“Nadesision na Manangngal nga Baggi nga depende ta restriksion na gobiernu ta dian nu, pagarammammi i ngamin nga kongregasion nga manoli ngana ira nga magistudy ta Kingdom Hall mamegafu ta ligguan na Abril 1.” Excited i Saksi ira ni Jehova ta interu mundo turi ta neyanunsio yatun ta jw.org ta Marso 2022. Ngem ari paga nabaling i COVID-19 pandemic. a Anni ira nga panguli, suplay, anna equipment i kawagan tapenu maprotektan ta virus i magatende ira ta study? Dua ragun ngana nga ari neyusa i Kingdom Hall tam ira. Nakaprepara kari danatun para ta face-to-face uli nga pagistudy?

 Kakurugan na, aru nga vulan nga napprepara i wawwaragi tam ira tapenu meyusa uli i Kingdom Hall ira para ta study.

 Tanga-vulan laman i nappasa namegafu turi ta neyemmang i face-to-face nga study ta 2020, ginigiammu insigida na Worldwide Design/Construction Department (WDC) ta Warwick, New York i efekto na COVID-19 ta pangusa tam ta Kingdom Hall tam ira anna i mawag ira nga kuattam tapenu safe ittam ta pagatende tam ta Kingdom Hall.

 Madduruma i pakawagan ta madduruma nga lugar. Kinagi ni Matthew De Sanctis nga mattrabahu ta WDC: “Ta karuan nga lugar, problema da nu sitaw ira nga mabbaggaw tu lima. Nu awan tu grifo ta Kingdom Hall, gumatang ira tu danum onu mattagag ira ta bannag onu posu. Ta karuan nga nasion, inuli na gobiernu da i regulasion ta air-condition, air exchange, anna karatula meyannung ta gawa-gawayyan anna kinarenu.”

 Anni i kiningngua na wawwaragi tam? Nammuadda nga para ta aru nga Kingdom Hall, “egga i simple anna mappo ira nga solusion nga talaga efektibo,” kunni Matthew. Angngarigan na, ta Papua New Guinea, nangipay ira tu galon nga de-grifo nga 20 nga litro nga danum i lugan na tapenu pabbaggawan tu lima. Megafu tatun, maturu tu ₱2,000 ($40 U.S.) laman i nagastu na wawwaragi tam ira para ta tadday nga Kingdom Hall ta bario. Para gapa ta Kingdom Hall ira ta Africa, maturu tu 6,000 nga de-kalidad nga pabbaggawan tu lima i nagatang ta tadday nga supplier ta Asia.

 Ta karuan gapa, nakkabit ira onu sinalianadda i electric fan anna air-exchange unit da tapenu makkasta i ventilation ta Kingdom Hall. Aru nga kongregasion i giminatang tu mic boom tapenu ari da ngana nga tammikan i microphone nu makkomento ira. Ikakkaguman gapa na wawwaragi nga lillitan anna regular nga i-sanitize i gannug ira nga kanayun nga matammi, kagitta na door knob anna grifo nga awayya na nga pabbalayan na virus. Ta karuan nga kongregasion, nakkabit ira ta CR da tu grifo nga egga i sensor na tapenu automatic nga manuru i danum. Ta Chile, maturu tu ₱80,000 ($1,400 U.S.) i average nga nagastu ta kada Kingdom Hall.

 Prayoridad na wawwaragi nga kuan tu safe i Kingdom Hall ira, ngem ikakkagumadda gapa nga awan tu makakenga ta donasion ira. Angngarigan na, ta karuan nga lugar, approbetchadda i tax exemption ta paggatang tu pabbaggawan tu lima anna mic boom. Nadduruffun i branch office ira ta paggatang tu aru nga suplay tapenu makamenos. Maruddu nga gumatang i branch ira anna i Global Purchasing Department ta mismu nga manufacturer tapenu mas mappo anna mas mabi nga me-deliver.

 Gafu ta unnug ira nga kuan tu mas safe i Kingdom Hall ira, naprotektan anna nakampante danuri ira i magata-atende tu face to face. Inamin ni Sister Dulcine nga taga-Peru nga “mediu naganassing” yayya turi ta nammuan na nga manoli ittam ngana ta Kingdom Hall. “Nakka-COVID ngà ta gafu paga laman na pandemic,” kunna. “Mavurung ngà lallagu nga umay ta Kingdom Hall ta baka ma-COVID ngà uli. Ngem ta paggangay ku ta Kingdom Hall, nasingakku nga kakkaru balo i kiningngua na elder ira tapenu mas safe ittam. Egga ira i hand sanitizer anna mic boom, anna niyunnug da nga mapakarenuan tu mapia i Kingdom Hall nige anna kabalin na kada study. Gafu tatun, nakampante i panageno ku.” b

 Tanakuan gapa i situasion ni Sister Sara nga taga-Zambia. Inistoria na: “Piga vulan ngana i nappasa, natay si lakay ku megafu ta COVID-19. Navurung ngà turi ta first time ku nga magatende ta Kingdom Hall nga awan yayya.” Anni ngana i matageno na sangawe ta pagatende na ta Kingdom Hall? Kinagi na: “Napakurug ku ta face-to-face nga pagatendè nga kakkavulu tam si Jehova taw ira nga pangurianan nga aggaw. Mas natageno ku sangawe i kawagakku nga pamasikan, pagiddu, anna suporta na elder ira anna na wawwaragi.”

 Magaya-ayayya i wawwaragi tam ta interu mundo ta makangay ittam ngana uli ta Kingdom Hall. Mabbalo ta donasion nu ira. Aru tatun i nedona gukaban na donate.pr418.com. Nakaduffun danatun ira nga donasion tapenu mabbalin tu komfortable anna safe i lugar ira nga paggarammammungan nga sentro na marenu nga paddayaw.