Ta Enero 2021, niyanunsio na Manangngal nga Baggi i ke-release na bagu nga tool para ta paggigiammu tu Biblia, i Magayayya nga Mattolay tu Mannanayun! a Anni i reaksiommu tatun nga anunsio? Kinagi ni Matthew nga taga-Canada: “Excited ngà ngana! Mas ngana turi ta nepakanawag ta palappa anna video ira nu ngatta napadday i publikasion anna nu kunnasi nga napakurug nga efektibo yatun. Kakayà ku ngana nga masingan anna usan yatun.”

 Ta Magayayya nga Mattolay tu Mannanayun!, bagu ngana i metodo tam ta pab-Bible study. Ngem ari laman tu yatun i neruman na bagu nga libru ta dati ira nga usu-usattam ta pab-Bible study. Nu neyimprenta nga kopia na Magayayya nga Mattolay tu Mannanayun! i usu-usammu, baka napansin mu nga tanakuan i klase natun nga libru. Tapenu mammuammu nu ngatta, innattam nu kunnasi nga napadday yatun.

 Mas makannag i papel na. Ngatta kunnatun? Egga i maturu tu 600 nga letratu nga madduruma i kulor na ta Magayayya nga Mattolay tu Mannanayun! Maggi mamimmafulu nga mas aru yatun anne ta letratu ta libru nga Ituddu na Biblia! Egga gapa ira i pahina nga mas alawa ngana i blangku nga espasio na—yari awan tu nakatura onu letratu na. Megafu tatun, egga i problema: Nu meppi i papel, awayya na nga masingan i letratu ira ta likug na pahina. Tapenu masolusionan yatun, nat-testing i wawwaragi tam ta International Printing Department (IPD) ta Wallkill, New York, U.S.A. tu appa nga klase na papel nga usu-usattam ta printery tam ira. Ni-check na Writing Committee na Manangngal nga Baggi i kada sampol anna pinili da i papel nga ari kuruga transparent. Mas mangina yatun nga papel tu 16 percent kumpara ta usu-usattam nga papel ta aru nga publikasiottam, ngem mas makasta yatun tapenu ari nga ma-distract i Bible study ira ta letratu ira ta likug na pahina.

 Tanakuan i vungun na. Tanakuan i klase na vungun na bagu nga libru kumpara ta karuan nga libru megafu ta nika-laminate na. Imbes tu gloss laminate, matte laminate i neyusa ta bagu nga libru tapenu masingan tu mapia i letratu ta vungun na. Makaduffun gapa i matte laminate tapenu ari insigida nga maddana i libru maski mamikkaru nga meyusa. Ngem mamillima nga mas mangina i matte laminate ta gloss laminate. Megafu tatun, nadduruffun i piga nga branch tapenu makagatang tu mas mappo nga matte laminate.

 Ngatta neyusa i mas mangina nga materiales? Kunnaw i kinagi na brother nga mattrabahu ta IPD: “Magga kana-kanayun nga meyusa yaw nga libru, yari tu ikaya mi nga makasta lapa i itchura na maski kadabes nga meyusa.” Kinagi ni Eduardo nga mattrabahu ta Printery Office ta Brazil branch: “Kuruga magayayya kami ta nangusa i organisasion ni Jehova tu de-kalidad nga materiales tapenu makakkasta, maladda, anna presentable i libru. Neyusa ta mapia i donasion ira.”

 Namegafu i pagimprenta ta libru nga Magayayya nga Mattolay tu Mannanayun! ta Marso 2021. Mariga i situasion ta maddaggun i COVID-19 pandemic. Megafu ta naka-lockdown i Bethel, awan tu makatallung nga commuter anna ari gapa nga maka-imbita tu bagu nga Bethelite tapenu mattrabahu ta printery tam. Yayya nga kurang i mattrabahu ta karuan nga printery. Nagimmang labbi gapa nga magimprenta i karuan megafu ta restriksion na gobiernu.

 Kunnasi nga nasolusionan yatun? Turi ta puede ngana uli i magimprenta, temporario nga neyali ta printery i karuan nga Bethelite. “Netuppal i trabahu megafu ta minassakrifisio anna sigga-paran ira nga gigiammuan i bagu nga asayment da,” kunni Joel nga mattrabahu ta IPD.

 Maski mariga i situasion, minillion ngana nga kopia na Magayayya nga Mattolay tu Mannanayun! i neyimprenta tam. Aru nga materiales i neyusa kagitta na printing plate, laminate film, papel, ink, anna pazzikko. Ta ollu nga lima vulan pagalaman na pagimprenta tam, maturu ngana tu ₱118 million ($2.3 million U.S.) i nagastu ta materiales laman. Tapenu awan tu makakenga ta donasion, iyimprenta tam laman nu piga talaga i kawagan na kongregasion ira.

 Anni i makagi na Bible teacher anna na Bible study ira taw nga bagu nga libru ta paggigiammu? Kinagi ni Brother Paul nga taga-Australia: “Kita-enjoy nga usan i Magayayya nga Mattolay tu Mannanayun! yayya nga excited ngà ta pab-Bible study. Kakkasta i layout na libru anna talaga interactive. Mananawag i informasion na anna makatukkal-futu i pakkiavu, video, letratu, chart, anna goal ira para ta Bible study. Tadday yaw nga obra maestra nga mamaguyu nio tapenu pakastakku paga i panuddù.”

 Kinagi na Bible study ta United States: “Kakayà ku i bagu nga libru. Makaduffun i letratu ira tapenu mantindiakku i pinakapunto. Matukkal i futù ta video ira yayya nga mapaguyu ngà nga kuan i magiggigiammù.” Mamiddua yayya ta tanga-ligguan nga mab-Bible study anna regular ngana nga magatende ta study na kongregasion.

 Minillion nga kopia na Magayayya nga Mattolay tu Mannanayun! i mawag paga nga meyimprenta ta aru nga lengguahe. I kurug, ta maddaggun, inapruban na Manangngal nga Baggi nga mepublisa yaw nga libru ta 710 nga lengguahe. Mas aru yatun tu 340 kumpara ta lengguahe nga naapruban para ta libru nga Ituddu na Biblia!

 Naggafuan na fundu para ta pagimprenta? Ta donasion ira para ta interu mundo nga trabahu. Aru tatun i nedona gukaban na donate.pr418.com. Mabbalo ta kinavuka-palag nu. Megafu tatun, nakapadday ittam tu tool ira para ta paggigiammu tu Biblia para ta totolay nga maya nga maggigiammu meyannung kani Jehova anna ‘magayayya nga mattolay tu mannanayun.’—Salmo 22:26, NW.