Mas aru ngana sangawe i malalawa na Saksi ira ni Jehova tu digital ira nga publikasion anna video nga nebase ta Biblia. Ngem ta aru nga lugar ta interu mundo, ari nga makaya na wawwaragi ira nga mapeggan tu Internet access gafu ta mangina. Maddian gapa i karuan ta lugar nga magimma-immang i Internet, makafi, onu awan vuluvuga tu Internet.

 Ngem sangawe, aru ngana nga wawwaragi tam i maka-download tu digital ira nga publikasion maski awan tu Internet! Kunnasi?

 Neddan i kongregasion ira nga marigatan nga maka-access tu Internet tu JW Box. Baddi laman yaw nga device nga egga i router na nga nagatang ta tadday nga kumpania, software nga pinadday na Computer Department ta Bethel, anna digital ira nga publikasion anna video nga available ta jw.org. Maggi $75 U.S. i kada box.

 Ta Kingdom Hall, i-connect na wawwaragi ira i gadyet da ta wifi na JW Box tapenu makapad-download ira tu publikasion anna video ira. Maka-connect taw maski i dana onu mappo ira nga gadyet. Ngem kunnasi nga ma-update i JW Box nu awan mabba tu Internet na kongregasion? Kanayun nga mangipatulug i branch tu USB nga mabbalor tu $4 U.S. i kada tadday. Napayyan yaw tu bagu ira nga publikasion anna video ta jw.org anna mesaksak ta JW Box.

 Kunnasi nga naduffunan na JW Box i wawwaragi tam ira? Inistoria ni Nathan Adruandra, yama nga maddian ta Democratic Republic of Congo: “Mamippigà nga pinurueban nga i-download i drama nga ‘O Jehova, . . . sa Iyo Ako Naglalagak ng Aking Tiwala’ anna i Daddammannu i Atawa ni Lot. Ngem kakku maka-download yayya nga nadismaya ngà. Ngem ma-download ku ngana sangawe danaw ta cellphone ku. Nakaduffun ta nikami yaw nga magana tapenu mas matudduammi i ána mi.”

 Kinagi na tadday nga brother nga manguffun nga mangi-set up tu JW Box ta kongregasion ira ta Nigeria: “Kagian na wawwaragi ira nga espesial nga regalu ni Jehova i JW Box. Masaya-saya ira ta alistuda ngana laman nga ma-download i publikasion anna video ira ta Teaching Toolbox.”

 Maturu tu 1,700 nga JW Box i nepatulug ngana ta wawwaragi ira ta Africa, Oceania, anna South America. Nakaplano ngana gapa nga mepatulug yaw ta mas aru paga nga kongregasion. Nangapattam ta pinappaga tam taw? Ta donasion ira ta interu mundo nga trabahu. Aru tatun i nedona gukaban na donate.pr418.com. Mabbalo ta kinavuka-palagnu.