Ari tu ordinario nga libru i Biblia. Nelavu tatun i tabarang nga naggafu ta Namaratu. (2 Timoteo 3:16) Daka-dakal i influwensia na mensahena nittam. Ta kakuruganna, kagian na Biblia: “I uvovug na Dios ay matotolay anna makapangngua.” (Hebreo 4:12) Egga i pakapangnguana nga pakastan i pattoletam ta dua nga importante nga gannug—igiyana ittam ta inaggaw nga pattoletam anna uffunanna ittam nga mannammuan i Dios anna i promesana ira.—1 Timoteo 4:8; Santiago 4:8.

Mapakastana i pattolem ta maddaggun. Makoffun i Biblia ta personal ira nga gannug. Praktikal i tabarangna meyannung ta tumunug ira.

•   Relasion ta tanakuan.—Efeso 4:31, 32; 5:22, 25, 28, 33.

• Emosional anna pisikal nga gawa-gawayyan.—Salmo 37:8; Proverbio 17:22.

• Moral ira nga estandarte.—1 Corinto 6:9, 10.

• Pattolayan.—Proverbio 10:4; 28:19; Efeso 4:28. *

Naappresia na bagu kasal nga taga-Asia i balor na tabarang na Biblia. Turi ta bagu ira nga magatawa, narigatan ira nga makibagay ta personalidad na kataggi-tadday anna mapeggan tu vuka nga komunikasion. Ngem, nigafuda nga iyaplika i nabibbigda ta Biblia. Anni i resultana? Kunni Vicent: “Nakoffun i nabibbikku ta Biblia tapenu meddu nga marubakku i problema ira ta pagatawami. Nabbalin tu magayaya i pagatawami megafu ta panuttul tatun.” Umanugu i atawana nga si Annalou: “Nakoffun nikami i pabbibbig tu ehemplo ira ta Biblia. Magayaya anna kontento ngà ta pagatawami anna ta gakkagmi ira ta pattolay.”

Mammammum i Dios. Fuera paga ta komentona ira ta pagatawa, kunna paga ni Vicent: “Ta pabbibbikku ta Biblia, mas naddukko ngà kani Jehova kumpara tagga.” Ipasingan na obserbasionna i importante nga punto—makoffun i Biblia tapenu mammammum i Dios. Ta pangngua tatun, ariammu laman mabbenefisio ta tabarangna, nu ari, mannammuammu gapa yaya bilang kofun. Masingammu nga ipakannammuna nikaw i meyannung ta mas makasta nga mappange, sonu magayaya ka ngana ta “kurug nga pattolay”—nga magadde ta mannanayun. (1 Timoteo 6:19) Yatun i gannug nga ari vuluvuga meyawa na tanakuan nga libru.

Nu planom nga bibbigan i Biblia anna itulu-tuloy yatun, mabbenefisio ka gapa—mapakastana i pattolem ta maddaggun anna mammammum i Dios. Ngem, durante nga bibbigammu i Biblia, awayyana nga aru nga pakkiavu i manonomu. Nu kunnatun, nonopan i ehemplo na ofisial nga Etiope nga nattolay 2,000 dagun ngana i nappasa. Aru i pakkiavuna meyannung ta Biblia. Turi ta neyavu sa nu nalippawana i bibbibbiganna, kunna: “Kunnasi na pakalippawa ku nu awan tu mangipakanawag niakan?” * Insigida nga inakseptana i uffun na tadday nga kualipikadu nga manuddu tu Biblia, si Felipe nga ollu ta disipulo ni Jesus. (Kingngua 8:30, 31, 34) Kunnari gapa, nu kayàmu nga mammuan i aru paga meyannung ta Biblia, mangipatulug ka tu request online ta www.pr418.com/ibg onu mattura ta pinaka-aranni nga adres, nga nakalista taw nga magazina. Awayyam gapa nga kontakan i Saksi ira ni Jehova ta lugarnu onu magatende ta Kingdom Hall nga aranni nikamu. Ngatta ariammu bibbigan i Biblia taw nga aggaw tapenu mapakastam i pattolem?