Neruma-ruma i rehional nga kombensiottam ta 2020—yaw i ollollu nga kombensiottam ta interu mundo nga nerekord anna nabbalin tu available ta Internet! Ngem ta Malawi anna Mozambique, aru nga wawwaragi tam i nakapakkombension maski nu awan tu Internet. Kunnasi?

 Inapruban na Coordinators’ Committee anna na Teaching Committee na Manangngal nga Baggi nga me-broadcast i kombension ta Malawi anna Mozambique gukaban na TV anna radio. Ngatta kawagan yatun? Tadday ta kanginan tu Internet ta interu mundo i Malawi yari tu pilippiga laman nga Saksi i maka-access ta Internet. Niyesplika ni William Chumbi, miembro na Malawi Branch Committee: “Gukaban laman na radio anna TV nga meyawa yaw nga espiritual nga makan ta wawwaragi.” Kinagi ni Luka Sibeko nga miembro gapa na Malawi Branch Committee: “Nu ari mi yatun nga nagiraw ta TV anna naginna ta radio, pilippiga laman nga wawwaragi ta branch territory mi i nakapakkombension.” Maski gapa ta Mozambique, pilippiga laman nga wawwaragi i egga i gadyet na, mas ngana i Internet.

 Megafu ta COVID-19 pandemic, egga ngana ira i istasion na TV anna radio nga mangi-broadcast ta study ira na kongregasion. a Nakibbida i wawwaragi tam taw ira nga istasion tapenu mar-request tu kammungan nga oras tapenu me-broadcast i kombension.

 Nakkaproblema i wawwaragi tam ta Malawi. Gagangay ngana nga tangoras laman i iyayawa na broadcasting station ira ta kostumer da. Mavurung gare ira nga baka molang i totolay nu mas apaddu i programa. Ngem niyesplika na wawwaragi tam nga makaduffun ta totolay i trabahu tam. Maski nu lockdown, mangiyayawa ittam ta totolay tu mapia nga dumug nga maggafu ta Biblia tapenu mabbalin ira tu mapia nga tolay anna mabbalin tu magayayya i familia da. Megafu tatun, minanugu ira ta request na wawwaragi tam para ta kammungan nga oras na pangi-broadcast.

 Ta Malawi, ne-broadcast i kombension ta tadday nga istasion na TV anna ta tadday nga istasion na radio nga parehu nga available ta interu nga nasion anna madde na i minillion nga totolay. Ta Mozambique, ne-broadcast i kombension ta tadday nga istasion na TV anna ta 85 nga istasion na radio.

 Tatun nga dua nga nasion, naggastu ittam tu maggi ₱1.5 million ($28,227) b tapenu me-broadcast i kombension ta TV anna maturu tu ₱1 million (maggi $20,000) tapenu me-broadcast yatun ta radio. Madduruma i pinagattam ta istasion ira na radio—maggi ₱800 ($15) para ta baraddi nga istasion anna magadde ta ₱140,000 ($2,777) para ta istasion ira nga available ta interu nga nasion.

 Kukukuan na wawwaragi tam i ngamin tapenu meyusa ta kapianan i donasion ira. Angngarigan na, nakarigacha i wawwaragi tam ta Malawi. Nangiyawa paga lagu tu 30 percent discount i tadday nga istasion. Megafu tatun, nakamenos ittam tu maggi ₱90,000 ($1,711). Ta Mozambique, nangiyawa tu discount i karuan nga istasion megafu ta mapammakatalakkan ittam anna mappappaga ittam ta oras.

 Ipappabalo na wawwaragi tam ta nagiraw anna naginna da i kombension ta istasion ira ta lugar da. Kinagi ni Patrick nga elder ta Malawi: “Mappappabalo kami ta Manangngal nga Baggi taw nga espesial nga niyunnug da sangawe ta pandemic.” Kinagi ni Isaac nga taga-Malawi gapa: “Awan tu tanakuan nga device mi yari tu mappappabalo kami taw nga espesial nga probision na organisasion ni Jehova tapenu maginna mi i kombension ta radio. Megafu tatun, nakapakkombension i interu nga familia mi. Yaw i pamakurug nga iddeddukan ni Jehova i totolay na.”

 I 2020 kombension i ollu nga kombension na tadday nga publisher ta Mozambique. Kunna: “Megafu ta unnug nga magiraw i kombension ta TV, napakurug ku nga si Jehova talaga i makapangngua-sa-ngamin nga Dios. Ari yayya nga nafugaddan na pandemic ta pangiyawa na ta nikami tu espiritual nga makan anna pangitunnag tatun ta balay mi mismu. Napakurug ku nga makka-aya-aya i totolay ni Jehova. Kumbinsidu ngà nga yaw i kurug nga relihion.”

 Kinagi na elder nga si Wyson: “Mappappabalo ngà ta pinanangngal ta nikami na matalo nga aripan sangawe ta pandemic. Megafu ta ne-broadcast i kombension ta radio anna TV, nabenefisiowakkami lapa ta programa maski nu pobre kami anna egga kami ta mariga nga nasion.”

 Para ta 2021 rehional nga kombension, niyunnug uli na Coordinators’ Committee anna na Teaching Committee nga me-broadcast i kombension ta TV anna radio ta karuan nga lugar. Paggafuan na fundu taw nga unnug tapenu me-broadcast i kombension? Ta donasion nu ira ta interu mundo nga trabahu. Aru tatun i nedona gukaban na madduruma nga metodo nga nakagi ta donate.pr418.com. Mabbalo ta kinavuka-palag nu.