“Kakayà ku i Kingdom Hall mi!” kagian ni Sister Nicole nga taga-Colombia. “Makavvulu ku taw nga lugar i wawwaragì ira.” Kunnatun kari gapa i matageno mu?

 Ta interu mundo, mattaradday i Saksi ira ni Jehova ta 63,000 nga Kingdom Hall. Megafu tatun, egga i komfortable nga lugar nga paddayawattam ta Dios. Ngem ari laman tu yatun. Kagian na regular pioneer nga si David nga taga-Colombia: “Suportan na Kingdom Hall tam ira i mensahe nga iyadde tam ta totolay. Appresian na bisita ira nga umay ta Kingdom Hall i kasta anna kinarenu natun.” Resulta yatun na lallappo tam ta pammentena anna pappakarenu ta Kingdom Hall tam ira. Kunnasi tam nga kuan yatun?

 Responsibilidad na kongregasion ira nga mangusa tatun nga Kingdom Hall i pammentena tatun. Megafu tatun, regular nga pakarenuan na wawwaragi ira i Kingdom Hall da. Egga gapa i preventive maintenance anna minor repair ira nga kuadda.

 Manunno i Local Design/Construction Department (LDC) tu brother ira nga masserbi tu maintenance trainer tapenu manguffun ta kongregasion ira ta pammentena ta Kingdom Hall da. Egga i ne-assign tu annam magadde ta mafulu tu Kingdom Hall ta kada maintenance trainer. Bisitan anna sanayan na i wawwaragi ira tatun nga kongregasion nga tangngallan i Kingdom Hall da. Kada tallu nga ragun, innan na i kondision na Kingdom Hall ira anna nu egga i problema ta safety onu pammentena da.

 Tagibaloran na wawwaragi ira i passanay nga malawa da ta maintenance trainer ira. Kagian ni Sister Indhumathi nga taga-India: “Kakkasta i passanay da. Pribilehiò nga magigiammu nu kunnasì mapattalupaddian i makasta nga kondision na Kingdom Hall ira.” Kagian ni Brother Evans nga taga-Kenya: “Nagigiammu mi nga malillitattam i maggastu tu dakal nu dati ngana nga ayusattam i gannug ira nga mawag nga mapakappian nige paga nga mabbalin yatun tu dakal nga problema.”

 Ta kada dagun magadde ta magatu adde ta rinivu ira nga dolyar a i magastu ta pangusa anna pammentena ta Kingdom Hall ira, depende ta lokasion na, bayag na tadday nga Kingdom Hall, anna i bilang na kongregasion ira nga mangusa tatun. Kunnasi mapagan i nagastu ira?

 Masuportan i pammentena ta Kingdom Hall gukaban na donasion ira. Kinagi ni Brother Alexander nga taga-Kazakhstan: “Karuan tu fundu ay meyosa ta Internet anna karuan nga kapagan, kagitta na danum anna kuryente. Meyusa gapa i karuan ta importante ira nga gannug kagitta na tissue paper, gloves, gamit ira ta pappakarenu, anna pinta.” I karuan ta sobra ira nga donasion ay medona ta worldwide work tapenu meyusa ta panguffun ta mas dakal anna mas mangina ira nga proyekto na pammentena ta interu mundo.

 Nu i pammentena nga trabahu nga makua ta Kingdom Hall ay massobra ta gagangay nga fundu nga magastu ta dua onu tallu nga vulan tatun nga Kingdom Hall, makkonsulta i elder ira ta LDC maintenance trainer. Nu apruban na LDC yatun nga proyekto, maggafu ta donasion ta worldwide work i fundu nga meyusa. Ta 2023 dagun serbisiu, 8,793 nga darakal ira nga proyekto i nakua, maturu tu ₱4 billion ($76.6 million) i nagastu tatun ira nga proyekto. Ikonsidera i dua tatun ira nga proyekto.

 Ta Angola, aru ngana i problema na tadday nga Kingdom Hall nga 15 dagun ngana i nappasa turi ta nepataddag. Mawag ngana nga matalianan i electrical system na, tapus nac-crack ngana i pader na ira, anna nireport na maddian ira ta babalay aranni tatun nga ma-overflow i danum magadde ta balay da. Nangiyunnug i LDC tu proyekto tapenu pakappian yatun ira nga problema. Maturu tu ₱500,000 ($9,285) i nagastu tatun nga proyekto. Mappappabalo i maddian ta babalay aranni tatun, anna nappabbaw ira ta pangituppal na wawwaragi ira ta trabahu.

 Ta Poland, manuru i ato na Kingdom Hall da anna nadaral i carpet da. Inapruban na LDC i proyekto nga pakappian anna kuan tu waterproof i ato tapus talianadda gapa i carpet. Maturu tu ₱500,000 ($9,757) i nagastu tatun nga proyekto. Megafu tatun, ari kawagan i major revonation tatun nga Kingdom Hall ta aru nga dagun.

 Megafu ta pammentena, ari tam magastu i nabalor ira nga donasion anna meyusa tam yatun ta kapianan, fuera paga tatun medayaw tam si Jehova. Kinagi ni Brother Shaun nga taga-Tonga: “Megafu ta pammentena nga trabahu nga kukukuattam, medayaw tam si Jehova ta marenu, maayus, anna makakkasta nga Kingdom Hall tam. Megafu tatun, makasta i reputasion ni Jehova ta komunidad tam. Ari tam gapa nga mappasiran nga magimbita tu totolay ta Kingdom Hall tam.”

 Awayya tam ngamin nga manguffun nga mappakarenu anna mammentena ta lugar nga paddayawattam. Kinagi ni Marino nga maintenance trainer ta Australia: “Egga i parte tam ngamin ta pribilehio nga panangngal ta Kingdom Hall tam ira. Nu kuattam yatun, makatipid ittam anna meyusa i donasion ira ta mepangngo nga keyusadda.”

 Magayayya i brother nga si Joel nga taga-India ta pammentena ta Kingdom Hall da. Kinagi na: “Makoffun i pakipattrabahù ta wawwaragi ira nga manono i mesimmu noka ta napabagu nga mundo.” Kinagi ni Nicole nga nakagi ta nappasa: “Nikanni laman nanguffun ngà nga i-mop i basa durante nga pakappian na brother ira i manuru ta CR. Maski nu ari tu sakan i mismu nappakappia tatun, nakoffun ngà tapenu malillitan i aksidente.”

 Nu kayà mu i mabboluntariu nga manguffun ta pammentena ta Kingdom Hall nu, ikagim yatun ta elder nu ira. Fuera paga tatun, makoffun i donasiommu ira ta pammentena ta Kingdom Hall nu anna Kingdom Hall ira ta interu mundo. Awayyam i maddona gukaban na donate.pr418.com onu ta contribution box ira ta Kingdom Hall nu. Appresiammi i kinavuka-palag nu.