Gittana misterioso anna kananassing i appa nga nakakabayu, ngem ari tu mawag nga kunnatun. Ngatta? Megafu ta uffunan ittam na Biblia anna na moderno nga historia nga manawag nga mammuan i irepresenta na kada nakakabayu. Maski nu senial na kalamidad ta davvun i pattakeda, makasta gapa nga balita yatun para nikaw anna ta familiam. Kunnasi? Ammuattam labbi i kataggi-tadday ta nakakabayu.

Namegafu ta kunnaw i sirmata: “Ta paningak-ku, egga i furaw nga kabayu. I nattakay sa ay nanammi ta pana anna neddan ta korona. Ay minay nga makiggerra anna mamatulu ta kontra na ira.”—Nepakannammu 6:2.

Sinni i nakatakay ta furaw nga kabayu? Mabibbig gabbalaman ta libru na Biblia nga Nepakannammu nga i “Uvovug na Dios” i nelangitan nga nakatakay. (Nepakannammu 19:11-13) Yatun nga titulo nga Uvovug, ay kani Jesu-Cristo, megafu ta yaya i pannakasimu na Dios. (Juan 1:1, 14) Kunne na paga, nagalan yaya tu “Patul na ngamin nga patul anna Yafu na ngamin nga yafu” anna neyilustra nga “Mekatalo anna Kurug.” (Nepakannammu 19:16) Manawag nga egga autoridadna nga mabbalin tu patul ta pakiggerra, anna arianna abusowan i pakapangnguana. Ngem egga paga i pakkiavu ira.

Sinni i nangiyawa kani Jesus tu autoridad nga mamatulu? (Nepakannammu 6:2) Nakasingan si profeta Daniel tu sirmata nga i Mesias, nga negitta ta “ana na tolay,” ay niddan ni Jehova nga Dios, * i “Ollu ta Aggaggaw,” tu “pammaguray, dayaw, anna tadday nga pappatulan.” (Daniel 7:13, 14) Yari tu i Makapangngua-ta-ngamin nga Dios i nangiyawa kani Jesus tu pakapangngua anna kepangngattan nga mammaguray anna mamanunnu. Mepangngo nga isimbolo na furaw nga kabayu i matunung nga gerra nga irolluan na Ana na Dios, megafu ta maruddu nga iyusa na Biblia i kulor nga furaw nga mangisimbolo ta kinatunung.—Nepakannammu 3:4; 7:9, 13, 14.

Kanni namegafu nappakarela i nakakabayu ira? Namegafu nappakarela i ollu nga nakakabayu, si Jesus, kustu nalawana i korona. (Nepakannammu 6:2) Kanni nakoronan si Jesus bilang Patul ta langi? Ari tu turi ta nanoli yaya ta langi kabalin na patena. Ipasingan na Biblia nga naginnag paga yaya. (Hebreo 10:12, 13) Nangiyawa si Jesus ta disipulosna tu pagisenialan na pagadde na paginnagna anna i pamegafu na pammagurena ta langi. Kinagina nga kuruga marrake i situasion ta mundo sonu mamegafu i pammagurena. Egga i gegerra, bisi-bisin, anna tulagan ira. (Mateo 24:3, 7; Lucas 21:10, 11) Turi ta namegafu i World War I ta 1914, manawag nga egga ngana ittam tatun nga tiempo na ziga-riga ta davvun, nga magalan ta Biblia tu “pangurianan ira nga aggaw.”—2 Timoteo 3:1-5.

Ngatta gafu ta mas narrake i situasion, ari tu nakkasta, turi ta nalawà ni Jesus i korona ta 1914? Tatun nga tiempo, namegafu garay nga nammaguray si Jesus ta langi, ari tu ta davvun. Nabatta i gerra ta langi, anna i bagu nga nakoronan nga Patul, si Jesus, nga nagalan tu Miguel, ay pinatavvarna si Satanas ta davvun tuange ta demoniona ira. (Nepakannammu 12:7-9, 12) Megafu ta egga si Satanas ta davvun anna ammuna nga nabilang ngana laman i aggona, nepallo i gazzina. Aranni ngana nga kuan na Dios i urena kontra kani Satanas taw ta davvun. (Mateo 6:10) Innattam gapa nu kunnasi pakurugan na tallu paga nga nakakabayu nga egga ngana ittam ta “pangurianan ira nga aggaw.” Ari tu gitta na ollu nga nakakabayu nga manawag nga tumukoy ta tadday nga indibidual, irepresenta na tumunug  nga tallu i paddia-paddian ta interu mundo nga makafekto ta ngamin.

“Limittuag i tadday mangana nga kabayu nga makalozzin. Yuri i agga-takay ay neddan ta dakal nga espada anna pakapangngua nga mamaggegerra ta totolay ta utun na davvun tapenu makkapata-patay ira.”—Nepakannammu 6:4.

Irepresenta na nakakabayu i gerra. Inalsana i imammo ari laman ta piga nga nasion nu ari ta interu davvun. Ta 1914, yaw paga laman i tiempo ta historia nga nakkagerra ta interu mundo. Sinuntubag yaw na mekadua nga gerra ta interu mundo, nga mas grabe anne ta ollu. Segun ta pattantia na karuan, maturu tu 100 million i natay megafu ta gerra ira anna parralaban namegafu ta 1914! Fuera paga tatun, napakaru i nesipo nga totolay.

