Minillion nga totolay i maddian ta Latin America. Aru ta nira i katutubo nga egga sarili da nga lengguahe anna kostumbre. Aru taw ira nga katutubo i kapangngurug tam anna tagibaloradda i kultura da. Tapenu magigiammu na totolay i kinakurug ta Biblia, mangi-translate anna mangitaneg i Saksi ira ni Jehova tu publikasion ta maturu tu 130 nga lengguahe na katutubo ira ta Latin America. a Ngem makokkontra i karuan ta nira megafu ta passerbi da kani Jehova anna ta ari da nga pakipartisipa ta gagangay ira nga kostumbre ta lugar da nga mekontra ta Biblia. Kunnasi nga neyusa i donasion nu ira ta panguffun ta nira?

 Ta Mexico, manaki na wawwaragi tam ta Huichol community ta vuku-vukig na Jalisco State nga makipartisipa ta kostumbre ira nga mekontra ta Biblia. b Ngem nakaporay i karuan ta lugar da. Ta Disiembre 4, 2017, inatake na grupo na totolay i Saksi ira anna i karuan nga kavulu da. Pinapanaw da ira ta lugar da, zinaral da i pakkukua da, anna inananassing da ira nga patayadda ira nu manoli ira.

 Zinuffunan ira na Saksi ira ta kabiko da ira nga ili. Ngem kunnasi gafu ira nga makalabbe ta lugar da? Kinagi na brother nga si Agustín, “Awan tu pappaga mi tu abugadu anna kammi ammu nu sinni i pappaduffunammi.”

 Megafu ta nappeligro i katunungan nga maddayaw na wawwaragi tam, nagaksion insigida i branch ta Central America. Ollu, nipaimbestiga da ta lokal nga autoridad i nesimmu nga krimen. Tapus, inapruban na Coordinators’ Committee na Manangngal nga Baggi na Saksi ira ni Jehova nga mappaduffun ira ta Legal Department ta world headquarters anna tapenu mangisampa ira tu kaso para ta wawwaragi tam nga Huichol. Nakadde i kaso ta Supreme Court of Justice of the Nation—i katannangan nga korte ta Mexico.

 Napprepara tu manawag nga argumento i abugadu ira nga naggafu ta nadduduruma nga nasion. Nipakanawag da nga nu kunnasi nga mawag nga irespeto na tanakuan i kultura na katutubo ira, mawag gapa nga irespeto anna protektan na katutubo ira i katunungan na miembro da ira. Egga i katunungan na ngamin nga tolay maski sitaw i lugar da.

 Ta Hulio 8, 2020, tattadday i desision na Supreme Court of Justice nga fabor ta Saksi ira ni Jehova. Nidog da nga mapamavulunan nga manoli danuri napapanaw ta lugar da. Mappappabalo si Agustín nga nakagi ganuri anna i kakavulu na. Kinagi na: “Mappappabalo kami anna magayayya ta kiningngua na wawwaragi ira para nikami. Awan tu makua mi ta situasiommi nu ari dakami nga zinuffunan.”

 Nakokkontra gapa i wawwaragi tam ta San Juan de Ilumán, tadday nga lugar ta Ecuador nga paddianan na aru nga katutubo na Otavalo Valley. Ta 2014, namegafu ira nga namataddag tu Kingdom Hall kabalidda nga nala i ngamin nga permit. Ngem ta pangirollu na pari, maturu tu 100 nga totolay i namagimmang ta konstruksion. Tapus, nigamma na lugar da nga maggarammammung para ta paddayaw i Saksi ira ni Jehova.

 Nadduffun i legal department na branch ta Ecuador anna na world headquarters tapenu idefensa i katunungan nga maddayaw na wawwaragi tam tari. Nassampa tu kaso i wawwaragi tam. Megafu tatun, niyemmang na lugar da i pangokkontra ta nira anna nipamavuludda ngana nga ituloy na kongregasion i paggarammammung da anna i pamataddag da tu Kingdom Hall. Ngem tapenu maprotektan i katunungan na wawwaragi tam ta mappange, nikiddaw na representative tam ira ta mas atannang ira nga korte nga desisionadda bi yaw nga importante nga isyu: Mawag kari nga tuttulan na katutubo ira nga komunidad i katunungan na totolay nga nepatuppal ta interu mundo?

 Ta Hulio 16, 2020, gininna na Constitutional Court of Ecuador, i katannangan nga korte tatun, i kaso. I wawwaragi tam nga abugadu ta Ecuador i representative na kongregasion. Fuera paga nira, appa paga nga wawwaragi tam nga ekspiriensadu nga abugadu ta nadduruma nga nasion i minarubang ta korte. Megafu ta COVID-19, nac-connect ira gukaban na videoconference. Yaw paga laman i first time nga pinamavulunan na anni laman nga korte i tadday nga legal team nga mangirepresenta ta Saksi ira ni Jehova ta interu mundo nga iyarubang da i argumento da gukaban na videoconference. c Kinagi na abugadu tam ira nga segun ta internasional ira nga dob, egga lapa i katunungan na totolay ira maski paga miembro ira na tadday nga katutubo nga komunidad.

 Iinnaggan na wawwaragi tam ta Otavalo Valley i desision na Constitutional Court. Mappappabalo ira ta uffun nga nalawa da. Kinagi ni César nga elder ta Ilumán Quichua Congregation: “Si Jehova laman gukaban na organisasion na i magangngua tu daka-dakal nga gannug para laman ta pilippiga.”

 Saksi ni Jehova i ngamin nga abugadu nga nangasikasu ta kaso, anna magayayya ira nga usan i pakannammu da nga awan tu paga na. Siempre, mawag i tiempo anna kuartu ta pangisampa tu kaso, ta pangiprepara tatun, anna ta pangiyarubang tatun ta korte. Maturu tu 380 nga oras i inusa na abugadu ira anna karuan nga wawwaragi ta pangiprepara da ta argumento da anna 240 nga oras gapa i inusa da ta pangi-translate ta dokumento ira para ta hearing ta Mexico. Aru gapa nga oras i inusa na maggi 40 nga abugadu ta interu mundo para ta kaso ta Ecuador. Pangapattam tu fundu nga meyusa para ta pangidefensa ta wawwaragi tam? Ta donasion nu ira gukaban na metodo ira ta donate.pr418.com. Mabbalo ta kinavuka-palag nu.