Neprofesiya ta Biblia nga mesimmu ta kaggawattam sangawe i gerra ira, lunig ira, epidemia ira, anna karuan paga nga kappaganassing onu “kanninipang” nga gannug. (Lucas 21:10, 11) Nasingattam ta 2022 nga dagun serbisiu a nga matuttuppal yatun. Angngarigan na, ari paga nga nabala-baling i gerra ta Ukraine anna minillion ngana nga totolay i afektadu. Aru paga ta interu mundo i afektadu ta COVID-19 pandemic. Fuera paga tatun, kakkaru i afektadu ta mesissimmu ira nga kalamidad, kagitta na lunig ira ta Haiti anna masisikan nga bagiu ta Central America, Pilipinas, anna southeastern Africa. Kunnasi nga dudduffunan na Saksi ira ni Jehova danuri afektadu ira?

 Ta 2022 dagun serbisiu, nangiyawa tu relief i organisasiottam ta afektadu ira ta 200 nga kalamidad! Maturu tu ₱650 million (mammaggi $12 million) i ngangamin nga nagastu tam para ta relief. b Innattam nu kunnasi nga neyusa i donasion ira ta panguffun ta nafektan ira ta dua nga kalamidad.

 Tagga ta Agosto 14, 2021, nallunig tu magnitude 7.2 ta southern Haiti. Kaddaraddam ta tallu nga Saksi i natay—dua nga sister anna tadday nga brother. Narigi-rigatan ta pisikal anna emosional danuri nakaligtas ta lunig. Istorian ni Brother Stephane: “Kakkaru i natay ta interu nga siudad. Ta maturu tu dua nga vulan, piga ira nga totolay i metanam kada ligguan.” Kagian na tadday paga nga brother nga si Éliézer: “Aru nga Saksi i awan tu paddianadda, sinnun, sapatu, anna karuan paga nga pakawagadda. Aru nga totolay i magana-ganassing ta piga nga vulan gafu ta kana-kanayun i aftershock.”

 Insigida nga nanuffun i organisasiottam. Nangiyawa i Haiti branch tu maturu tu 53 nga tonelada na makan fuera paga ta tent, tolda, pagiddan, anna solar charger ira para ta cellphone. Maturu gapa tu 100 nga babalay i nepataddag onu napakappian ta 2022 dagun serbisiu. Maturu tu ₱55 million ($1 million) i neyusa tam para ta relief.

 Fermi i pappabalo na wawwaragi tam. Kinagi ni Lorette: “Zinaral na lunig i balay mi anna i negosio mi. Awan vuluvuga tu kanammi. Ngem ari nakami nga pinagurayan na organisasion ni Jehova. Niyawa da i ngamin nga kawagammi.” Kinagi ni Micheline: “Zinaral na lunig i paddianammi na dua nga ana ku nga lalaki. Kakku ammu i kuakku ngem nakimallo ngà. Sinabbag ni Jehova i pakimallo ku gukaban na organisasion na. Pinataddagaddakami tu maladda nga balay nga paddianammi. Kuakku i ngangamin tapenu mepasingakku i pappabalo ku kani Jehova.”

 Naobserba na ofisiales ira na gobiernu i kukukuattam nga pangiyawa tu relief. Kinagi na director na city hall na L’Asile: “Appresiakku i paspas nga pinanuffun nu. Komendattakamu ta daka-dakal i respeto nu ta gobiernu. Magayayya ngà ta ari kamu nga magikkuartu. I kayà nu laman, manuffun ta totolay. Gafu yatun ta aya nu.”

 Turi ta Enero 24, 2022, nal-landfall ta Mozambique i bagiu nga Ana nage na nga nappa-Malawi. Gafu ta bagiu, masiki-sikan i urang anna i paddag—magadde ta 100 nga kilometro kada oras. Zinaral natun i linia ira na kuryente anna i tetay ira, anna ziminakal i danum.

