Ta maturu nga 130 nga dagun, mattaradday i Saksi ira ni Jehova ta kombension. Egga i 40 nga palappa naw nga programa, maski gapa musika, interviu, anna video ira. Tapenu mabenefisiowan anna mapagaram i magatende ira, mawag nga ‘maginna anna masingad da’ yatun tu mapia. (Lucas 2:20) Kunnasi nga meyusa i donasiommu tapenu mabenefisiowan i ngamin ta kombension, maski paga sitaw i paddianadda?

 Ta Western country ira, magaru ta stadium anna arena da i egga lagapa i audio anna video system na. Nu rentattam i venue para ta kombension, ngatta i-install tam lagapa i equipment tam? Kinagi ni David nga mabboluntariu ta World Headquarters Broadcasting Department nga: “Piga laman ta fasilidad nga rentattam i nadisenio nga i totolay tatun ay magginna ta maturu annam nga oras ta programa, nga aru tatun egga i ginnadda tu totolay nga mabbida. Angngarigan na, ta sports venue usadda laman i public address system tapenu makkagi tu ababba nga anunsio anna mangi-play tu baraddi nga musika. Usadda i video screen tapenu i-display i score na magayam ira, advertisement, anna replay ira. Ngem kayà tam nga girawan na magatende i anaddu ira nga video tapus maginna anna malippawa da tu mapia i kagian na mappalappa ira.”

 Madduruma i lugar na kombension tam, yari tu mawag mebagay i set-up na audio/video system. Nu makaleg ira tu venue, i Broadcasting Department ta branch office ira i maddesision nu sitaw i pagitubangngan na magatende ira segun ta karu na magatende anna kadakal na fasilidad. Kalkulan na wawwaragi ira nu sitaw mepay i speaker anna video screen ira, planowadda nu kunnasi da yatun ikonekta ta kataggi-tadday, anna ilista da i ngamin nga equipment nga kawagan tapenu masiguradu nga masingan anna maginna na ngamin i programa.

 Mas aru i trabahu nga makua ta audio/video system ta kombension nga mepresenta i programa ta madduruma nga lengguahe. Nu ma-interpret i programa ta tanakuan nga lengguahe, mawag nga maginna anna masingan na interpreter i programa tapus me-send i translation na ta radio channel na makalippawa tatun nga lengguahe. Megafu ta special media player, maggiriddang nga magiraw na nagatende ira i video maski paga nu maginna da yatun ta walu nga madduruma nga lengguahe. “Aru nga trabahu i makua taw nga system,” kinagi ni David, “mawag nga aru i training na boluntariu ira nga ma-operate taw.”

 Aru nga branch office ira i egga i audio/video equipment na nga usadda kada ragun. Tatun nga lugar, iyunnug na brother ira i equipment nga meyusa ta madduruma ira nga kombension. Maggastu i United States branch tu maturu tu ₱11 million ($200,000) a kada dagun ta pangibiahe ta equipment ira para ta kombension. Ngem mas makatipid ittam lagapa kumpara nu gumatang anna mammentena ittam ta kammungan ira nga equipment. Kinagi ni Steven nga nabboluntariu ta audio/video na kombension ta Canada nga, “Kuan na team mi i adde na mawayya da tapenu siguraduan nga i nut, bolt, cord, anna madduruma nga parte na equipment ay kumpleto, maayus, mepappan tu mapia, anna nakaprepara para ta tumunug nga kombension.”

 Sobra i ngina na marrenta tu audio/video equipment, anna maruddu nga ari tu makasta i kalidad na anna ari tu namentena tu mapia. Megafu tatun, giminatang ittam tu equipment nga kawagattam. Ta maddaggun, i indoor LED video wall nga five by three nga metro (16 by 10 ft) i kadakal na ay maturu tu ₱1 million ($24,000) i ngina na, anna maski i tadday laman nga 15 metro (50-ft) nga microphone cable ay maturu tu ₱1,000 ($20) i ngina na. Megafu tatun, makipattrabahu i Broadcasting ta Purchasing Department tapenu ‘makalkula nu piga i magastu’ nige da gumatang tu maski anni nga equipment. (Lucas 14:28) Angngarigan na, piga nga totolay i mabenefisiowan tatun nga equipment? I paggatang kari tu bagu nga equipment i kapianan nga makua tapenu meyawa i pakawagan? Egga kari i pagipayyan tatun nga equipment, anna egga kari ira i rimienta anna nasanay ira nga boluntariu tapenu mammentena tatun?

 Tapenu mabbayag i audio/video equipment anna meyusa tam ta kapianan i nededika nga fundu, regular nga pakappiattam i equipment ira. Nu mebiahe gapa i equipment, mepay yatun ta maladda nga kahon ira tapenu ari madaral, anna mapakappian gapa i kahon ira nu kawagan.

 Nappabbaw i ari ira nga Saksi ta kalidad na audio/video ta kombensiottam ira. Angngarigan na, ta tadday nga kombension inappresia na tadday nga empleyadu na kilala nga broadcaster ira i kalidad na maginna anna magiraw ta kombension tam ira. “Nakaddag yayya turi ta nammuan na nga ari tu professional anna boluntariu laman i maddian ta audio/video,” kinagi ni Jonathan nga manguffun ta audio/video system ta kombension ira. “Kinagi na nga kawagan na kumpania na i lima nga aggaw tapenu i-install i ni-install tam ira nga equipment ta tangaggaw gaddua laman.” Ta tadday nga kombension, kinagi na facility manager nga, “Aru nga music anna video professional i nangusa taw, ngem sikamu laman i kunnatun ka-eksperto anna professional ta audio/video system ira!”

 Kunnasi ka nabenefisiowan ta audio/video system ta kombension? Awayya na nga natageno mu i kagitta na natageno ni David nga taga-England. Kinagi na: “Ta 88 nga dagukku, aru ngana nga kombension i nagatendeyakku. Ngem mas makapaffokus ngà ngana tu mapia ta kombension ira. Mabbalo ta makasta ira nga video, kagitta na alistu laman i programa anna malippawa ku tu mapia i mensahe na.” Naobserba ni Micheal nga taga-Nigeria nga, “Megafu ta magiraw ngana i video ira anna maginna ngana tu mapia i audio ira, mas makapaffokus ira anna ma-enjoy da i programa na kombension.”

 Ta pagatendem taw nga dagun ta “Ilayyagayya i Mapia nga Dumug!” nga Regional anna Special Convention ira, pannonopammu tu mapia i nakua ira tapenu maginna anna magiraw tam tu mapia i programa. Mappabalo kami ta donasion nu ira, nelavu tatun i donasion nga nakua ta donate.pr418.com, nga nakoffun tapenu mabbalin tu posible yaw ira nga programa. Mabbalo.