Ta dagun 2020, aru i nesimmu nga natural ira nga kalamidad anna namegafu i COVID-19 pandemic ta interu mundo. Kunnasi nga zinuffunan na Saksi ira ni Jehova danuri afektadu ira?

 Ta 2020 dagun serbisiu, a inapruban na Coordinators’ Committee na Manangngal nga Baggi nga usan i 28 million dollars b para ta disaster relief. Neduffun yaw ta afektadu ira na maturu tu 200 nga kalamidad—nelavu taw i COVID-19 pandemic, masisikan ira nga bagiu, paddakal na danum ta Africa, pakkurang tu makan ta Venezuela, anna kuaresma ta Zimbabwe. Neyusa i donasion ira ta pappaga ta makan, danum, paddianan, sinnun, medisina, anna gamit ira ta pappakarenu, pappakapia, anna konstruksion ta nadaral ira. Danaw i karuan ta neyawa nga uffun.

 COVID-19. Afektadu i wawwaragi tam ira ta interu mundo ta pisikal, emosional, anna finansial megafu ta pandemic. Nabuu i maturu tu 800 nga Disaster Relief Committee (DRC) ta interu mundo tapenu maduffunan ira. Imonitor naw ira nga committee i pakawagan na wawwaragi ira anna ireport da yatun insigida tapenu masingan na Coordinators’ Committee nu kunnasi ira nga makaduffun.

 Ta interu dagun, nanguffun i DRC ira ta panga tu makan, danum, gamit ira para ta sanitasion, anna medisina. Ta karuan nga lugar, nadduffun i DRC anna elder ira tapenu makalawa i wawwaragi tam ira tu uffun naggafu ta gobiernu.

 Naobserba na ari ira tu Saksi i panuffuttam. Angngarigan na, kinagi ni Field Simwinga, i district commissioner na Nakonde, Zambia, ta wawwaragi tam: “Dakal i pappabalo mi ta paspas nga pinanguffun nu ta afektadu ira nga familia.”

 Pakkurang tu Makan ta Angola. Megafu ta COVID-19 pandemic, nakkurang anna nangngina i makan ira ta Angola. Aru ta wawwaragi tam i marigatan nga makagatang tu makan.

 Nekiddaw ta branch ta Brazil nga mangipatulug bi ira tu makan para ta wawwaragi tam ta Angola. Ni-research tu mapia na wawwaragi i paggatang anna pangipatulug ta makan ira tapenu makamenos ta fundu. Bultuhan gapa nga nagatang i makan yayya nga maturu tu ₱1,000 laman ($22) i kada relief pack nelagum ngana tatun i kepatulug na. Ngem maggi 20 kilos (44 lb) i mayan na nelagum i bagga, beans, anna manteka. Sangawe, 33,544 nga relief pack ngana i nepatulug—maddammo yatun tu 654 nga metric tons (721 U.S. tons). Neyawa yaw ta maturu tu 50,000 nga totolay nelavu i makan ira nga naggafu lapa ta Angola!

 Anni i natageno na wawwaragi taw nga uffun? Kinagi ni Alexandre nga maddian ta arayyu nga lugar ta Angola: “Yaw i mamakurug nga iddeddukan nà ni Jehova anna ari ngà nga magitetadday. Nabala-balor ngà ta organisasion ni Jehova!” Kinagi ni Mariza nga single mother: “Naginna ni Jehova i pakimemallo ku. Mappappabalo ngà nisa anna ta organisasion na!”

 Uffun ta Tiempo na Kuaresma ta Zimbabwe. Ta 2020 dagun serbisiu, nepallo i kuaresma ta Zimbabwe yayya nga minillion nga totolay i nabisinan. Rinivu nga Saksi ta Zimbabwe i nakkurang tu makan.

 Lima nga DRC i nabuu tapenu mangiyawa tu makan ta wawwaragi tam. Aru nga wawwaragi i nanguffun ta pangi-pack tu makan anna pangitakay ta suplay ira. Nipekkaw da paga lagu i takay da. c Ta 2020 dagun serbisiu, maturu tu ₱33 million ($691,561) i nagastu tapenu mapakan i maturu tu 22,700 nga totolay!

 Nofu ngana i abasto nga makan na karuan nga wawwaragi ta paddattal na uffun. Ta paddattal na makan, zinayaw na wawwaragi si Jehova. Nakkansion paga lagu i karuan tu Kingdom song.

 Ta tadday nga lugar, dua nga balu nga sister i minay ta miting meyannung ta pangiyawa tu ayuda na tadday nga nongovernmental organization (NGO). Ngem sisinu nga nakivuan tu pulitika i miting, yayya nga nadisidi na sister ira nga manaki da nga kuan i kondision katali na ayuda. Ta panaw da, nivuya da ira anna kinagi da, “Ari kamu nga makkikkiddaw tu makan ta nikami!” Ngem dua ligguan laman i nappasa, nakadde ngana i wawwaragi tam ira ta lugar da anna neddan tu suplay na makan i sister ira—nappollu paga ta ayuda na NGO!

 Narresulta gapa ta makasta nga pamakurug i panuffun nga nesimmu ta Zimbabwe. Kunnatun i nesimmu kani Prisca nga maddian ta baddi nga bario. Maski paga marigatan si Prisca gafu ta kuaresma, mallayyagayya lapa yayya kada Mierkules anna Biernes maski paga ta tiempo na pammula. Uyu-uyawan yayya na kalugaran na ira. Kakkagiadda: “Mabbisin i familiam gafu tane ta pallayyagayya mu.” I itabbag ni Prisca: “Ari vuluvuga nga pagurayan ni Jehova i massesserbi ira nisa.” Ari nga nabbayag, nakalawa yayya tu relief naggafu ta organisasion. Nakaddag i karuan ta karruba ni Prisca. Kinagi da ta nisa: “Ari naka vuluvuga pinagurayan na Dios, yayya nga kayà mi gapa nga mas mammammu yayya.” Pitu ngana ta karruba na i maggigginna ta study na kongregasion nga me-broadcast ta radio.

 Kanayuttam lapa nga makaekspiriensa tu kalamidad ta araranni ngana i panuppalan. (Mateo 24:3, 7) Ipappabalo mi i donasion nu ira gukaban na metodo ira ta donate.pr418.com. Meyusa yaw tapenu maduffunan i mazziga-riga ira ta tiempo na pagawag da.