Kakayà nga usan na Manangngal nga Baggi i donasiottam ira tapenu mapeggan ittam tu fasilidad ira nga makoffun ta nittam nga ituppal i trabahu nga pallayyagayya na Pappatulan. Angngarigan na, ta 2023 dagun serbisiu, naggastu i kumpania ira nga usu-usan na branch office ira na Saksi ira ni Jehova tu maturu tu ₱28 billion (500 million dollars) ta paggatang, pamataddag, par-renovate, anna pammentena tu Kingdom Hall anna Assembly Hall ira ta interu mundo. a Meyammung paga tatun i nagastu na kongregasion ira ta interu mundo ta pammentena da ta Kingdom Hall da ira.

 Meyusu-usa gapa i donasion ira ta pamataddag anna pammentena ta fasilidad ira na branch nga makoffun ta pangorganisa anna passuporta ta trabahu nga pallayyagayya ta interu mundo. Pinasimple tam i trabahu ta branch ira tapenu meyusa tam i donasion ira ta pamataddag anna pammentena tu Kingdom Hall anna Assembly Hall ira. Ngem dakal paga nga fundu i kawagan ta pappakapia, par-renovate, anna pangiyali tu fasilidad ira na branch. Ngatta importante danatun ira nga proyekto? Kunnasi nga suportan na branch ira i importante nga trabahu nga pallayyagayya? Ammuattam.

 Aru nga fasilidad ira na branch i maturu tu 30 onu 40 nga dagun ngana! Kinagi ni Nicholas na Worldwide Design/Construction Department: “Maski namentena tu mapia i fasilidad, maddana anna madaral yatun ta pappasa na tiempo. Nu mar-renovate ittam tu fasilidad, makoffun yatun tapenu mabbayag anna tulu-tuloy paga yatun nga meyusa.”

 Mawag gapa nga mebagay i fasilidad ira na bethel segun ta panguloli ta pakawagan na organisasion. Ta interu mundo, mas minaru i bilang na publisher ira turi ta aru nga branch office i nepataddag. Tapenu masuportan yaw, kawagan i mas aru nga volunteer nga mattrabahu taw ira nga branch office. Megafu tatun, ari ngana nga makalanno i fasilidad na bethel ta karu na mav-volunteer ira!

 Importante gapa i safety. Megafu ta mattotolay ittam ngana ta pangurianan ira nga aggaw, meparubang ittam ta aru nga natural ira nga kalamidad nga mamappeligro ta inango tam. (Lucas 21:11) Nu usattam i bagu ira nga construction technique ta par-renovate, mabbaling tu safe i fasilidad ira para ta matrabahu tatun. Makoffun gapa danaw ira nga par-renovate tapenu mas meyusa i fasilidad ira ta pangorganisa ta pangiyawa tu relief anna ta tulu-tuloy nga passuporta ta trabahu ta teritoria kabalin na natural nga kalamidad.

 Ta pangigiya na Manangngal nga Baggi, egga ira i construction nga nakua ta 43 nga fasilidad na branch ta 2023 dagun serbisiu. Kebalinan natun nga maggi gaddua na fasilidad na bethel ta interu mundo i maddagun i construction na. Innattam i karuan nga angngarigan nu ngatta ta importante yatun ira nga trabahu.

 Angola. Kinagi ni Matt nga miembro na Angola Branch Committee: “Pribilehio tam nga masingan i espesial nga ketuppal na profesiya ta Hageo 2:7. Ta unag laman na mafulu ragun, minaru tu 60 percent i bilang na publisher ira. Tapenu masuportan i publisher ira, kawagan nga mat-triple i bilang na familia na Bethel. Ngem baddi i fasilidad na Bethel, yari tu limitadu laman i bilang na maimbitan nga mav-volunteer. Megafu tatun, aru nga trabahu i kuan na Bethelite ira anna kanayun ira nga ma-overtime.”

 Egga ira i wawwaragi nga ne-asayn tapenu gigiammuan nu kunnasi nga mapadakal i fasilidad na branch. I par-renovate ta dati nga fasilidad na branch i ollu nga nanono da nga mabi anna praktikal nga solusion. Ngem kabalin na aru nga par-research, nanono da nga ari tu i par-renovate i kapianan nga pangusan ta donasion ira. Lallagu, nirekomenda da i paggatang anna i par-renovate ta building aranni ta nira. “Turi ta nepresenta ta Branch Committee i paggatang anna par-renovate ta building, mavurukkami nga ari yatun kagitta na fasilidad nga nipataddag tam,“ kinagi ni Matt. “Ngem nasingammi ta resulta natun nga sassakto yatun ta kawagattam. Binendisionan ni Jehova yatun nga desision.”

