Kada ragun, aru nga special full-time servant ta interu mundo i maimbitan nga magiskuela ta Watchtower Bible School of Gilead nga egga ta Watchtower Educational Center ta Patterson, New York. a Taw nga eskuela, magigiammu na estudiante ira i pabbalin tu mas efektibo ta asaymentda ira ta organisasion ni Jehova. Makaduffun i netuddu ta nira tapenu mapasikan anna mapatuyagda i kongregasion anna branch ira ta interu mundo.

 Talaga internasional nga eskuela i Gilead. Angngariganna, ta meka-147 nga klase kustu 2019, egga i 56 nga estudiante nga naggafu ta 29 nga nasion. I estudiante ira nga magiskuela ta Gilead ay i massesserbi ira ta special full-time service kagitta na Bethelite, circuit overseer, missionary, onu special pioneer ira.

 Nige paga nga mamegafu i klase, aru ngana i mawag nga meprepara. Angngariganna, gumatang tu ticket na eroplano para ta magiskuela ira ta Gilead i World Headquarters Travel Department (WHQ Travel). Ta meka-147 nga klase na Gilead, i average nga pamasahe na kada estudiante pa-umay ta Patterson anna palubbe ta nasiodda ay maturu tu ₱50,000 ($1,075 U.S.). Mami-appa nga mageroplano pa-umay ta Patterson i estudiante ira nga naggafu ta Solomon Islands tapus mamittallu ta pallabbeda—bali maturu tu 35,400 nga kilometro i biniaheda! Mabbalor yatun tu maturu tu ₱100,000 ($2,300 U.S.) kada estudiante. Tapenu makamenos, mangusa i WHQ Travel tu computer program ta pangi-book tu mappo nga ticket. Maski nu na-reserve ngana i ticket, tulu-tuloy lapa nga mat-check i computer program ta piga nga ligguan onu piga nga vulan paga lagu tapenu mamonitor nu nammappo i ticket. Usan gapa na WHQ Travel i nedona ira nga airline credit anna mileage ira ta paggatang tu ticket.

 Aru nga estudiante i magawag tu visa tapenu makatallung ira ta United States. I World Headquarters Legal Department i manuffun ta nira nga makala tu student visa. Ta average, maturu tu ₱24,000 ($510 U.S.) i visa anna registration fee na kada estudiante.

 Anni i makasta nga efekto ta nittam na training nga nalawa na estudiante ira? Masserbi nga elder si Hendra Gunawan ta Southeast Asia. Kakongregasionna i magatawa nga naggradua ta Gilead. Kunna: “Dati bi, awan tu regular payunir ta kongregasiommi. Ngem ta paddattal na magatawa, nainfluwensiadda gapa i tanakuan nga mappayunir gafu ta talikaragda. Ari nabbayag, tadday nga sister ta kongregasiommi i nagiskuela paga lagu ta School for Kingdom Evangelizers!”

 Katrabahu ni Sergio Panjaitan ta Bethel ta Southeast Asia i piga nga naggradua ta Gilead. Kunna: “Ari laman tu ira i nabendisionan ta training nga nalawada, nabendisionakkami gapa. Aru i nagigiammuda! Ngem imbes tu iparayagda yatun, ibilleda i nagigiammuda. Megafu ta napasikaddakami, pasikannammi gapa i tanakuan.”

 Sitaw nga mala i fundu para taw nga eskuela? Ta donasion ira para ta interu mundo nga trabahu. Aru tatun i nedona gukaban na metodo ira ta donate.pr418.com. Mabbalo ta kinavuka-palagnu nga massuporta taw nga internasional nga eskuela.