pakkiavuna ira. Dakal i nangulianna: ari ngana nevulu ta vayolente nga kakavvuluna, niyemmang i marake nga kukukuanna, anna nagimmang mangusa tu marijuana. Tapenu mapagayayami talaga si Jehova, naddesisiokkami nga ulian i imoral nga pattolemi anna iddan tu makasta nga pattolay i anami. Nappakasal kami turi 1982.

Meraddammakku paga nga magala-aleg ngà turi tu artikulo ira ta Passifusifutan anna Gumising! * meyannung ta totolay nga kagittà i situasiodda ngem nanguli ira. Talaga napagaram ngà ta ehemploda! Mas nga nabbaling ngà tu determinadu anna ari nga sumuku. Nipakimalloku kani Jehova nga ari nakuan yaya sumuku niakan. Nabawtisowan kami ni Tony bilang Saksi ni Jehova turi ta Hulio 1982.

Napeggan ngà tu makasta nga relasion kani Jehova nga Dios yari tu matolay ngà paga ta maddaggun. Naekspiriensami gapa ni Tony i suporta ni Jehova ta mariga ira nga situasion. Nagigiammumi nga mattalo kani Jehova ta mariga ira nga tiempo anna natagenomi nga kanayun nga uffunanna i familiami.—Salmo 55:22.

Magayaya ngà megafu ta noffunakku i dua nga anami nga makilala gapa si Jehova. Kunnatun gapa i panagenoku ta masingi-singakku i afuku ira nga matuttudduan meyannung ta Dios.

Masingngo ngana i katrugku nu gabi megafu ta ari ngà ngana mavuru-vurung ta mappange onu patay. Ta maddaggun, okupadu kami ni Tony ta pabbisita ta kongregasion ira na Saksi ira ni Jehova kada ligguan tapenu mamagaram. Mevulu kami nira ta panuddu ta tanakuan meyannung ta pangurug kani Jesus tapenu malawada gapa i mannanayun nga inango.