Rinivu i mabawtisowan kada ragun, mawag gafu i mas aru nga teokratiko ira nga fasilidad. Gafu taw, napplano i Local Design/Construction Department ira ta interu mundo tapenu mamataddag onu mar-renovate tu maturu tu 2,700 nga lugar para ta paddayaw ta 2020 dagun serbisiu. a

 Ngem ari paga nga natuloy yaw ira nga plano gafu ta COVID-19 pandemic. Tapenu maprotektan i wawwaragi tam anna tapenu tumuttul ta dob ira na gobiernu, niyemmang labbi na Publishing Committee na Manangngal nga Baggi i aru nga proyekto ira ta konstruksion ta interu mundo. Ngem ta 2020 dagun serbisiu, maturu tu 1,700 lapa nga lugar para ta paddayaw i napataddag anna na-renovate nige na pandemic. Nabaling gapa i maturu tu 100 nga darakal nga proyekto ta fasilidad ira nga usu-usan na branch ira. Ammuattam nu kunnasi nga nammakapia i wawwaragi tam ta dua nga nabaling nga proyekto ta konstruksion.

 Branch ta Cameroon. Balabaddi anna aru i mawag nga mapakasta ta dati bi nga branch ta Douala. Nanono na Publishing Committee nga i-renovate i branch ngem mas daka-dakal i magastuda anne ta mismu nga balor na fasilidad. Nanonoda gapa i posibilidad nga mamataddag ta bagu nga lote onu gumatang anna mar-renovate ngana laman tu dati ngana nga building, ngem parehu nga ari tu natuloy danaw.

 Nammuan na wawwaragi ira nga ta sigiran na Douala, napplano i gobiernu nga magangngua tu dalan ta biko na Assembly Hall. Nu egga ngana saw i dalan, mas mabi ngana yaw nga maangngayan anna mas mabi nga meyangay i kawagan ira para ta fasilidad. Yaw i eksakto nga kawagan na branch. Inapruban gafu na Manangngal nga Baggi nga mamataddag tu bagu nga branch ta unag na lote na Assembly Hall.

 Nadduruffun i Saksi ira anna i contractor ira taw nga proyekto yayya nga nakamenos tu tiempo anna kuartu. I kurug, nakamenos ira tu maturu tu dua nga million nga dolyar (U.S.) taw nga proyekto! Nakali i familia na Bethel ta bagu nga fasilidad nige na COVID-19 pandemic.

 Mas makasta ngana sangawe i padjidianan anna i pattrabahuan na Bethelite ira ta Cameroon, anna para nira, regalu ni Jehova i bagu nga branch. Kinagi na tadday nga magatawa, “Mas nga mallallappo kami ta trabahu tapenu mepasingammi nga tagibalorammi yaw nga regalu.”

 Tojolabal Remote Translation Office (RTO), Mexico. Ta aru nga dagun, egga ta branch ta Central America nga aranni ta Mexico City i Tojolabal translation team. Ngem aru ta mabbida ta lengguahe nga Tojolabal i maddian ta Altamirano anna ta Las Margaritas. Maggi 1,000 nga kilometro i karayyu danaw ta branch! Megafu taw, marigatan i translator ira nga mabbaling tu natural i pattransleytda. Marigatan gapa i branch nga makaleg tu kualipikadu ira nga wawwaragi nga maddian ta aranni tapenu manguffun ta Tojolabal translation anna ta audio recording ira.

 Megafu taw ira, ikaya na Writing Committee na Manangngal nga Baggi nga iyali i translation team ta lugar nu sitaw meyusu-usa i lengguahe nga Tojolabal. Giminatang i branch tu building anna ni-renovate da yatun. Mas mappo yaw kumpara ta pamataddag onu parrenta tu ofisina ira.

 Kinagi na tadday nga translator: “Ta mafulu ragun nga nattrabahu ngà nga translator ta branch, awan tu nammammù nga familia nga maddian ta aranni nga mabbida tu lengguahè. Sangawe, egga ngana i ofisina mi ta lugar nu sitaw meyusu-usa i Tojolabal. Kadaggaw nga egga i makibbidà nga Tojolabal i lengguahena. Mas minaru i uvovug nga ammù anna mas nakkasta i pat-translate ku.”

 Para ta 2021 dagun serbisiu, nakaplano i pamataddag tu 75 nga RTO anna fasilidad ira para ta teokratiko ira nga eskuela, nu ipamavulun na situasion. Metuloy ngana i walu nga darakal nga proyekto ta fasilidad ira nga usan na branch ira. Nelagum tatun i bagu nga proyekto na world headquarters ta Ramapo, New York anna i relokasion na branch ira ta Argentina anna Italy. Kawagan gapa i maturu tu 1,000 nga bagu nga Kingdom Hall, maturu tu 6,000 nga lugar nga paddayarayawan i ari ngana tu mepangngo yayya nga mawag matalianan, anna 4,000 nga Kingdom Hall i mawag nga ma-renovate.

 Sitaw mala i fundu para taw ira nga pamataddag anna par-renovate? Sinabbag yatun ni Brother Lázaro González, miembro na Central America Branch Committee, tagga ta pinabbiridadda i proyekto para ta Tojolabal Remote Translation Office. “Ta teritoria na branch mi, ari tu makalanno i fundu mi. Nu awan gafu tu uffun na wawwaragi tam ta interu mundo, imposible nga makapataddag kami tu translation office ira para ta wawwaragi tam ta arayyu ira nga lugar. Gafu ta donasion na wawwaragi ta interu mundo, nabbalin tu posible para ta translator ira nga maddian ta lugar ira nu sitaw meyusu-usa i lengguaheda. Mappappabalo kami ta wawwaragi ira ta interu mundo gafu ta kinavuka-palagda.” Wan, nabaling yaw ira nga proyekto ta konstruksion gafu ta donasionnu ira ta interu mundo nga trabahu. Aru taw i nedona gukaban na donate.pr418.com.