Taw nga pangurianan nga aggaggaw, ekspektattam nga makaginna ittam tu “gerra ira ta aranni” anna “gerra ira ta arayyu.” (Mateo 24:6) Nu afektadu i wawwaragi tam tatun, makalawa ira tu uffun nga kawagadda. Nammuattam ta 2022 Mekatallu nga Update na Manangngal nga Baggi i makapatuyag nga informasion meyannung ta relief work ta Eastern Europe para ta wawwaragi tam nga afektadu ta gerra ta Ukraine. Kunnasi nga meyawa i relief ira maski maddaggun i gerra? Anni i natageno na wawwaragi tam ta Ukraine ta uffun nga nalawa da?

 Turi ta Pebrero 24, 2022, ta aggaw nga namegafu i gerra ta Ukraine, inapruban na Coordinators’ Committee i budget para ta relief tapenu maduffunan i wawwaragi tam ta Ukraine. Insigida nga naggatang i Ukraine branch tu produkto ira ta diadda tapus nitaneg da danatun gukaban na 27 nga Disaster Relief Committee nga binuu da.

 Fuera paga tatun, insigida nga napplano i wawwaragi ta World Headquarters na Saksi ira ni Jehova nu anni i praktikal nga meduffudda. Nikiddaw na Coordinators’ Committee anna na Publishing Committee na Manangngal nga Baggi ta Global Purchasing Department nga maki-coordinate ira ta representative ira na branch ta Ukraine anna ta Poland tapenu meyawa i pakawagan anna mammuadda i mawag nga kuadda. Tapenu organisadu i pangiyawa tu relief, kadaggaw nga mammiting i wawwaragi ta Purchasing, Shipping, anna Legal Department tatun ira nga branch, tadday nga miembro na Branch Committee ta Ukraine, anna i wawwaragi ta Global Purchasing Department.

 “Mawag nga mammuammi labbi nu anni i kawagadda,” kunni Jay Swinney na Global Purchasing Department. “Ikaya mi nga meyawa i makan anna i gamit ira para ta hygiene nga nakasanayan na wawwaragi. Ngem tadday laman ta nikonsidera mi nu anni i mawag da. Nikonsidera mi gapa nu kunnasi danatun nga safe anna alistu nga meyangay ta Ukraine maski maddaggun i gerra.”

 Ta Marso 9, 2022, ammu tam ngana i mawag na wawwaragi tam ta Ukraine. I lugan na karton ira nga meyawa ay delata, oat, bagga, vuku-vukal, kunne na gapa i savun anna tissue. Tatun nga tiempo, natantia nga umay tu ₱3,500 ($65 U.S.) i appa nga ligguan nga supply para ta kada tolay. Megafu ta rinivu nga wawwaragi tam i posible nga magawag, dakal nga fundu i inapruban na Coordinators’ Committee para ta relief. Ngem kunnasi nga iyangay na wawwaragi tam i relief nga ari gapa ira nga mappeligro?

 Ta Marso 13, pinurueban na dua nga wagi ta Poland i mangi-deliver tu relief nga naggafu ta branch office ta Poland tapus niyangay da ta warehouse nga aranni ta Lviv, Ukraine. Piga aggaw nige na panaw da, zinuffunan ira na wawwaragi ta branch ta Poland anna ta Ukraine ta papprepara para ta biahe da. Inasikasu na branch i papeles ira nga mawag tapenu makatallung ira ta border nga mangiyangay tu relief. Siniguradu da nga i takay na dua nga wagi ay egga i manawag nga marka na nga mangiyangay ira tu relief. Naki-coordinate gapa ira ta wawwaragi ta Ukraine nu sitaw i kalistuan nga ruta sonu nakatallung ngana ira ta border. Megafu ta nakapapprepara tu mapia i wawwaragi tam anna ta uffun ni Jehova, neyawa i relief ira ta Disaster Relief Committee ira ta unag na 24 nga oras mamegafu ta ke-deliver danatun ta Lviv, anna nakatoli tu safe ta Poland i dua nga wagi.

