Ta Marso 2020, turi ta nideklara na World Health Organization nga tadday ngana nga pandemic i COVID-19, ari nga inekspekta na aru nga totolay nga mabbayag yaw ta maturu tu tanga-ragun. Minillion nga totolay, nelavu i Saksi ira ni Jehova, i afektadu ta pisikal, emosional, anna finansial megafu ta pandemic. Kunnasi nga nangorganisa anna nangitaneg tu relief i Saksi ira ni Jehova taw nga krisis?

 Ta direksion na Coordinators’ Committee na Manangngal nga Baggi na Saksi ira ni Jehova, maturu tu 950 nga Disaster Relief Committee (DRC) i nabuu ta interu mundo megafu ta COVID-19. Ta karuan nga lugar, inorganisa da nga maddurudduffun i wawwaragi. Ta karuan gapa, nakalawa tu ayuda maggafu ta gobiernu i Saksi ira. Nangorganisa gapa i DRC ira tu pangiyawa tu relief ta aru nga lugar.

 Angngarigan na, kunnaw i situasion ta Paraguay. Nebalita ta tadday nga diariu nga megafu ta pandemic, “aru nga taga-Paraguay i makkukurang ta makan.” Ngem namegafu ngana nga nangitaneg i DRC ta Paraguay tu relief kagitta na makan anna gamit nga pappakarenu ta balay anna baggi nga makalanno para ta dua nga ligguan ta familia nga appa i miembro na. Mabbalor tu ₱1,500 ($30 U.S.) i kada relief pack.

 Anni i kukukuan na boluntariu ira nga mangitaneg tu relief tapenu maimmuguradda i baggi da anna i tanakuan ta COVID-19? Mam-mask ira anna mas-social distancing. Siguraduadda nga marenu i fasilidad na kumpania nga mangi-supply tu makan anna tumuttuttul i kumpania ta safety protocol ira. Mawag nga kagianadda i ngamin nga manammi ta relief pack nga mangiyusa tu personal protective equipment, pakarenuan anna i-disinfect da i takay da, anna ipappadda i relief pack ira ta marenu nga lugar. Mawag gapa nga naka-social distancing i wawwaragi ira nga mangi-deliver anna mangalawa ta relief pack.

 Ta Enero 2021, maturu ngana tu ₱1.2 billion ($25 million U.S.) i inapruban na Coordinators’ Committee nga meyusa para ta relief megafu ta COVID-19. Tapenu meyusa ta kapianan i donasion ira, ikakkaguman na branch anna na DRC ira nga magatang i kawagan ira ta pinakamappo nga presio. Angngarigan na ta Chile, ikaya na wawwaragi nga gumatang tu 750 kilo na vuku-vukal para ta relief. Ngem naddoble i presio natun ta tanga-vulan laman! Gatangan ngana nakuan na wawwaragi i vuku-vukal ta mas mangina nga presio ngem dua oras laman i nappasa, kinagi na mallaku nga egga i buyer na nga nangitoli ta ginatang na nga vuku-vukal. Imbes tu tukian na i wawwaragi ta nabbidadda nga mas mangina nga presio, nilaku na ngana laman i netoli nga vuku-vukal ta presio na nappasa nga vulan!

 Ngem turi ta apan ngana na wawwaragi i vuku-vukal, nibabawi na mallaku i nabbidadda ta ari kanu tu patas i pangitaneg na wawwaragi tu makan kagitta na kukukuan na tanakuan ira nga organisasion. Nakimallo labbi i tadday ta wagi tapus inistoria na ta mallaku nga na-survey labbi i kada kongregasion tapenu mammuan nu sinni talaga i magawag. Niyesplika gapa na wawwaragi nga megafu ta madduruma i kultura na meddan tu relief, nebagay i produkto ira nga meyawa ta nira ta pakawagan na familia da. Kinagi da paga lagu ta mallaku nga boluntariu laman ira anna boluntariu gapa nga donasion i fundu nga neyusa para ta relief para ta Saksi ira ni Jehova. Na-impress i mallaku. Ari na laman nilaku ta mas mappo nga presio i vuku-vukal, nu ari, naddona paga yayya tu 400 kilo na vuku-vukal ta tumunug nga order na wawwaragi.

 Kabbalay ni Lusu nga bako nga balu ta Liberia i lima nga kafamilia na. Tadday nga umma, habang kumu-kuman anna pabbiridadda i teksto tatun nga aggaw, napansin na afu na nga pitu i dagun na nga awan ngana tu makan ta balay da. Niyavu na, “Anni ngana saw i kanattam?” Kinagi ni Lusu ta nisa nga nipakimallo na ngana yatun anna mattalo yayya nga si Jehova i bahala ta nira. Tatun gabbalaman nga aggaw, tinawagan yayya na elder ira ta kongregasion tapenu apan na i relief para ta familia na. Kunna: “Kinagi na afu ku nga mangurug ngana yayya nga gigginnan anna tattabbagan ni Jehova i pakimallo ta sinabbag na i pakimallo ku.”

 Karruba na tadday nga babay ta Democratic Republic of Congo i tadday nga familia nga Saksi. Turi ta nasingan na nga nakalawa tu makan yatun nga familia maggafu ta kapangngurug da, kunna, “Mas-Saksi kami saw kabalin naw nga pandemic ta nasingammi nga dudduffunadda i wawwaragi da taw nga mariga nga tiempo.” Niyavu ni lakay na, “Mas-Saksi ka laman megafu ta tanga-saku na bagga?” Nitabbag na, “Ari gapa, ngem yatun nga tanga-saku na bagga i mamakurug nga kuru-kurug i pakka-aya-aya da.”

 Insigida nga neyawa tam nga Saksi ni Jehova i pakawagan na wawwaragi tam ira taw nga pandemic megafu ta donasion nu ira. Mabbalo ta donasion nu ira gukaban na metodo ira ta donate.pr418.com.