Nikiddaw na aru nga gobiernu ta interu mundo i physical distancing anna nigammada i publiko ira nga paggarammammung. Tuppalan yaw na Saksi ira ni Jehova ngem ari lagapa nagimmang i paddayawda anna magimmugug ira. Tapenu makuada yaw, usu-usan na kongregasion ira i videoconferencing app ira kagitta na Zoom ta paggarammammungda.

 Tapenu regular i pagistudy tam, inapruban na Manangngal nga Baggi nga meyusa i nedona ira nga fundu tapenu gumatang tu Zoom account ira para ta kongregasion. Dakal i neduffun naw ta kongregasion ira nga ariadda makagatang tu videoconferencing account nga mabbalor tu $15 adde ta $20 onu mas mangina paga. Gagangay ngana nga libre nga app i usu-usan naw ira nga kongregasion ngem baddi laman i awayyana nga makakonekta onu kurang i seguridadna. Ngem sangawe, ngamin nga kongregasion nga mangusa ta Zoom account na organisasion ay mabida laman nga makontrol i security setting na anna mas aru ngana i makakonekta ta kada study. Sangawe, maturu ngana tu 65,000 nga kongregasion ta maturu 170 nga nasion i mangusa taw ira nga account.

 Inusa ngana na Kairagi Congregation ta Manado, North Sulawesi, Indonesia, i Zoom account na organisasion, ari ngana tu i libre nga videoconferencing app. Kinagi ni Brother Hadi Santoso: “Makapa-study ngana maski i wawwaragi ira nga ari tu kunnari kafamiliar ta pangusa tu elektroniko ira nga gadyet gafu ta ari da ngana mawag nga mal-log in tu mamippiga ta kada study.”

 Kinagi ni Lester Jijón, Jr., elder ta Guayacanes Oeste Congregation ta Guayaquil, Ecuador: “Gafu ta pobre i aru nga wawwaragi, imposible nga makagatang tu Zoom license i karuan nga kongregasion tapenu maka-atende ta study i ngamin ta kongregasion. Mabbalo ta organisasion ta egga ngana i Zoom account nga makakonekta i aru, anna makapagimbita kami paga tu magatende ta study nga ariammi ngana mavurung nga limitadu laman i makakonekta.”

 Nitura ni Johnson Mwanza, elder ta Ngwerere North Congregation ta Lusaka, Zambia: “Pakatotoli nga kagian na aru nga wawwaragi, ‘gafu ta unnug nga Zoom na organisasion, gittana araranni kami laman ta wawwaragi anna matageno mi i aya anna pangikavurung ni Jehova.’”

 I pinaggatang taw ira nga account ay naggafu ta fundu nga para ta disaster relief. Naggafu yaw ta boluntariu ira nga donasion para ta interu mundo nga trabahu. Aru taw i nedona gukaban na donate.pr418.com. Mabbalo ta kinavuka-palagnu, meyusa gapa i donasionnu ira ta panguffun ta wawwaragi ta interu mundo.—2 Corinto 8:14.