Anni i efekto na gegerra ta tiempo tam? Sangawe paga laman ta historia nga gittana makaya na tolay nga patayan i ngamin nga kasittolena. Ari mapagimmang maski paga na organisasion ira para ta imammo, gitta na United Nations, i nakatakay ta uzzin nga kabayu.

“Nasingak-ku i tadday nga kabayu nga ngisi, anna egga i agga-takay nga nanammi ta akkilowan. Ay naginnà i kagitta na ngaral nga naggafu ta tangnga na appa ira nga matolay nga pinaratu, nga kun-na nga nakkagi, ‘Tanga-tappang nga trigu i kegatangan na taddan ta tangaggaw, anna tallu tappang gapa nga bagga i kegatangan na taddan ta tangaggaw. Ngem arian nu nga daralan i denu na olibo tuange ta binarayang!’”—Nepakannammu 6:5, 6.

Irepresenta na nakakabayu i bisin. Masingattam taw nga grabe i pakkurang na makan megafu ta i tanga-tappang (0.7 kilo) nga trigu ay tanga-denario i nginana, nga taddan ngana ta tangaggaw ta ollu siglo! (Mateo 20:2) Kunnatun gapa kangina na tallu tappang (2.1 kilo) nga bagga, nga mas mababa i klasena kumpara ta trigu. Kunnasi yatun makalanno ta dakal nga familia? Natabarangngan gafu i totolay nga mattipid maski ta kadaggaw nga kawagadda, gittana denu na olibo anna binarayang nga gagangay nga mawagda tatun nga tiempo anna kultura.

Namegafu ta 1914, masingattam kari i ebidensia nga nappakarela ngana i nakatakay ta ngisi nga kabayu? Wan! Ma-70 million i natay ta bisin ta meka-20 siglo. Segun ta tadday nga pattantia, “805 million nga totolay—tadday ta kada siam ta populasion na mundo—ay undernourished ta 2012-14.” Kagian gapa na tadday nga report: “Kada ragun, mas aru i matay ta bisin anne ta suma total na matay ta AIDS, malaria anna tuberculosis.” Maski anni i pappursigi nga pakanan i mabisin ira, tulu-tuloy lagapa i pappakarela na nakatakay ta ngisi nga kabayu.

“Nasingak-ku i kabayu nga makangila anna egga i agga-takay sa nga mangagan tu Patay, anna tunu-tunuran ni Hades. Neddan ira ta pakawayya ta pakkappa na tanga-ravvunan tu papatayad-da i totolay ta gerra, bisin, tulagan, anna maporay ira nga ayam toye ta utun na davvun.”—Nepakannammu 6:8.

Irepresenta na meka-appa nga nakakabayu i patay megafu ta tulagan anna tanakuan paga. Ta pappasa na 1914, minillion i natay ta taki nga Spanish flu. Posible nga 500 million i nattaki taw, 1 ta kada 3 nga tolay tatun nga tiempo!

Ngem gafu paga laman i Spanish flu. Ta pakkalkula na eksperto ira, ginatu nga million i natay ta tuku ta meka-20 siglo. Ta tiempo tam, aru i matay megafu ta AIDS, tuberculosis, anna malaria, maski nu napprogreso i pakannammu ta medisina.

Parehu lagapa nga patay i resulta—maski nu megafu ta gerra, bisin, onu tulagan. Ari magimmang nga magapit i Hades tu biktima ira, anna awan tu iyawana nga iddanama.

Aranni ngana mangultimo i marake nga mesissimmu ta maddaggun. Nonopan yaw: ‘Minay nga nakiggerra’ si Jesus turi 1914, nitabbona si Satanas ta davvun, ngem arianna paga nabalin i pamatuluna. (Nepakannammu 6:2; 12:9, 12) Sonu Armagedon, alsan ni Jesus i influwensia ni Satanas anna daralanna i totolay nga massussuporta ta Diablo. (Nepakannammu 20:1-3) Ari laman tu pagimmangan ni Jesus i pappakarela na tallu nga nakakabayu ngem itolina paga ta makasta i marake nga efekto na pappakarelada. Kunnasi? Innattam i nipromesa ira na Biblia.

Imbes tu gerra, imammo i mammaguray. “Pagimmangan [ni Jehova] i gerra ta tanga-ravvunan; i pana anna pika ira ay en-na kata-kattuan.” (Salmo 46:9) Nu meyannung ta minaggiddu ta imammo nga totolay, “mattolay ira ta imammo nga mannanayun.”—Salmo 37:11.

Imbes tu bisin, egga abundansia nga makan. “Aru paray i magatab ta koman ira; matakkabban paray i kavukiran ta mula-mula.”—Salmo 72:16.

Imbes tu tulagan anna patay, perfekto nga gawa-gawayyan anna mannanayun nga inango ta ngamin. “Funatan na [Dios] ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki.”—Nepakannammu 21:4.

Turi ta nattolay si Jesus ta davvun, nipasinganna nu kunnasi noka i paddia-paddian durante ta pammagurena. Nipolluna i imammo, milagro nga pinakan i rinivu, pinammapia i mataki, anna namaginnolay paga.—Mateo 12:15; 14:19-21; 26:52; Juan 11:43, 44.

Magayaya i Saksi ira ni Jehova nga ipasingan ta Bibliam nu kunnasi ka nga mabbalin tu preparadu sonu magimmang ngana i pappakarela na nakakabayu ira. Alawatammu kari i imbitasion tapenu mammuan i aru paga?