 Naka-deliver i dua nga wagi tu relief nga ari nga massobra ta tanga-tonelada. Ngem base ta tantia, mawag paga i 200 nga tonelada na relief! Kunnasi nga alistu nga meyangay anna metaneg i kunnatun kakaru na nga relief?

 Aru nga totolay ta interu mundo i maya nga manguffun turi ta nabibbig da i report ira ta jw.org meyannung ta wawwaragi tam nga afektadu na gerra ta Ukraine. Aru i nangiyawa tu donasion para ta interu mundo nga trabahu na Saksi ira ni Jehova, ta ammu da nga meyusa yatun ta kapianan. Niyawa gapa na karuan nga maddian ta nasion ira nga aranni ta Ukraine i oras, sikan, anna pakkukua da tapenu manuffun. Yaw i karuan nga angngarigan.

 Ta Poland, rinivu nga karton na relief i ni-pack na boluntariu ira. Namadday gapa tu card nga konsu drawing i abbing ira. “Namikkarù ngana nga nabibbig i Salmo 110:3 nga kunna, ‘sigga-paran nga mevulu i totolay’ ni Jehova,” kunni Bartosz Kościelniak nga mattrabahu ta Purchasing Department na branch ta Poland. “Ngem ta pakasingakku mismu ta napakaru nga wawwaragi nga maya nga umay insigida anna nakaprepara nga manuffun, napakurug ku i kayà kagian natun nga teksto.”

 Egga i international shipping company na tadday nga Saksi ni Jehova. Nipeyusa na i truck na ira anna naddona yayya tu gasolina para tatun. Kinagi na: “Para niakan, chansà yaw tapenu mepasingakku i pangaya ku ta wawwaragi anna ta kani Jehova. Masaya ngà nga nakaduffun ngà.” Base ta tantia, maturu tu 7,700 nga litro na gasolina i nedona. Nisakrifisio gapa na wawwaragi i oras anna sikadda ta pabbiahe tu maggi 48,000 nga kilometro tapenu meyangay i relief ira!

 Megafu ta minassakrifisio nga aya na wawwaragi tam, turi ta Marso 28—15 nga aggaw laman kabalin na ollollu nga pinad-deliver da—100 nga tonelada ngana na makan, hygiene materials, anna medical supplies i ne-deliver ta Ukraine! Aru nga wawwaragi tam anna supplier i naddona tu relief. Megafu tatun, daka-dakal i namenos tam tari ta fundu nga meyusa nakuan para ta relief. Bali maturu ngana tu 190 nga tonelada na relief i niyangay na Saksi ira ni Jehova ta Ukraine. Anni i natageno na wawwaragi tam ta nalawa da nga relief?

 Ta paddattal na relief pack ira ta Lviv, nipagitaneg danatun na Disaster Relief Committee ira ta interu Ukraine. Nepagi-deliver danatun ta madduruma ira nga siudad. I karuan tatun nga siudad, maturu tu 1,300 nga kilometro i karayyu na ta Lviv. Kiningngua na wawwaragi i ngamin tapenu alistu nga mepatulug danatun, ngem ari tu kunnari kabi yatun. a

 Kinagi ni Markus Reinhardt, miembro na Branch Committee ta Ukraine: “Ta kunnaw nga mariga nga tiempo, nasingan mismu na aru nga wawwaragi i aya ni Jehova anna i benefisio na panuttul tu mapia ta direksion na organisasion na—nige paga na mariga nga situasion. Angngarigan na, nepagaram ta ngamin nga egga nakuan i abasto da tu makan anna danum ta gibbalayadda nga mosa da ta piga nga ligguan. Meyannung tatun nga direksion, kinagi ni Anton nga elder ta Kyiv: ‘Mabbala-balo kami ta niprepara ittam na organisasion ni Jehova ta mariga ira nga situasion. Kurug nga nepaliag i inango mi ta egga i abasto mi tu makan anna danum kunne na gapa, egga i radio mi.’ Pia ngana laman ta sinuttul na wawwaragi i direksion. I abasto da i nakaduffun ta nira habang iyeddag da i relief nga maggafu ta organisasion.”

