Maturu tu mafulu ragun ngana nga meyusa i literature cart ira ta ministerio tam tapenu mala i interes na totolay ira. Familiar ngana i totolay ta interu mundo ta cart ira. Ari laman tu makasta i disenio na cart, nu ari, mabi gapa yatun nga usan. Awayya na nga umanugu ka ta kinagi ni Sister Asenata nga taga-Poland: “Simple laman i cart ira ngem makakkasta i disenio na. Mabi laman danatun nga meplasta anna meyala-ali.”

 Nanono mu ngana kari nu kunnasi nadisenio anna napadday i cart ira?

 Ta 2001, inapruban na Manangngal nga Baggi i wawwaragi ira ta France nga puruebadda i madduruma nga metodo na pampubliko nga pallayyagayya. Tadday ngana tatun i pangusa tu cart. Pinuruebadda i madduruma nga disenio. Angngarigan na, nangiyusa ira tu maleta anna grocery cart nga pangidispleyan anna pangipappannan tu literatura. Tapus, nakapili gabbalaman i branch ta France tu standard nga disenio. Yatun ngana i inusa na publisher ira ta aru nga dagun.

 Nagayayya i wawwaragi ira ta France megafu ta resulta na pampubliko nga pallayyagayya da. Yari tu ta 2011, inapruban na Manangngal nga Baggi nga purueban na wawwaragi ta New York City, U.S.A., i pampubliko nga pallayyagayya nga meyusa i cart anna lamesa. Nasingan na payunir ira nga nakipartisipa tatun nga aru i bentahe na pangiyusa tu cart. Angngarigan na, mabi nga meyala-ali yatun. Nakkagi gapa i payunir ira tu praktikal ira nga suhestion nu kunnasi paga mas mapakasta i disenio na cart ira. Madammo i ollu ira nga cart nga napadday ta kayu, yari tu mariga yatun nga iyakka anna guggunan ta addang. Megafu tatun, kingngua da yatun tu mas alappaw, ngem ari tu sossobra tapenu ari nga mepaddag. Kingngua da gapa tu mas dakal anna mas maladda i lilli onu pilig na tapenu mas mabi yatun nga maguggung ta rough road. Pinayyadda paga yatun tu baddi nga kahon tu pangipayyan paga tu literatura.

 Kakkasta i resulta na ollollu nga pac-cart witnessing! Yari tu ta 2012, inapruban na Manangngal nga Baggi nga meyusa ta interu mundo i literature cart. Nakaleg i wawwaragi ira tu manufacturer nga magangngua tu aru nga cart nga mapadday ta alappaw anna maladda nga materiales.

 Ta aru nga daga-ragun, napakasta na napakasta i cart ira. Angngarigan na, ta 2015, egga i napadday nga vungun na cart nga plastic i arubanna nga proteksion ta urang. Kakayà ni Dina nga taga-Georgia nga egga i vungun na cart. Kinagi na, “Gitta na egga i sarili nga ‘kapoti’ na cart nga mapprotekta ta publikasion ira.” Ta 2017, nabbaling tu available i magnetic poster ira ta karuan nga lengguahe. Kinagi ni Brother Tomasz nga taga-Poland: “Mariga nga talianan tagga i poster ira nga nezikko. Yari tu kakkasta i nanono da nga talianan yatun tu magnetic.” Ta 2019, mas paga nga pinakasta da i materiales anna pinaladda da i cart.

 Tadday laman i manufacturer na literature cart ira tapus mepatulug yatun ta kongregasion ira ta interu mundo. Sangawe, mabbalor tu maturu tu ₱2,000 ($43 U.S.) i tadday nga cart, fuera paga i ketulug anna tanakuan ira nga magastus. Sangawe, maturu ngana tu ₱868 million ($16 million U.S.) i nagastu ta cart ira anna maturu ngana tu 420,000 i nepatulug ta kongregasion ira ta interu mundo.

 Tapenu meyusa ta kapianan i donasion, ma-order tu bultuhan i literature cart. Awayya na gapa nga magorder na kongregasion ira tu spare parts na cart tapenu ira ngana i mappinaru tatun imbes tu talianadda tu bagu.

 Kakayà na publisher ira ta interu mundo i mangusa tu literature cart. Kinagi ni Martina nga taga-Ghana: “Ta aru nga klase na ministerio tam, sittam i umaranni ta totolay. Ngem i kakayà ku ta pac-cart, i totolay i umaranni nittam. Malayyagayyattam maski i mattalebag ira.”

 Ta tanakuan gapa nga nasion ta Africa, minaranni i tadday nga lalaki ta cart anna nanga tu publikasion ira ta lengguahe na. Nanoli yayya pappasa na tanga-ligguan anna kinagi na: “Nabibbig ku ngana i ngamin nga literatura. Kuruga importante i nabibbig ku ira tari. Iyistorià yaw ta kafamilià ira ta lugar mi.” Lima-gatu nga kilometro i karayyu na lugar da. Pappasa na dua nga vulan, nanoli yayya anna kinagi na: “Nabibbig ngana na kalugarakku ira i ngamin nga literatura, anna magayayya ira ta nabibbig da. Kayà da i mabbaling tu Saksi ni Jehova. Ngem egga ira i pakkiavu da. Angngarigan na, ammu da nga tapenu mabawtisowan ira, mawag nga melammag ira ta danum. Ngem awan tu aranni nga bannag ta lugar mi. Mawag kari nga umay kami tawe tapenu mabawtisowan?” Niyammammu na publisher ira i lalaki ta payunir nga kalengguahe na. Namegafu tatun, kanayun ngana ira nga maggigiammu tu Biblia.

 Kappagayayya nga meyusu-usa i literature cart tapenu ‘melayyagayya ta tangaravvunan i mapia nga dumug tapenu kannammuan na ngamin nga sinolay.’ (Mateo 24:14) Paggafuan na pappaga tam ta kapadday na cart ira? Ta donasion ira para ta interu mundo nga trabahu. Aru tatun i nedona gukaban na donate.pr418.com. Mabbalo ta kinavuka-palag nu.