Nakagi ta Hunio 1, 1912 nga isyu na The Watch Tower: “Awayya na nga aru ta mabbibbibbig ta magazina tam i egga kilala na nga vuling.” Nakagi paga tatun: “Makalawa ira tu libre nga pabbibbigan. . . . Yatun nga literatura para ta vuling ira ay neyimprenta nga egga i nabbukul ira nga tulduk na tapenu mabibbig na vuling ira. . . . Magayayya i aru nga vuling ta mensahe nga mappapange ngana ta mundo i makkarasta ira nga bendision.”

 Tagga ta netura yatun, nadduruma paga i braille system na nasion ira nga maguvovug tu English. Ngem dati paga nga ipaka-pakannammu na Saksi ira ni Jehova i kinakurug ira ta Biblia gukaban na “nabbukul ira nga tulduk”—i braille. Kukukuattam lapa yatun adde sangawe! Available ngana ta maturu tu 50 nga lengguahe i literatura tam ira ta braille. Kunnasi yatun nga mapadday?

 I ollu nga makua, me-transcribe i uvovug ira—me-convert danatun ta braille character. “Tagga, mangusa ittam tu magatang nga software ta pat-transcribe tu braille, ngem ari nga gumana yatun ta ngamin nga lengguahe nga mawag tam,” kunni Michael Millen nga mattrabahu ta Text Processing Services ta Patterson, New York. “Sangawe, usu-usattam i Watchtower Translation System ta pangi-transcribe tu braille ta maggi ngamin nga lengguahe ta mundo. Para niakan, awan tu kagitta naw nga program maski sitaw.”

 Mabibbig gapa ta literatura tam nga braille i deskripsion na letratu ira ta publikasiottam. Angngarigan na, kunnaw i deskripsion na letratu ta vungun na braille edition na Magayayya nga Mattolay tu Mannanayun!: “Lalaki nga lumakag ta nakkurba-kurba nga dalan nga napalevutan tu makkarasta nga mulu-mula, bakulug, anna vukig ira.” Kinagi ni Jamshed nga ministerial servant anna pioneer nga vuling, “Daka-dakal i meyuffun nio na deskripsion ta letratu ira.”

 Kabalin nga ma-transcribe, mepatulug i files ira ta branch office ira nga magemboss tu braille nga publikasion. Ma-emboss i publikasion ta maladda nga papel nga ari nga malattukan nu ma-emboss anna ari nga makumal maski mamippiga nga mosa. Kabalin na, mapattaradday i pahina ira, me-bind, anna mepatulug kavulu na literatura ira nga order na kongregasion onu bilang “free matter for the blind” nu egga i kunnatun nga serbisiu na post office. Nu kawagan, iyunnug na branch ira nga mas alistu yatun nga mepatulug tapenu egga i meyusa ta study ira na kongregasion na wawwaragi ira nga vuling onu makafi i paningan na.

 Mawag i dakal nga tiempo anna kuartu tatun nga trabahu. Angngarigan na, ta printery tam ta Wallkill, New York, kaparehu na tiempo nga meyusa ta pamadday tu 50,000 nga regular nga Biblia i tiempo nga meyusa ta pamadday tu dua laman nga braille nga Biblia. Egga i 25 nga volume na tadday nga grade-two English braille nga Biblia. Mas mangina tu mami-123 i materiales ira ta pamadday tu braille kumpara ta regular nga Biblia. a I vungun paga laman na 25 nga volume ay mabbalor ngana tu maggi ₱8,000 ($150 U.S.)!

 Anni i mataga-tageno na mattattrabahu ira ta pamadday tu braille nga publikasion? Kinagi ni Nadia nga mattrabahu ta South Africa branch: “Mariga i pattolay na wawwaragi tam nga vuling onu danuri makafi i paningan na yayya nga para nio, bendision i magangngua tu gannug nga makaduffun ta nira. Mananawag nga iddeddu na ira ni Jehova.”

 Ngem kunnasi nu ari nga makabibbig tu braille i tadday nga vuling? Piga ragun paga laman i nappasa, ni-release tam i workbook nga Learn to Read Braille nga egga i braille anna printed text na. Nadisenio yaw tapenu makkavulu nga usan na makasingan anna vuling. Kavulu naw nga brosiur i tadday nga positive slate anna stylus. Usan danatun na maggiggigiammu tu braille tapenu magemboss tu braille character. Gukaban natun, mas makabisadu na i kada character na braille tapenu mabibbig na yatun sonu kararapan onu karalapan na.

 Kunnasi nakaduffun danatun ira nga publikasion ta wawwaragi tam ira nga vuling onu danuri makafi i paningan na? Kanayun nga magatende ta study si Ernst nga taga-Haiti ngem awan tu braille nga publikasion na. Megafu tatun, mawag tu i-memorize na i asayment anna komento na ira ta study. Kinagi na: “Ngem sangawe, kanayun ngà ’na nga makatayag anna makakomento. Talaga matageno ku nga netadday ngà ta wawwaragi. Para-parehu kami ngana tu malalawa nga espiritual nga makan!”

 “Mas mabi nga matindian i publikasiottam ira anne ta tanakuan ira nga braille nga publikasion nga nabibbig ku,” kunni Jan nga elder ta Austria nga makafi i paningan na anna mangikondukta ta Paggigiammu tu Passifusifutan anna ta Paggigiammu na Kongregasion tu Biblia. “Angngarigan na, nepay i pahina ira, mabi nga malegan i footnote ira, anna eksakto i deskripsion na letratu ira.”

 Vuling anna umal si Seon-ok nga pioneer ta South Korea. Dati bi, nakadepende laman yayya ta tactile signing ta study ira na kongregasion, ngem sangawe, makabibbig ngana lapa yayya tu braille ira nga publikasion nga nebase ta Biblia. “Maziga nga bibbigan i karuan nga publikasion ta braille ta awan i karuan nga tulduk na, bangki-bangking, onu memmeppi i papel na,” kunna. “Ngem mangusa i Saksi ira ni Jehova tu de-kalidad nga papel anna mas darakal i tulduk ira yari tu mas mabi ku nga mabibbig.” Kunna paga: “Dati, makapaggigiammu ngà laman tu nebase-Biblia ira nga publikasion ta uffun na tanakuan. Ngem sangawe, so na lapa i maggigiammu. Magaya-ayayya ngà ta makapapprepara anna kanayun ngà nga makapakkomento ta linigguan nga study na kongregasion. Bibbibbigakku i ngamin nga publikasiottam ta braille. ‘Naadik’ ngà ngana ta pabbibbig tatun.”

 Gitta na neyimprenta ira nga publikasiottam, mabibbig tam gapa ta braille ira nga publikasiottam i kunnaw: “Ari tu melaku yaw nga publikasion. Parte yaw na pangituddu tu Biblia ta interu mundo nga masussuportan gukaban na boluntariu ira nga donasion.” Mappappabalo kami ta donasion nu ira gukaban na metodo ira nga nakagi ta donate.pr418.com. Megafu ta kinavuka-palag nu, egga i espiritual nga makan para ta ngamin, nelagum i vuling anna makafi i paningan na.