Iinnaggattam ta kada vulan i espiritual ira nga programa anna video nga me-release ta JW Broadcasting. Ngem aru nga wawwaragi tam ta Africa i ari nga makagiraw taw ira nga programa ta Internet. Ta ngatta?

 Aru nga lugar ta Africa i awan tu Internet access na. Nu egga gapa, makakafi onu mangini-ngina. Angngarigan na, nad-download bi tu tadday nga JW Broadcasting program ta Internet café i tadday nga manangngal ta sirkito ta Madagascar. Sinukiadda yayya tu ma-₱800 ($16). Mas dakal paga yatun anne ta sueldu ta tanga-ligguan na karuan nga totolay! a

 Ngem maski nu kunna, minillion ngana sangawe ta Africa i makagiraw tu JW Broadcasting maski awan tu Internet da. Kunnasi?

 Namegafu ta 2017, available ngana i JW Broadcasting ta maddian ira ta sub-Saharan Africa gukaban na satellite-television channel. Libre nga magiraw yaw nga channel ta 24 nga oras ta tangaggaw, 7 nga aggaw ta tanga-ligguan, anna ta 16 nga lengguahe.

 Tapenu makua yatun, nappaga i Saksi ira ni Jehova tu tadday nga channel ta TV tapenu mepagiraw i programa ira gukaban na satellite. Madde naw nga satellite i 35 nga nasion ta sub-Saharan Africa. Maturu tu ₱600,000 ($12,000) i mapagan kada vulan para tatun. Nu karuan, mangammung ittam ta pagattam nu egga i mawag nga mepagiraw tu live ta tanakuan paga nga channel. Gukaban natun, rinivu i makagiraw ta kombension ira onu ta espesial ira nga programa nu egga i branch visit.

 Aru nga totolay, maski ari tu Saksi, i makagiraw ta JW satellite channel ta TV da ta balay da. Ngem egga ira i wawwaragi nga awan tu paggatang da ta mawag nga equipment tapenu makagiraw ira. Megafu tatun, maturu tu 3,670 nga Kingdom Hall i nakabitan tu satellite-receiving equipment tapenu magiraw tari na wawwaragi i JW Broadcasting. Nu egga ngana i TV onu projector ta Kingdom Hall, awayya na nga maturu tu ₱3,500 ($70) i magastu para ta equipment, nelavu i ke-deliver na. Ngem nu awan, magadde ta ₱26,000 ($530) i magastu para ta mawag ira nga equipment.

 Kuruga ipappabalo na wawwaragi ira i channel. Kinagi na tadday nga elder ta Cameroon: “Para ta familia mi, kagitta naw i manna ta tangnga na disierto.” Kagian ni Brother Odebode nga taga-Nigeria: “Kada ligguan, mamittallu kami nga maggiraw ta channel. Aba-abangan yatun na ána ku. Nu karuan paga lagu, ipeyali da i channel na giri-girawammi ta JW channel.” Kagian ni Rose nga taga-Nigeria gapa: “Kakayà ku i JW satellite channel gare ari ngana tu furu balita i giri-girawakku. Nu maggiraw ngà tu balita, alistu mappatu i ulù anna umatannang i dagà. Ngem mapatuyag anna marelaks ngà ta JW Broadcasting! Yaw i favorite ku nga channel. Daka-dakal yaw nga bendision ni Jehova.”

 Nireport na tadday nga manangngal ta sirkito ta Mozambique nga ta sirkito na, nakabitan i Kingdom Hall ira tu equipment tapenu magiraw da i channel. Umay i wawwaragi ira ta Kingdom Hall tangoras onu maturu paga nige na study tapenu maggiraw tu JW Broadcasting.

 Ta 2019 international convention ta Johannesburg, South Africa, neyusa i channel tapenu mepagiraw i palappa ira ta siam paga nga lokasion, nelavu i palappa ira na miembro na Manangngal nga Baggi. Kagian ni Sphumelele na local Broadcasting Department ta branch ta South Africa: “Dati bi, ipagiraw mi i palappa ira gukaban na Internet. Ngem mawag tu makasta i Internet connection tapus mapagan paga. Mas mappo anna mas masikan i connection na JW satellite channel.”

 Megafu ta donasion nu ira para ta interu mundo nga trabahu, aru ngana nga wawwaragi tam ta Africa i makagiraw tu JW Broadcasting gukaban na satellite. Kuruga ipappabalo mi i donasion nu ira gukaban na madduruma nga metodo ta donate.pr418.com.