 Anni i natageno na wawwaragi tam ta pakalawa da ta relief? Kunnaw i kinagi ni Mykola anna ni Zinaida nga maddian ta Kharkiv: “Natukkal i futu mi ta pangikavurung nu. Mabbalo tu aru ta makan anna ta medisina. Mataga-tageno mi nga tattangngawan nakami ni Jehova.” Kinagi ni Valentyna nga kalugaradda: “Ta pamegafu na gerra, apapaddu i fila ta grocery ira. Nu mittan, ari mi magatang i mawag mi ira. Ngem ammu ni Jehova anna nasingan na i problema. Naddog yayya tu wawwaragi nga mangiyangay tu relief ta gibbalayammi. Nalawa mi i mismu nga kawagammi! Ta kunnaw nga mariga nga situasion, ta tiempo nga gitta na awan ngana tu awa-awayyam, matageno mu i espesial nga panangngal ni Jehova anna na organisasion na. . . . Kappagayayya nga matageno i uffun anna suporta na ta tiempo nga kakawagakku.”

 Kinagi da Yevhen anna Iryna nga nanaw ta Mariupol: “Fermi i pappabalo mi ta pagiddu anna uffun nu ta familia mi. Eksakto yatun ta tiempo nga kawagammi. Ta gafu na, abbo mi nga puru supply laman i mayan na karton ira, ngem ta pavvuka mi tatun, nasingammi nga nipatuvug nu gapa i aya nu ta nikami!”

 Siguradu nga masingi-singattam nga usu-usan ni Jehova i espiritu na ta pangiyawa tu direksion ta wawwaragi nga mangi-deliver ta relief ira ta tiempo na gerra. Daka-dakal gapa i neduffun na donasion nu para ta interu mundo nga trabahu. Aru tatun i nedona gukaban na donate.pr418.com. Mabbalo ta kinavuka-palag nu!

Alistu Anna Memmugug nga Pangiyawa tu Relief

1. Pebrero 24, 2022: Inapruban na Coordinators’ Committee i budget para ta pangiyawa tu relief ta Ukraine, yayya nga nakeyawa insigida tu relief i branch

2. Pebrero 24–Marso 8, 2022: Naggatang i branch ta Ukraine tu produkto ira ta diadda tapus nipagitaneg da danatun gukaban na Disaster Relief Committee ira. Napprepara gapa i branch office nga mangalawa anna mangitaneg tu relief supply ira nga maggafu ta Poland

3. Marso 9, 2022: Inapruban na Coordinators’ Committee i pangi-deliver tu relief ta Ukraine

4. Marso 10–12, 2022: Naplano i test delivery na makan anna supply ira maggafu ta Poland nga meyangay ta Lviv, Ukraine

5. Marso 13, 2022: Aggaw na test delivery na makan anna supply ira maggafu ta Poland nga meyangay ta Lviv, Ukraine

6. Marso 14–16, 2022: Ta Assembly Hall aranni ta Poznan, Poland, naorganisa i Local Design/Construction volunteer ira tapenu mangi-pack tu relief goods ira

7. Marso 17, 2022: Appa nga aggaw kabalin nari na test delivery, 13 nga tonelada na relief pack i nebiahe ta border na Ukraine

8. Marso 21–27, 2022: Kagitta lapa na nappollu ira, na-pack ta Poland i nabattang ira nga relief supply tapus nepatulug ta Ukraine tapus nepagitaneg ta lugar ira nga makawag ta unag na 24 nga oras

9. Marso 28, 2022: Ta unag na 20 nga aggaw namegafu turi ta naapruban i pangitulug tu relief supply ta Ukraine, 100 nga tonelada ngana na makan, hygiene items, anna medical relief materials i ne-deliver

 Maturu ngana tu 190 nga tonelada na relief i niyangay na Saksi ira ni Jehova ta Ukraine.