Ziminakal ngà ta Puerto Limón, siudad nga pantalan ta zigattu na Costa Rica. Mekapitu ngà ta walu nga mawwaragi. Natay si yamà kustu walu anios ngà. Yari tu tattadday ni yenà nga namadakal nikami.

Parte na pattolè i baseball. Kakayà ku yaw nga isport namegafu ta kabbikku. Turi ta tinedyer ngà, sumali ngà ta tadday nga team ta amateur nga liga. Habang egga ngà tatun nga liga kustu mga 20 anios ngà, tadday nga scout i nakkiavu nu ikaya ku i magayang ta tadday nga professional team ta Nicaragua. Megafu ta mataki si yenà tatun na tiempo anna sakan i manangngaw sa, manaki ku i umay ta Nicaragua. Yari tu ariakku inalawa yatun. Ari nabbayag, tadday mana nga scout i nagimbita niakan nga sumali ta national baseball team na Costa Rica, nga napili i player ira ta amateur nga liga. Inalawa ku yatun nga imbitasion. Kasali ngà ta national team namegafu ta 1949 adde ta 1952, anna nagayang ngà ta Cuba, Mexico, anna Nicaragua. Baseman ngà anna makasta aggayakku, anna egga paga lagu i 17 nga natturunug nga gayang nga awan tu kamali ku. Magayaya ngà ginnan i pakkulle na totolay ta ngagakku!

I marake laman, imoral gapa i pattolè. Maski nu tadday laman i nobià, minammabay ngà. Minaggillellaw ngà paga. Egga paga mittan, ta sobra nga illaw ku, ariakku ngana meraddamman nu kunnasi ngà nakalabbe ta balay! Maffegu ngà paga tu domino anna mattaya ta lotto.

Durante nga kunnatun i pattolè, nabbalin tu tadday nga Saksi ni Jehova si yenà. Kukkumbinsiannà ta pangurugna, ngem ariakku inalawa yatun megafu ta grabe i pangaya ku ta isport. Nu egga ngà ta pagayangan maski nu tiempo na pakkakan, ari ngà makatageno tu bisin! Nakafokus laman i nono ku ta gayang. Grabe i pangaya ku ta baseball!

Ngem turi ta 29 anios ngà, nadisgrasia ngà ta tadday nga gayang. Kabalikku nammapia, nagimmang ngà ngana magayang ta professional nga liga. Ngem nakisali ngà lagapa  ta passanay tu player ira para ta amateur nga liga nga aranni ta diammi.

Kustu 1957, nagatende ngà ta kombension na Saksi ira ni Jehova ta stadium nga nagayangakku tu baseball. Durante nga naka-itubang ngà, talaga nasingakku i nadduman na mapia nga kondukta na Saksi ira kumpara ta magulu nga totolay nga maggiraw tu baseball. Yatun i namaguyu niakan nga mappa-Bible study anna magatende ta study ira na Saksi.

Nagustuakku i aru ta nagigiammù nga ituttuddu na Biblia. Angngariganna, niprofesiya ni Jesus ta pangurianan ira nga aggaw nga ilayyagayya na disipulosna ta interu mundo i makasta nga balita na Pappatulan na Dios. (Mateo 24:14) Nammuakku paga nga ari mappapaga i kurug ira nga Cristiano ta pallayyagayyada. Kinagi ni Jesus: “Inalawa nu yaw . . . nga awan tu paga; . . . kuan nu gapa danaw tu ari nga kapagan.”—Mateo 10:8.

Durante nga maggigiammu ngà tu Biblia, nikumparà yaw ta masingakku ira ta Saksi ni Jehova. Bilib ngà ta lappoda nga mangipakannammu ta makasta nga balita na Pappatulan na Dios ta interu mundo. Minangngiyawa ira kagitta na nibilin ni Jesus nga mawag tu ipasingan na Cristiano ira. Yari tu kustu nabibbig ku i Marcos 10:21 nga kinagi ni Jesus, “Tumuttul ka ngana niakan,” kayà ku i mabbalin tu Saksi.

Ngem nabinnay nige ku nakatuttul tatun. Angngariganna, aru nga dagun nga kada ligguakku nga itaya i “suerte” nga numerò ta national lottery. Ngem nagigiammù ta Biblia nga kalussaw na Dios i maddayarayaw ira ta “dios na Suerte,” kunne na gapa i minakkelug nga totolay. (Isaias 65:11; Colosas 3:5) Yari tu niyemmakku i maffegu. Ta ollollu nga Liggu turi nagimmang ngà mattaya ta lotto, nangaffu i “suerte” nga numerò! Inuyu-uyawnà na totolay megafu ta ari ngà nattaya tatun nga ligguan, anna finuersadà tu mattaya mana uli, ngem ariakku kingngua. Ari ngà ngana vuluvuga naffegu.

Napurueban mana i ‘natalibagu nga kata-katolè’ ta mismu aggaw na nikabawtisò ta kombension na Saksi ira ni Jehova. (Efeso 4:24) Kinagabianna, nanoli ngà ta hotel nga paddianakku tapus maginnennag ta puerta na kuartò i dati nobià. Kinagina: “Umay ka taw Sammy. Kuatta mana uli i dati nga kukukuatta!” Insigida ngà simibbag, “Manaki ku!” Kinagì sa nga tuttuttulakku ngana i moral ira nga estandarte na Biblia. (1 Corinto 6:18) “Anni?” kunna nga nitabbag. Tapus tinagibaddina i pagimamma na Biblia ta seksual nga imoralidad anna nipilitna nga ituloymi i relasiommi. Ngem siminallung ngà lagapa ta kuartò anna niserrà i puerta. Magayaya ngà ikagi nga namegafu turi nabbalin ngà tu Saksi ta 1958, talaga nitaddaggakku i panguli ira nga kingnguà ta pattolè.

Gittana awayyà mattura tu libru meyannung ta benefisio ira nga nalawa ku ta panuttul ta Biblia! Karuan tatun ay i aru nga kurug nga kokkofun, pattolay nga egga gakkagna, anna kurug nga pagayaya.

Kakayà ku lagapa i baseball, ngem inulì ngana i pagimamma ku. Popularidad anna kuartu i niyawa niakan na baseball, ngem ari nabbayag danatun. Ngem i relasiokku ta Dios anna i pawwaragi ay mannanayun. Kunna Biblia: “Mapawan i mundo tuange ta ngamin nga egga taw nga karagatan na totolay, ngem i mamarulo ta uray na Dios ay mattolay adde noka.” (1 Juan 2:17) Ta maddaggun, si Jehova nga Dios anna i totolena ngana i ayatakku!