Kakayà ni Jehova nga tudduan i totolena. Megafu tatun, nabbuu i organisasion na tu eskuela ira tapenu matudduan i estudiante ira ta pangituppal da ta annungadda. Tadday tatun nga eskuela i School for Kingdom Evangelizers (SKE). Ta nappasa ira nga dagun, pinakasta na organisasion na Dios i curriculum ira para ta eskuela kunne na gapa i fasilidad ira nga meyusa para tatun. Ikaya da nga mabbalin tu komfortable anna makapaffokus i estudiante anna instructor ira. Kunnasi nga makaduffun tatun i donasion nu ira?

 Ta aru nga dagun, ta Kingdom Hall anna Assembly Hall ira nga mesissimmu i teokratiko ira nga eskuela. Ngatta gafu ta nikanni laman, namataddag onu nar-renovate ittam tu fasilidad ira nga meyusa para laman ta teokratiko ira nga eskuela? Yaw i tallu nga rason:

 Mas dakal nga pakawagan. “Kinagi na branch office ira nga mawag da i mas aru nga wawwaragi nga manuffun ta trabahu,” kunni Christopher Mavor, helper na Service Committee na Manangngal nga Baggi. “Angngarigan na ta 2019, tinantia na Brazil branch nga mawag da i 7,600 nga graduate ta SKE tapenu manuffun ta teritoria na branch da.” Nireport gapa na United States branch nga kakawagadda i kualipikadu ira nga pioneer nga manuddu ta wawwaragi para ta special metropolitan public witnessing, harbor witnessing, anna prison witnessing. Kawagan gapa i wawwaragi ira nga manuffun ta Local Design/Construction Department anna ta Hospital Liaison Committee ira. Makaduffun tatun i graduate ira ta SKE.

 Mas aru nga estudiante. Ta aru nga branch, mas aru nga estudiante i nagaplay anne ta mawayya da nga akseptan. Angngarigan na ta Brazil branch, nakalawa ira tu 2,500 nga SKE application ta tanga-ragun laman. Ngem megafu ta limitadu laman i fasilidad ira nga meyusa para ta school, 950 laman nga estudiante i mawayya nga akseptan na branch.

 Mas makasta nga paddianan. Nu magiskuela i estudiante ira ta Kingdom Hall onu ta Assembly Hall, gagangay ngana nga maddian ira ta babalay na wawwaragi nga aranni tari. Posible yatun ta lugar ira nga pilippiga laman nga klase i makua kada ragun. Ngem nu aru i klase, baka marigatan ngana i wawwaragi ira nga paddianan ta baleda i estudiante ira ta aru nga vulan ta tanga-ragun. Megafu tatun, nagangngua ittam tu paddianan na estudiante ira nga aranni ta classroom da.

 I fasilidad nga konsu classroom, paddianan na instructor ira anna na 30 nga estudiante, kusina, anna karuan paga ay mabbalor tu piga nga million nga dolyar (U.S.), depende ta lokasion anna karuan paga.

 Gagangay ngana nga mepataddag i eskuela ira ta memammo nga lugar ta lawan na dakal nga siudad ngem aranni ta pattakayan. Mas pippiliadda i lugar ira nga aru i wawwaragi nga awayya na manuffun ta trabahu ira tatun anna ta pammentena ta fasilidad anna equipment ira.

 Ta fasilidad ira, egga i library, study area, computer, printer, anna karuan paga nga equipment. Maruddu nga egga i kusina nu sitaw makkaravulu nga kuman i estudiante anna instructor ira. Egga gapa i lugar ira nu sitaw awayya da i magexercise anna marrelaks.

 Nadisenio gapa tu mapia i classroom ira. “Nakkiavu kami ta Theocratic Schools Department ta disenio na classroom ira nga makaduffun ta estudiante ira ta paggigiammu da,” kunni Troy nga mattrabahu ta Worldwide Design/Construction Department ta Warwick, New York. “Niyesplika da nu kunnasi nakuan kadakal i classroom ira, i disenio na, kunne na gapa i mawag ira nga lighting anna audio-video equipment.” Meyannung ta audio equipment, kinagi ni Zoltán nga SKE instructor ta Hungary: “Ta gafu na bi, awan tu microphone mi yayya nga kagiammi ta estudiante ira nga iyassikadda i ngaral da. Ngem ari mi ngana nga probleman yatun sangawe ta egga ngana i microphone ta kada desk!”

 Anni i efekto na napakasta ira nga fasilidad ta instructor anna estudiante ira? “Memammo i pallevu,” kunni Angela nga nagatende ta SKE ta Palm Coast, Florida, U.S.A. “Nadisenio tu mapia i ngamin, kagitta na classroom mi anna kuarto mi, tapenu makapaffokus kami ta paggigiammu.” Kakayà ni Csaba nga instructor ta Hungary nga makavulu ta pakkakan i estudiante ira. Kinagi na nga nu kuman ira, “kanayun nga magistoria i estudiante ira tu ekspiriensa da ira. Megafu tatun, mas mammammu mi i estudiante ira yari tu mas efektibo i panuddu mi depende ta pakawagadda.”

 Para ta estudiante anna instructor ira, bendision na “Katannangan nga Instruktor” nga si Jehova i napakasta ira nga fasilidad. (Isaias 30:20, 21) Kinagi na sister nga taga-Pilipinas nga nagiskuela ta SKE meyannung ta fasilidad nga nakua tu eskuela: “Natageno mi taw nga ari kami laman tu basta estudiante, nu ari, espesial nga bisita ni Jehova. Ikaya na nga masaya kami ta paggigiammu mi tu mapia ta Uvovug na.”

 Megafu ta donasion nu ira, makapappataddag, makapar-renovate, anna makapammentena ittam tu fasilidad ira nga para ta eskuela. Aru ta donasion i nedona gukaban na donate.pr418.com. Mabbalo ta kinavuka-palag nu.