Ta 2021 dagun serbisiu, a ari lapa nga nabaling i COVID-19 pandemic ta interu mundo. Kagitta na nakagi ta artikulo nga “Pangiyawa tu Relief Megafu ta Pandemic ta Interu Mundo,” nangusa ittam tu minillion nga dolyar b para ta relief megafu ta pandemic anna nabbuu ittam tu maturu tu 950 nga Disaster Relief Committee.

 Fuera paga ta pandemic, afektadu gapa na kalamidad anna na karuan paga nga mariga nga situasion i wawwaragi tam ta interu mundo. Megafu ta maturu tu 200 nga kalamidad, inapruban na Coordinators’ Committee na Manangngal nga Baggi nga mangusa ittam tu maturu tu ₱400 million ($8 million) fuera paga ta relief nga meyusa para ta COVID-19. Innattam nu kunnasi nga neyusa i donasion nu ira ta panguffun ta biktima ira na dua ta nikanni laman nga kalamidad.

 Ta Mayo 22, 2021, simmabug i Vukig Nyiragongo, tadday nga volcano ta Democratic Republic of the Congo. Zinaral na lava i babalay, eskuela ira, anna paggafuan na danum. Ngem ari laman tu lava i delikadu. Ta unag na piga nga aggaw kabalin na passabug, nawwara ta siudad na Goma i kappatay nga avu nga maggafu ta volcano. Aru paga nga makafi nga lunig i nesimmu. Maturu tu gaddua na residente na siudad i nagevacuate. Ginatu nga rivu i nattammang, nakadde paga lagu i karuan ta Rwanda.

 Kavulu ta nagevacuate i 5,000 nga Saksi ni Jehova. Nadaral i balay na karuan ta nira megafu ta passabug; nakokotan gapa i balay na karuan ta panaw da. Nadduffun i relief committee ta Rwanda anna ta Democratic Republic of the Congo ta pangiyawa tu relief. Nireport na Congo (Kinshasa) branch meyannung ta tadday nga relief committee: “Maski paga magulu i situasion ta lugar anna nige paga na evacuation, nangitaneg ngana i committee tu makan, danum, pagiddan, anna sinnun.” Ta tadday nga ili nu sitaw nga navvurulu i maturu tu 2,000 nga wawwaragi tam, nangipataddag i relief committee tu tent ira, nangiyawa ira tu mask, anna niyesplika da nu kunnasi da malillitan i COVID-19 anna cholera.

 Ta unag na tallu nga vulan, nangitaneg i wawwaragi tam tu maturu tu annam nga tonelada na bagga, annam nga tonelada na arina, maturu tu 8,000 nga litro na manteka, anna maturu tu 8,000 nga litro na danum. Tapenu makamenos, giminatang i branch tu bultuhan ta mismu nga lugar imbes tu gumatang tu mas mangina nga makan ta tanakuan nga nasion.

 “Nakkafi i nono mi anna nalungkut kami,” kagian na tadday nga sister nga nadaral i bagu nga balay da ta passabug na bulkan. Ngem nakalawa i familia da tu uffun ta material anna espiritual. Kinagi na: “Ta duffun ni Jehova, ari kami nga nakkurang ta pakawagammi. Nasingammi mismu nga zinuffunan nakami ni Jehova ta problema mi tapenu maattammammi yatun.”

 Ta aru ngana nga dagun, kakkallo i Venezuela ta problema da ta ekonomia. Mariga i pattolay na wawwaragi tam tari, makkukurang ira ta makan, anna napakaru i krimen. Ngem ari ira nga pinagurayan na organisasion ni Jehova.

 Ta nappasa nga dagun serbisiu, maturu tu ₱75 million ($1.5 million) i nagastu ta paggatang anna pangitulug tu makan anna savun para ta makawag ira nga familia. Nireport na Venezuela branch: “Mariga nga ibiahe i 130 nga tonelada na makan ta interu nga nasion ta kada vulan tapenu metaneg ta wawwaragi nga makawag.” Tapenu ari tu madaral i makan, mangipata-patulug i wawwaragi tu makan ira nga ari insigida nga magexpire. Kinagi paga na branch: “Gumatang kami tu bultuhan anna ta tiempo na tapenu mas mappo i presio. Ipatulug mi yatun depende nu sitaw kami nga makamenos.”

 Kakayà ni Leonel nga miembro na Disaster Relief Committee ta Venezuela i asayment na. “Espesial i relief work,” kunna. “Yaw nga pribilehio i namasikan ta niakan namegafu ta patay ni bako ku ta COVID-19. Nabbaling ngà tu busy anna natageno ku nga makaduffun ngà ta wawwaragi nga makawag. Nasingakku mismu nga tuttuppalan ni Jehova i promesa na nga ari na pagurayan i totolena.”

 Dati nga miembro na relief committee i tadday nga brother nga nakalawa tu relief. “So gapa i magawag tu uffun sangawe,” kunna. “Ari dakami laman zinuffunan ta material. Zinuffunan nakami gapa na wawwaragi nga mabbalin tu kalmadu ni bako ku. Sinangngaw dakami, binanna-bannayaddakami, anna pinasikaddakami.”

 Gavva-gavva onu ari tam nga inekspekta i karuan nga kalamidad. Ngem megafu ta donasion nu ta interu mundo nga trabahu, insigida nga makala anna makepatulug tu relief i organisasion ni Jehova. Egga ta donate.pr418.com i karuan nga metodo ta paddona. Mappappabalo kami ta kinavuka-palag nu.