Tadday ta ininnaggan na Saksi ira ni Jehova taw nga dagun i ke-release na Episode 1 na I Mapia nga Dumug Segun Kani Jesus. Minillion ngana i nakagiraw tatun. Yatun paga laman i ollu nga nelawan ta 18 nga episode! Anni i kingngua na wawwaragi ira tapenu mabbalin tu posible yaw nga serye na video ira, anna anni i kingnguam tapenu masuportan ira?

 Makua ta Australasia Branch i kakaruan nga eksena ira na Mapia nga Dumug, ma-50 adde ta 80 nga tolay i mabboluntariu ta kada eksena. a Egga ira i wawwaragi nga mangiyawa tu pangumma, pamugag, anna merienda ta ngamin nga boluntariu. Dati ngana nga maplano i makan. “Maggatang kami tu makan ta madduruma ira nga supplier tapenu masiguradu mi nga makasta i kualidad na makan anna makatipid kami,” kinagi ni Esther nga mabboluntariu ta Food Service Department. “Anna kanayummi nga i-adjust i recipe mi tapenu awan tu masayang nga makan.” Kada aggaw maggastu kami tu maturu tu ₱200 ($4) ta kanan na kada tadday nga tolay.

 Ari laman tu makan i kawagan na boluntariu ira, kawagadda gapa i proteksion. Proteksion ta anni? Ta Australia, aru i aggaw nga mapatu anna masikan i bilag, ngem masikan gapa i ultraviolet radiation. Tapenu maprotektan i ngamin ta bilag anna ta sobra nga patu, nangiprepara i production assistant ira tu tent anna lugar ira nu sitaw ira makapagibannag, anna siguraduadda nga egga i sunscreen, payung, anna danum. Kinagi ni Kevin nga boluntariu ta Audio/Video Services: “Commuter Bethelite i magaru ta production assistant ira. Mapakalinno anna magayayya nga kuadda i trabahu da. Ariammi nga makua yaw nga proyekto nu awan ira.”

 Ari tu realistiko i karuan nga eksena nu makua yatun ta branch office, bakante nga davvun ta branch onu ta studio. Megafu tatun, makua i karuan nga eksena ta tanakuan nga lokasion. Tapenu merekord i eksena ira ta Biblia nu sitaw awan tu linya na kuryente, sementadu nga dalan, anna babalay ira, mawag nga mabbiahe i boluntariu ira ta arayyu nga lugar. Mawag nga maayus anna mebiahe i costume, props, anna equipment ira, anna siguraduadda nga mepay yatun ta lugar nu sitaw merekord i eksena. Nige nga merekord i eksena ira, siguraduan na assistant production coordinator ira nga egga i generator, menum nga danum, anna CR. Maddian i boluntariu ira ta babalay na minammadulo ira nga wawwaragi, ta takay, ta hotel, anna tanakuan paga.

 Magastu, makofu tu oras, anna kabbannag i pangirekord ta eksena ira ta tanakuan nga lokasion. Yari tu ta 2023, inappruban na Manangngal nga Baggi i paggatang ta maturu tu ₱14 million ($2,500,000) nga video wall para ta virtual production. Egga i high-resolution video screen anna synchronized lighting natun tapenu kagitta na egga ira mismo ta lawan. Megafu tatun, ari mawag nga irekord i eksena ira ta madduruma nga lokasion. Kinagi ni Darren nga miembro na Australasia Branch Committee: “Megafu ta merekord ngana i eksena ira ta video wall, ari ngana kuruga mabannag i boluntariu ira anna awayyada ngana nga mamippiga nga ulian i eksena ira. Angngarigan na, nu mangirekord kami tu eksena ta lawan, piga minuto mi laman nga merekord i pallammag na bilag. Ngem megafu ta video wall, awayya mi ngana irekord i pallammag na bilag maski mamippiga adde ta mala mi i kayà mi nga eksena.”

 Ginatu nga cast anna crew i mawag ta kada episode na serye ira nga Mapia nga Dumug. Anni i matageno da ta suporta na wawwaragi ta nira?

 Si Amber nga mabboluntariu taw nga proyekto anna nabbiahe tu 700 kilometro (435 mi) maggafu ta Melbourne, nitura na: “Mamegafu ta paddattal ku ta airport, inalawa nà na wawwaragi ira ta Bethel. Inimbitan nà na aru nga Bethelite nga kuman onu mammerienda. Komfortable ngà gapa anna natageno ku nga iddeddu nà na ngamin ta set. Aru nga bendision i nalawa ku taw nga pabboluntariu. Kakku natageno nga massakrifisio ngà!”

 Mabboluntariu gapa si Derek ta production team. Kinagi na: “Aru nga department i nanguffun nikami ta pamegafu paga laman na proyekto. Mappappabalo ngà ta wawwaragi ira nga nisakrifisio da i tiempo, pakkukua, anna i sikadda taw nga proyekto. Masippo ira anna sigga-paran nga massuporta. Talaga binendisionan na kami ni Jehova. Nasingakku tatun nga ari laman nga nakafokus si Jehova ta resulta na kuammi, nu ari nakafokus gapa yayya nu kunnasi mi nga ituppal i trabahu mi.”

 Mappabalo kami ta passuporta nu taw ira ta serye na video gukaban na paddona, nelavu tatun i donasion nu ira ta donate.pr418.com.