 Awayya na nga ta mappange aru paga nga fasilidad i kawagan ta Angola branch. Ngem megafu ta bagu nga building, modular housing ta bethel anna na-rent ira nga apartment ta lawan na Bethel, egga i makalanno nga fasilidad nga meyusa tapenu tulu-tuloy nga suportan i dumaka-dakal nga trabahu ta teritoria.

 Japan. Ma-40 dagun ngana nga nepataddag i ollollu nga fasilidad ira na branch, ngem ari paga vuluvuga yatun nga na-renovate. Aru ngana nga pammentena i nakua taw, ngem maski anni paga i pangikaguman na wawwaragi, talaga dadana ngana i fasilidad. Megafu taw, maddaggun i major renovation tatun.

 Ta aru nga dagun, nanguli i neyugalian nga pattolay ta Bethel. Nige na 2015, meprepara i ngamin nga makan para ta familia na Bethel. Yayya nga nadisenio i kuarto ira nga paddianan ta Bethel ta Japan nga egga i baddi nga “kusina” na. Sangawe, iprepara ngana lagapa na Bethelite ira i sarili da nga kanan. Megafu ta renovation, mas nga nakkasta anna ziminakal i kusina ta kuarto ira ta Bethel tapenu mas mabi para ta Bethelite ira i mallutu tu kanadda. Kinagi ni Sister Kumiko nga masserbi ta Japan branch, “Gittà i egga ta balay megafu ta egga i kusina, anna noffunannà yatun nga kanayukku nga suportan i bagu ira nga unnug ta Bethel.”

 Importante nga parte na interu mundo nga trabahu i nakua ta Japan branch. (Mateo 28:19, 20) Tadday i Japan ta dua nga branch nga mangiyemprinta ta kumpleto nga Biblia. Yari tu tadday ta kingngua da turi ta maddaggun i construction project, nangi-install ira tu trimming and dust collection system para ta safety na mattrabahu ira ta Printery. Maturu tu ₱56 million (maggi one million dollars) i nagastu ta paggatang anna pangi-install tatun nga system tapenu tulu-tuloy lagapa i trabahu na branch ta pangiyemprinta anna pangipatulug tu publikasion ira.

 Siniguradu na wawwaragi ira nga maski nu maddaggun i construction, mattulu-tuloy lagapa i pangiyemprinta ta Biblia. Kinagi ni Trey nga miembro na Japan Branch Committee: “Turi ta maddagun i construction, aru nga Bible translation i ni-release na organisasiottam anna mas nga minatannang i pakawagan tu Biblia ta interu mundo. Mawag nga madduruffun i madduruma nga department anna contractor ira tapenu meyiskediul i pangi-install ta bagu nga equipment anna nu kanni ittam nga maka-imprenta tu publikasion ira.” Maski nu aru nga trabahu i nakua tatun, ma-220,000 lagapa nga Biblia i neyemprinta ta vulan na Marso anna Agosto 2023—nu kanni nga kadakallan nga constrution project i nakua ta Printery. Nabalin ngamin yaw nga trabahu nga awan tu dakal nga nagastu.

 I pattipid ta kuryente i tadday ta importante nga goal na proyekto nga par-renovate. Egga i bagu nga solar panel ira nga me-install nga makoffun tapenu makatipid tu maturu tu ₱6 million ($120,000) ta kuryente ta kada ragun. Mangi-install gapa ira tu benta nga triple-glazed nga makoffun tapenu mapakarianan i pangusa ta kuryente anna makatipid tu maturu tu ₱560,000 ($10,000) kada ragun. Maski paga nu maggastu ira tu dakal ta par-renovate, megafu tatun nga ne-install nga panel anna benta ira makatipid lagapa ira tu maturu tu ₱190 million (3.5 million dollars) ta tiempo nga meyusa yatun. Mapakarianan gapa i marake nga efekto na fasilidad ta pallevu.

 Ipasingan naw nga dua nga proyekto na branch i karu na trabahu nga kawagan tapenu masiguradu nga masuportan na fasilidad ira na Bethel i pakawagan ta teritoria. Ngem ari paga nabaling i trabahu. Kinagi ni Aaron na Worldwide Design/Construction Department, “Aru ngana i netuppal, ngem aru paga i mawag nga makua.” Kunnasi nga metuppal yaw nga trabahu? Kinagi na paga: “Fuera ta donasion nga meyusa taw ira nga proyekto, appresiammi gapa i sigga-paran nga nabboluntariu ira anna turi ira ta nagangngua tu panguli tapenu makapabboluntariu ira ta mappange. I finansial nga suporta anna pabboluntariu na wawwaragi tam ay mangipasingan ta bendision ni Jehova.”​—Salmo 110:3.

 Masuportan i ngamin nga construction anna par-renovate nga trabahu na boluntariu nga donasion, aru tatun i nedona gukaban na donate.pr418.com. Mabbalo ta tulu-tuloy nga kinavuka-palag nu.