Paspas anna matannug i pakkarelada! Mananawag nga gittana mallillittu ta pahina ira na Biblia i appa nga makapangngua nga kabayu anna i nakatakay nira! Furaw i ollu nga kabayu—marayaw anna bagu nga nakoronan nga patul i nakatakay taw. Tumunug sa i makalozzin nga kabayu, nga nakatakay i tadday nga mangalsa ta imammo ta interu davvun. Ngisi nga gittana gabi i mekatallu nga kabayu, nga agga-tammi tu akkilowan i nakatakay, nga kaddaddam i mensahena meyannung ta pakkurang na makan. Makangila i meka-appa nga kabayu, nga seniales na taki anna tanakuan paga nga peligro, nga nakatakay mismu i Patay. Anna i Hades, i gagangay nga attanamman na totolay, ay tumuntubag sa nga magapit ta aru nga nakkapatay!—Nepakannammu 6:1-8.

“Naganassing ngà turi ta ollu nga nabibbig ku i meyannung ta appa nga nakakabayu. Gittana duttal ngana i Aggaw na Pamanunnu anna megafu ta ari ngà preparadu, ari ngà mepaliag.”—Crystal.

“Nagustuakku i appa nga nakatakay ta nadduruma i kulorna nga kabayu ira. Turi ta ginigiammù i sirmata, nalippawa ku i kebalinanna.”—Ed.

Kagitta kari ni Crystal i natagenomu meyannung ta appa nga nakakabayu ta Nepakannammu? Onu parehu kamu ni Ed? Maski anni taw, ipasingan danuri nakakabayu i tadday ta popular nga eksena ta Nepakannammu, i ultimo nga libru na Biblia. Ammum kari nga mabenefisiowakka nu malippawa mu yaw nga sirmata? Kunnasi? Nipromesa na Dios nga malegammu i kurug nga pagayaya gukaban na pabbibbig, paggigiammu, anna pangiyaplika ta gannug ira nga netura tatun nga libru na profesiya.—Nepakannammu 1:1-3.

Maganassing i karuan taw nga sirmata na appa nga nakakabayu, ngem ari yaw nadisenio para mangananassing. Kakuruganna, napatuyag naw nga sirmata i pangurug na minillion anna nituddu naw nira i iddanama na makasta nga mappange. Awayyana nga kunnatun gapa nikaw! Ituloy mu gafu i pabbibbig.