Ikavurungan tu mapia na Saksi ira ni Jehova i kapangngurug da. (1 Pedro 2:17) Matageno na aru ta nittam i kagitta na matageno ni Sister Tannis nga taga-Kenya. Kunna, “Kakayà ku nga mammuan i mesissimmu ta wawwaragì ira ta interu mundo.” Kunnasi nga mammuan ni Tannis anna na minillion paga nga Saksi i mesissimmu ta wawwaragi? Namegafu paga ta 2013, mammuattam danatun nga balita ta seksion nga Newsroom ta website tam nga jw.org.

 Mabibbig ta Newsroom i mapammakatalakkan ira nga balita meyannung ta Saksi ira ni Jehova kagitta na ke-release na Biblia, disaster relief work, construction project, anna karuan paga nga importante nga mesissimmu nira. Mabibbig gapa tatun i meyannung ta wawwaragi tam nga nefuku megafu ta pangurug tam. Egga gapa i makapasikan ira nga ekspiriensa meyannung ta preaching campaign anna ta Memorial. Sinni i mar-research tatun ira nga balita, anna kunnasi danatun nga meprepara?

 I Office of Public Information (OPI) i naka-assign ta Newsroom. Mattrabahu yatun nga department ta world headquarters ta direksion na Coordinators’ Committee na Manangngal nga Baggi. Maturu tu 100 nga brother anna sister i mattrabahu ta OPI. Aru ta nira i remote volunteer. I karuan ta nira ay writer, researcher, visual artist, anna translator. Na-assign gapa i karuan ta nira nga makibbida ta ofisiales na gobiernu, ta profesor anna memestru, anna ta media. Maturu tu 80 nga Public Information Desk (PID) ta madduruma nga branch ta interu mundo i manuffun ta OPI.

 Madduffun i OPI anna i PID ira ta papprepara tu balita. Nu nakapili ngana ira tu makasta nga mebalita, i-research da yatun anna magaleg ira tu mapammakatalakkan nga informasion. Awayya na nga maginterviu ira anna makibbida ta eksperto ira. Sonu nala da ngana i detalye ira, itura da i balita, i-edit, i-proofread, iddadda tu letratu ira, anna i-send da ta Coordinators’ Committee para ta approval.

 Anni i makagi na wawwaragi tam ta Newsroom? Kagian ni Sister Cheryl nga taga-Pilipinas, “Kakayà ku nga igafu i aggaw ku ta pabbibbig tu balita meyannung ta organisasion ni Jehova anna ta wawwaragi.”

 Aru i nakkagi nga neruma i jw.org Newsroom kumpara ta karuan paga nga news media. Kinagi ni Tatiana nga taga-Kazakhstan: “Pia ngana laman ta makapattalo ngà ta balita ira ta jw.org. Mapammakatalakkan anna kuru-kurug danatun.” Kagian ni Sister Alma nga taga-Mexico: “Makapatuyag i balita ira ta Newsroom kumpara ta kavvuru-vurung nga balita ira ta media.”

 Ari laman tu mapammakatalakkan i Newsroom; mamassikan gapa yatun ta pangurug tam. Kunni Bernard nga taga-Kenya: “Megafu ta Newsroom, kagitta na kafamilià lapa i wawwaragi tam ta interu mundo, maski taga sitaw paga ira. Kakkagiakku i ngagadda anna i espesipiko nga situasiodda ta pakimallo ku.” Kagian ni Sister Bybron nga taga-Kenya gapa: “Excited ngà nu egga i artikulo meyannung ta ke-release na Biblia ta tanakuan nga lengguahe! Ipanono danatun nga artikulo nga ari nga mangireruma si Jehova.”

 Mapagaram ittam gapa ta balita ira meyannung ta wawwaragi tam nga mapeppersigi. “Napasikan i pangurug ku ta pannono ku ta gutu da,” kunni Jackline nga taga-Kenya. “Iinnakku nu anni i nakaduffun ta nira nga makapagattam. Nammuakku nga dakal i makua na ‘simple’ ira nga gannug kagitta na pakimallo, pabbibbig tu Biblia, anna maski pakkansion tapenu mattuyag i wawwaragi tam.”

 Appresian gapa ni Sister Beatriz nga taga-Costa Rica i balita ira meyannung ta kalamidad. Kunna: “Nammuakku ta Newsroom nu kunnasi kapaspas, ka-organisadu, anna i pangaya na organisasiottam ta pangiyawa ta pakawagan na wawwaragi tam. Kumbinsidu ngà nga yaw i organisasion ni Jehova.”

 Magayayya ittam ta mammuattam i bagu ira nga balita meyannung ta wawwaragi tam ta interu mundo! Nabbalin tu posible yatun megafu ta donasion nu ira ta interu mundo nga trabahu. Aru tatun i nedona gukaban na donate.pr418.com. Mabbalo ta kinavuka-palag nu.