Ikaya ni Jehova nga Dios nga mannammuan na ngamin nga totolay i meyannung ta nisa anna i nelangitan nga Pappatulan na. (1 Timoteo 2:3, 4) Megafu tatun, mamadday i Saksi ira ni Jehova tu Biblia anna publikasion ira nga nebase ta Biblia nga para ta aru nga totolay, nelagum i umal ira. Kakurugan na, nakapadday ngana i organisasiottam tu rinivu nga sign-language video a nga available ta maturu tu 100 nga sign language! Kunnasi nga mapappadday anna metaneg danatun ira nga publikasion? Anni ira nga improvement i kiningngua tam ta pappasa na tiempo?

 Pappaddayan na translation team ira ta interu mundo i publikasion ira ta sign language. Gigiammuan tu mapia na miembro ira na kada team i publikasion nga i-translate da. Tapus, paddesisionadda nu kunnasi i kakastan nga pangi-translate tatun ta sign language. Kabalin na, i-record da yatun ta video. Ta maddaggun, 60 nga team i regular nga mangi-translate tu nebase-Biblia ira nga publikasion ta sign language, tapus 40 gapa nga team i sinaggi-mittan nga mangi-translate.

 Mangini-ngina bi dati i mamadday tu video ira ta sign language. Mas mangina garay tagga i video camera anna karuan paga nga equipment. Me-record gapa i video ira ta studio ira nga sittam lapa i namadday. Nu mittan, mapadday i studio gukaban na par-renovate ta tadday nga fasilidad. Bali maturu tu ₱1.5 million ($30,000) b i magastu para ta set-up na tadday nga sign-language translation team.

 Tapenu meyusa ta kapianan i nedona ira nga fundu, nikaguman na organisasiottam nga i-improve anna mapasimple i proseso na pangi-translate. Mangusu-usa ittam ngana tu moderno ira nga equipment nga ari kuruga mangina ngem makasta lapa i kalidad na. Imbes tu ta studio nga mar-record i translation team ira, awayya da i mangi-set up ta office da tu green background nga magalan tu green screen tapenu tari ngana ira nga mar-record tu video. Nu aru nga signer i mawag para ta tadday nga publikasion, awayya da ngana lapa nga irecord i parte da ta office onu ta balay da; ari da ngana nga mawag i umay ta studio.

 Namadday ittam gapa tu software nga makaduffun ta signer ira ta trabahu da. Megafu tatun, mas paspas ngana nga makapadday i translation team ira tu publikasion ta sign language. Ipappabalo danatun na wawwaragi tam ira. Kinagi na brother nga si Alexander: “Mas aru ngana sangawe i video ira ta sign language. Fermi i aya ku tatun. Girawakku danatun ta kada aggaw.”

 Sangawe, ari nga massobra ta ₱280,000 ($5,000) i magastu para ta set-up na tadday nga translation team. Megafu tatun, mas aru ngana nga video ta sign language i mapadday tam ta mas aru paga nga lengguahe.

 Nu na-record ngana na team i tadday nga publikasion ta sign language, mawag nga mabbalin tu available yatun turi ira ta makawag tatun. Dati bi, mangi-release ittam tu videocassette anna DVD ngem mangina, matrabahu, anna magawag tu aru nga oras danatun. Mappapadday ittam gapa tu aru nga kopia na recording ta tadday nga kumpania. Tapus, mepatulug i videocassette anna DVD ira ta kongregasion ira. Ta 2013 laman, maturu tu ₱100 million ($2,000,000) i nagastu tam ta pap-produce tu DVD ta sign language.

 Ipappabalo danatun na umal ira. Ngem egga gapa i ziga na pangusa tatun, mas ngana ta umara-aru i cassette onu DVD. Nu karuan, aru nga DVD i meyusa ta pangi-record ta tadday nga libru na Biblia. Kinagi ni Brother Gilnei nga taga-Brazil: “Kada mabbibbig kami tu teksto, alegammi nu sitaw yatun ta videocassette ira. Kitezziga.” Kinagi ni Sister Rafayane nga dati bi nga mangusu-usa tu DVD ta sign language: “Kabbannag i map-personal study. Mofu i oras mi ta pagaleg laman tu teksto onu reference.” Nu mallayyagayya gapa i wawwaragi tam, ivulu da i DVD onu videocassette ira tapus i-play da yatun ta TV na interesadu. Ivulu paga lagu na karuan nga wagi i DVD player da. Ngem ari nga nabbayag, nabbaling tu available i portable DVD player ira nga konsu screen. Aru nga wawwaragi tam i nangusa tu kunnatun. Kinagi ni Bobby nga maddian ta United States: “Kabalimmu nga ni-share i tadday nga teksto tapus egga mana i i-share mu, mawag paga nga talianammu i DVD. Makofu yatun tu oras anna gitta na kitezziga lallagu nga usan i Biblia ta pakibbida.”

 Ta 2013, ni-release na organisasiottam i JW Library Sign Language app nu sitaw nga ma-download anna magiraw na wawwaragi tam i video ira ta sign language ta cellphone onu tablet da. Ollu nga na-release i app para ta American Sign Language. Tapus ta 2017, na-update i app tapenu meyusa na ngamin nga sign language. Magaya-ayayya i wawwaragi tam ira ta interu mundo. Kinagi ni Brother Juscelino nga taga-Brazil: “Kakku makapangurug! Agga-nono ku i pangaya na Manangngal nga Baggi ta nikami nga umal anna i aya da nga mammanakam kami ta espiritual kagitta lapa nuri na totolay ira nga makabida. Fermi ka-excited ku. Mas kakayà ku ngana nga gigiammuan i Biblia megafu ta app.”

 Ta maddaggun, ta digital ngana nga me-produce i video ira ta sign language anna me-release danatun ta website tam anna ta JW Library Sign Language app. Megafu tatun, me-translate, me-record, anna me-release i publikasion ira ta sign language ta piga laman nga aggaw, imbes tu ta piga nga vulan onu dagun. Kakurugan na, megiddang ngana ta karuan paga nga lengguahe i ke-release na publikasion ira ta aru nga sign language.

 Ammuattam i komento na karuan nga wagi tam nga umal. Kinagi na sister nga si Klízia: “Anni kari nga organisasion i kuruga magimporta ta umal ira yayya nga kunnaw kasimple mi nga malalawa i espiritual ira nga makan nga maggafu nira? Awan tu kagitta na organisasion ni Jehova nu meyannung ta kukukuadda para ta nikami.” Kunni Vladimir: “Napakurug ku ta video ira nga parehas nga iddukan ni Jehova danuri umal anna danuri makabida.”

 Kunnaw i nakapay ta video tam ira ta sign language: “Yaw nga publikasion ay parte na pangituddu tu Biblia ta interu mundo nga masussuportan gukaban na boluntariu ira nga donasion.” Mabbalo tu aru ta donasion nu ira. Aru tatun i nedona gukaban na donate.pr418.com. Meyusa i donasion nu ira ta pamadday tu Biblia anna nebase-Biblia ira nga publikasion nga para ta ngamin nga totolay, nelavu danuri mangusa tu sign language.