“Awayya na nga dati, ariattam nga nanono nga posible nga malawa tam i espiritual nga makan gukaban na digital format.” Umanugu ka kari tatun? Kinagi yatun ni Brother Geoffrey Jackson ta makapagaram nga palappa na ta 2020 Meka-annam nga Update na Manangngal nga Baggi. Kinagi na paga: “Ngem sangawe ta egga i pandemic, awayya na nga manono tam nga, Kunnasi ngana laman tamma nu awan i JW Library? Nabayag ngana nga niprepara ittam ni Jehova para ta kunnaw nga situasion.”

 Kunnasi ittam nga niprepara ni Jehova? Kunnasi nga napadday i JW Library app, anna kunnasi da paga yatun nga paka-pakastan?

 Ta Mayo 2013, nappapadday i Manangngal nga Baggi tu mobile app—nu sitaw nga mabibbig i na-revise nga New World Translation—ta MEPS Programming, tadday nga department ta world headquarters. “Awan paga bi tu mobile app tam ta anni laman nga app store,” kunni Paul Willies nga mattrabahu ta MEPS Programming. “Ngem nabbuu kami tu team, niyemmang mi mabbi i karuan nga project, anna nakipattrabahu kami ta karuan nga departamento tapenu mad-design anna mamadday tu app anna i mayan na ira. Namikkaru kami nga nakimallo. Ta uffun ni Jehova, nappasa laman i lima nga vulan, ne-release i app ta zinagun nga miting!”

 Tapenu mabbalin i app tu kuru-kurug nga library, mawag nga makargan yatun tu aru nga publikasion ta aru nga lengguahe. Ta Enero 2015, available ngana ta app i maggi ngamin nga bagu nga publikasiottam ta English. Pappasa laman na annam nga vulan, me-download ngana danatun nga publikasion ta ginatu nga lengguahe.

 Namegafu tatun, mas paga nga pinakasta na wawwaragi tam i app. Neyammung i video ira, napavvurulu ta tadday nga tab i publikasion anna media ira nga meyusa ta study na kongregasion, anna ma-access tam ngana i referensia ira ta Research Guide ta mismu nga versikulo na Biblia.

 Meyusa i JW Library ta 8 million nga gadget ta kadaggaw anna ta maturu tu 15 million nga gadget ta kada vulan! Anni i makua tapenu gumana i app tatun ira nga gadget? Niyesplika ni Brother Willies: “Ari talaga nga mabala-balin i tadday nga mobile app. Kanayun nga egga iyammung mi tu bagu nga feature na tapenu mas mapalegan i mangusa ira. Megafu ta kanayun nga ma-update i operating system na gadget ira, kanayummi gapa nga i-update i app tapenu compatible lapa yatun tatun ira nga system. Mawag gapa nga i-maintain anna i-upgrade mi i internal software tam ta umara-aru i publikasion anna recording ta JW Library.” Nu bilangattam i available ngana ta JW Library ta ngangamin nga lengguahe, egga ngana i 200,000 nga publikasion anna maturu tu 600,000 nga audio anna video recording!

 Tapenu makua danatun, ari laman tu computer hardware i kawagan. Mawag gapa i gumatang tu piga nga software license. Maturu tu ₱75,000 ($1,500 U.S.) i mapagan kada ragun ta tadday laman nga license. Fuera paga tatun, maggastu i MEPS Programming tu maturu tu ₱500,000 ($10,000 U.S.) kada ragun ta gadget ira nga pinadday na nadduruma nga manufacturer tapenu masiguradu nga gumana i app ta bagu ira nga computer, tablet, anna cellphone.

 Megafu ta JW Library, dakal i natipid tam ta pagimprenta, pangi-bind, anna pangipatulug tu literatura. Angngarigan na, i booklet nga Examining the Scriptures Daily. Nagimprenta ittam tu maggi 12 million nga kopia na Examining the Scriptures—2013. Ngem ta 2020 edition, nagimprenta ittam laman tu five million nga kopia—maski paga nammungan i bilang tam nga Saksi tu 700,000 ta interu mundo. Ngatta ngay? Aru ngana gare nga wawwaragi tam i mabbibbig tu daily text ta JW Library. a

 Napakaru i meyuffun na JW Library. Para kani Geneviève nga taga-Canada, mas nabbalin nga regular i paggigiammu na megafu ta app. “I kurug, ariakku siguru makapaggigiammu kada umma nu mawag ku paga nga ipagilawan i libru ira ta paggigiammù,” kunna. “Ngem megafu ta app, egga ’na ngamin ta tablet ku i mawag ku. I regular nga paggigiammù i namassikan ta pangurug ku anna namalladda ta espiritualidad ku.”

 Daka-dakal i neyuffun na app mas ngana taw nga tiempo na COVID-19 pandemic. Kinagi ni Charlyn nga taga-United States: “Megafu ta COVID-19 ta interu mundo, maturu tanga-ragun ngana nga kakku nakalawa tu printed copy na bagu ira nga publikasiottam. Ngem megafu ta JW Library, nababbattug ittam ta espiritual yayya nga mappappabalo ngà kani Jehova.”

 Aru gapa i makatageno ta matageno ni Faye nga taga-Pilipinas. Kunna: “Egga ngana ngamin taw nga app i mawag ku tapenu malladda i espiritualidad ku. Yaw i ollu nga bibbigakku nu umma. Yaw i gigginnakku habang mattrabahu ngà ta balay. Yaw i usakku ta paggigiammù para ta study. Yaw i usakku ta pappreparà para ta Bible study. Nu awan tu kuakku, maggiraw ngà taw tu video. Nu agga-fila ngà, mabbibbig ngà taw tu artikulo onu Biblia. Anni ngana mabba kasta naw!”

 Dakal gapa i meyuffun na app ta ministerio. Angngarigan na, kayà nakuan nga usan na sister nga taga-Cameroon ta pallayyagayya na i teksto nga inusa na tadday nga sister piga ligguan ngana i nappasa. Ngem ari na nga matandaanan nu anni nga teksto yari. Kinagi na: “Pia ngana laman ta egga i natandaanakku nga uvovug ira tari. Ni-search ku danatun ta Biblia ta app ku. Naleg ku insigida i teksto. Gukaban na app, aru i malegakku nga teksto nga nakattamakku ngana.”

 Megafu ta donasion nu ira gukaban na metodo ira ta donate.pr418.com, napadday, maa-update, anna mapaka-pakasta i JW Library app para ta wawwaragi tam ta interu mundo. Mabbalo ta kinavuka-palag nu.

1. Oktubre 2013—Ne-release i app nu sitaw nga mabibbig i na-revise nga New World Translation

2. Enero 2015—Neyammung i karuan paga nga publikasion ta English; siminuntubag gapa i ginatu paga nga lengguahe

3. Nobiembre 2015—Puede ngana i ma-highlight

4. Mayo 2016—Neyammung i tab nga Meetings

5. Mayo 2017—Puede ngana i man-note

6. Disiembre 2017—Neyammung i feature para ta Study Bible

7. Marso 2019—Puede ngana nga mad-download tu audio recording, ma-stream tu video, anna ma-access i referensia ira ta Research Guide

8. Enero 2021—Neyammung i napakasta ira nga feature para ta Magayayya nga Mattolay tu Mannanayun!