Kinagi ni Jesus ta disipulo na ira: “Sikamu i mamakurug niakan . . . adde ta ngamin nga tuppu-tuppag na davvun.” (Kingngua 1:8) Sangawe, malallappo i Saksi ira ni Jehova ta pangituppal tatun nga bilin. Ngem ari paga kuruga nalayyagayyan i karuan ira nga lugar nga dakal i populasion na. Pilippiga gapa i Saksi ta karuan nga nasion. (Mateo 9:37, 38) Anni i kukukuattam tapenu malayyagayyattam i aru nga totolay adde ta posible?

 Tapenu matuttul i bilin ni Jesus, mangi-assign tu misionero ira i Service Committee na Manangngal nga Baggi na Saksi ira ni Jehova ta dakal i pakawagan na ira nga lugar ta interu mundo. Ta maddaggun, 3,090 i field missionary ta interu mundo. a Aru ta nira i na-train ta tadday nga Bible school, kagitta na School for Kingdom Evangelizers. Sigga-paran i misionero ira nga panawan i lugar da tapenu magali ta tanakuan nga nasion. Megafu ta kinamanakam ta espiritual, ta training, anna ta ekspiriensa na matalo ira nga misionero, makaduffun ira ta kelayyagayya na mapia nga dumug anna makasta ira nga ehemplo ta bagu ira nga disipulos.

 Ta kada branch office, madduffun i Field Ministers Desk na Service Department anna i Branch Committee tapenu meyawa i pakawagan na misionero ira, gitta na simple nga paddianan, panangngal ta gawa-gawayyadda, anna baddi nga allowance para ta paggastuadda. Ta 2020 dagun serbisiu, maturu tu ₱1.3 billion ($27 million U.S.) i nagastu na Saksi ira ni Jehova ta panangngal ta misionero ira. Megafu tatun, makapaffokus i misionero ira ta ministerio da anna ta pamasikan ta kongregasiodda.

 Anni i neyuffun na misionero ira ta trabahu nga pallayyagayya? Kinagi ni Frank Madsen nga miembro na Branch Committee ta Malawi: “Megafu ta gutu anna abilidad na misionero ira, naduffunadda i kongregasion ira tapenu malayyagayyan i mariga ira nga teritoria, gitta na guardiadu ira nga komunidad anna lugar ira nga aru i foreigner. Megafu ta pappursigi da nga gigiammuan i lokal nga lengguahe anna kultura, makasta ira nga ehemplo ta tanakuan. Makasta gapa i ehemplo da ta abbarabbing ira tapenu tullung ira ta ngamin-tiempo nga serbisiu. Ipappabalo mi kani Jehova i misionero ira.”

 Kagian gapa na miembro na Branch Committee ta tanakuan nga nasion: “Pakurugan na misionero ira nga mattaradday i totolay ni Jehova ta interu mundo. Masingi-singan maski na ari ira tu Saksi nga mattaradday ittam megafu ta tuttuddu na Biblia maski madduruma i kultura tam.”

 Anni i neduffun na misionero ira ta publisher ira? Ipappabalo ni Paulo nga taga-Timor-Leste i magatawa nga misionero nga na-assign ta kongregasiodda. Kinagi na: “Mapapatu ta lugar mi. Ngem ari lapa nga magimmang nga mallayyagayya i misionero ira maski paga nasanay ira ta malamming nga lugar. Kanayun ira nga egga ta meeting for field service nu umma. Kanayukku ira nga masingan nga ma-RV maski tangnga-tangnganaggaw nga mapapatu anna maski ta gabi. Aru i sinudduadda ta kinakurug, nelavu ngà ngana. Matalikarag anna pursigidu ira nga usan i interu nga pattolay da ta passerbi kani Jehova. Megafu tatun, mapagaram i interu nga kongregasion nga mallallappo ta passerbi kani Jehova.”

 Istorian ni Ketti nga regular pioneer ta Malawi nu kunnasi nga naduffunan na magatawa nga misionero i familia na: “Tagga ta na-assign i magatawa nga misionero ta kongregasiommi, sakan laman i Saksi ta familià. Ngem daka-dakal i neduffudda nio anna naddukko ira ta familia mi. Nasingan na ána mi ta ehemplo da nga masaya i masserbi kani Jehova. Megafu tatun, regular pioneer ngana i tallu nga ana ku nga babay anna magata-atende ngana si lakay ku ta study.”

 Paggafuan na fundu para ta misionero ira? Ta donasion ira ta interu mundo nga trabahu. Aru tatun i nedona gukaban na metodo ira ta donate.pr418.com. Talaga appresiammi i kinavuka-palag nu.