 Maturu tu 30,000 nga Saksi ta Malawi anna Mozambique i nafektan tatun nga bagiu. Kinagi ni Brother Charles nga nanuffun ta pangiyawa tu relief: “Ta pakasingakku ta pazziga-riga na wawwaragi anna i karu na nawawan ta nira, mataka-taki yatun anna gitta na awan tu awa-awayyà.” I dake na paga, nekala-kavvu i balabaddi nga abasto da anna nadaral paga i mulu-mula da. Aru i nadaral i balay da. Kakkallo i tadday nga brother tam ta natay si bako na anna i dua nga ana da nga babay ta nalaggabban ira turi ta nabbalittag i rescue boat nga nattakayadda.

 Kappaganassing i bagiu. Ala-una na umma ta Nchalo, Malawi, naginna na familia Sengeredo i pavvanomvor na umaga-agi nga danum. Ziminakal i dua nga bannag! Naddesision si Brother Sengeredo nga panawadda ngana i balay da. Pia ngana laman ta nanaw ira. Ari gare nga nabbayag, nadabba i balay da gafu ta paddakal na danum. Nakkadaral onu nepagipanug i gamit da ira. Minay i familia da ta Kingdom Hall. Gagangay ngana nga 30 minuto laman yatun nga lakaradda. Ngem sangawe, dua oras ira nga liminakag. Ta dattal da, nabasa-basa anna nababbannag ira ngem safe ngana ira.

 Insigida nga nangiyawa tu relief i branch ta Malawi anna ta Mozambique. Nangiyawa ira tu direksion ta manangngal ira ta sirkito anna ta elder ira nga ammuadda i pakawagan na nafektan ira nga wawwaragi anna pasikannadda ira. Egga ira i nabuu nga Disaster Relief Committee (DRC) tapenu mangirollu ta pangiyawa tu relief. Insigida da nga zinuffunan i wawwaragi tapenu meddan ira tu makan anna karuan paga nga pakawagan. Maturu tu ₱1.8 million ($33,000) i neyusa ta panuffun ta totolay anna maturu tu ₱16.5 million ($300,000) ta pappakapia anna pamataddag tu babalay.

 Binadyet tu mapia na DRC ira i fundu, mas ngana ta nangngina i magatang ira. Angngarigan na, ta ollu nga pitu nga vulan na relief, nangngina tu 70 percent i presio na arina (maize flour)—primeru nga makan ta Malawi. Nangngina gapa i gasolina. Tapenu makamenos, giminatang ngana laman i wawwaragi tu makan anna materiales ta mismu nga lugar da anna giminatang ira tu bultuhan. Nakarigacha ngana lagu ira, nakamenos paga ira ta gastu ta pangibiahe.

 Natukkal i futu na wawwaragi tam gafu ta uffun nga nalawa da. Kinagi ni Brother Felisberto nga taga-Mozambique: “Yaw paga laman i nasingakku nga organisasion nga napakaru nga uffun i niyawa na: materiales, pattakayan, boluntariu ira ta konstruksion, makan, anna pangigiya. Makakkasta yatun nga pamakurug ta pakka-aya-aya na wawwaragi nga kinagi ni Jesus ta Juan 13:34, 35.” Nadaral gapa i balay na balu nga si Ester nga taga-Malawi. Kinagi na: “Makkonsumision ngà ta awan tu kuakkuartù nga mamataddag tu bagu nga balay. Ngem turi ta nipataddagaddà na wawwaragi tu balay, gitta na egga ngà ngana ta Paraiso.”

 Sangawe ta araranni ngana i nepromesa nga Paraiso, ekspektattam i mas aru paga nga kalamidad. (Mateo 24:7, 8) Ngem maski nu kunna, sigga-komfiansa kami nga makalawa tu uffun i ili ni Jehova megafu ta donasion nu ira. Neyesplika ta donate.pr418.com nu kunnasi i maddona. Mabbalo ta kinavuka-palag nu.