Neprofesiya ta Biblia nga “maggegerra noka i nasa-nasion” anna egga noka i kalamidad ta “panuppalan na sistema na ganna-gannug.” (Mateo 24:3, 7, NW ) Nasingattam nu kunnasi nga natuppal danaw nga profesiya ta 2023 dagun serbisiu. a Ngem maski nu egga i gerra anna natural nga kalamidad ira ta maggi 100 nga nasion, pinarigan lagapa na Saksi ira i aya ni Jehova. Kunnasi?

 Ta 2023 dagun serbisiu, nafektan na maturu tu 200 nga natural nga kalamidad onu na marake nga efekto na kukukuan na totolay i wawwaragi tam. Naggastu i legal ira nga korporasion nga usu-usan na Saksi ira ni Jehova tu maturu tu ₱55,000,000 ($10,000,000) b nga naggafu ta fundu nga nedona ta worldwide work para ta disaster relief. Meyammung paga tatun i personal nga nagastu na wawwaragi nga nabboluntariu ta lugar nga aranni nira. Ammuan nu kunnasi nga neyusa i donasiommu ta panuffun ta wawwaragi ira nga nafektan na dua ta aru nga kalamidad.

 Kanayun nga mabaha i karuan nga lugar ta Nigeria. Ngem i pabbaha tatun nga nasion ta Oktubre 2022, i pinaka-grabe nga naekspiriensa da ta unag na mafulu ragun. Nadaral i maturu tu 676,000 nga ektaria na koman anna nanaw i maturu tu 2 million nga totolay ta babalay da. Insigida nga nangiyunnug i branch na Nigeria tu Disaster Relief Committee ira tapenu mangorganisa ta pangiyawa tu relief anna pakawagan na wawwaragi ta espiritual.

•   7,505 nga wawwaragi i nanaw ta balay da

•   860 nga babalay i nadaral

•   90 nga Kingdom Hall anna tadday nga Assembly Hall i nabaha

 Maturu tu ₱13,000,000 ($250,000) i nagastu ta disaster relief, nelavu tatun i:

•   Makan ira kagitta na bagga, vuku-vukal, anna noodles

•   Gamit ira ta balay kagitta na pagiddan anna muskateru

•   Pappakapia onu pamataddag ta nadaral ira nga babalay

 Kunnasi nga siniguradu na wawwaragi tam nga meyusa ta kapianan i donasion ira? I tadday nga kingngua da, iningadda tu mapia nu mawayya kari paga nga mapakappian i kada balay. Nu ari ngana yatun nga mapakappian, mangipataddag ira tu balay nga simple i disenio na anna gagangay ta lugar da.

 Magayayya i wawwaragi tam megafu ta uffun nga nalawa da. Kinagi na tadday nga sister: “Megafu ta baha, nadaral i komammi anna balay mi. Ngem nabannayan kami turi ta minay i wawwaragi ta mismu nga aggaw na baha tapenu uffunan kami anna makaleg kami tu safe nga paddianan. Magayayya kami gapa turi ta nalawa mi i makan ira nga naggafu ta branch office. Nasingammi mismu i ketuppal na Juan 13:34, 35. . . . Natageno mi i kurug nga aya. Napafutuan nga mappabalo kami na familià ta wawwaragi ira nga nanguffun ta tiempo nga kawagammi yatun.”

 Naobserba gapa na tanakuan i trabahu tam nga panuffun. Kinagi na lider na Sabagreia, Bayelsa State: “Kakkaru i organisasion onu relihion ta interu mundo, ngem i Saksi ira ni Jehova laman i nakakua tu kunnaw. . . . I organisasion [nu] i tadday ta kapianan ta mundo.”

 Ta Pebrero 2023, aru i zinaral na maturu tu 400 nga tuggi ta Chile. Maturu tu 430,000 nga ektaria na davvun anna importante ira nga pataddag ta Chile i nadaral. Ma-8,000 nga totolay i nagali ta tanakuan nga lugar. Insigida kabalin na tuggi, nangorganisa i branch office tu pangiyawa tu relief ta wawwaragi ira.

•   222 nga wawwaragi i nagali ta tanakuan nga lugar

•   20 nga babalay i nadaral

 Maturu tu ₱11,000,000 ($200,000) i nagastu ta disaster relief, nelavu tatun i:

•   Makan anna danum

•   Gasolina, gamit nga pappakarenu, anna medisina

•   Pappataddag ta nadaral ira nga babalay

 Napawan na tadday nga familia i ngamin nga pakkukua da, maski i balay anna i negosio da. Megafu tatun, awan ngana tu trabahuda. Ta gafu na, talaga maraddam ira nga masingan i bakante nga davvun nga dati bi nga keggan na baleda. Ngem turi ta masingadda nga nepataddag i bagu nga balay da, sisinu nga nalsa i pavvuru-vurudda. Nakoffun gapa nira i aya anna pangikavurung na boluntariu ira. Megafu taw nga ekspiriensa, napaguyu yatun nga familia nga mabboluntariu anna manguffun ta pappataddag ta balay na tadday nga wagi.

 Napagaram i aru nga wawwaragi megafu ta trabahu nga pangiyawa tu relief. Kinagi na tadday nga brother: “Talaga kappabbaw i niyunnug ni Jehova nga Disaster Relief Committee. Ta aggaw kabalin nga nesimmu i trahedia, insigida ira minay tapenu iyawa i kawagan na wawwaragi ira. Makapagaram nu mabibbig tam i meyannung ta disaster relief ta tanakuan nga lugar. Ngem mas makapagaram nu sikaw ngana mismu i makaekspiriensa. Mas nga maappresiam i organisasion; nu kunnasi nga pinarigan na wawwaragi i kualidad ira ni Jehova; anna masingan nga kakayà da nga siguraduan nga malawa mi i kawagammi ta material, espiritual, anna emosional. Naekspiriensa mi mismu i aya ni Jehova.”

 Durante nga umara-aranni i panuppalan naw nga sistema, tulu-tuloy nga makaekspiriensa ittam tu kalamidad. (Lucas 21:10, 11) Ngem makasiguradu ittam nga usu-usan na minaggiddu nga Patul tam nga si Jesu-Cristo i Cristiano nga kongregasion tapenu ipasingan nga kavulu tam yayya “adde ta panuppalan na mundo.” (Mateo 28:20) Masuportan nu i Pappatulan anna i minangngiddu nga Patul natun gukaban na paddona ta interu-mundo nga trabahu ta donate.pr418.com anna madduruma nga metodo, maski gapa i tiempo anna sikan nga iyayawa nu. Mabbalo ta kinavuka-palag nu.