Neyana ngà ta 1934 ta Pescara, siudad ta central east coast ta Italy ta Adriatic Sea. Sakan i urian ta nikami nga appa nga babbay. Pinatturunug na yamà i ngagammi mamegafu ta letra nga “A,” yari tu letra nga “D” i gafu na ngagakku.

 Kakayà ni yamà nga gigiammuan i meyannung ta Dios. Ollu nga nakilala na i Saksi ira ni Jehova ta Hulio 1943 turi ta kinibbida na yayya na Bible study na Saksi ira nga mangngagan tu Liberato Ricci. Kinagi na nisa i meyannung ta Biblia anna pinekkawan na yayya tu kopia na The Watchtower. Ari nabbayag, malallappo nga kinagi na yamà ta tanakuan i nagigiammu na ira. Inalawa gapa na yenà i kinakurug. Maski nu arian na ammu i mabbibbig, nilayyagayya na ta tanakuan i iddanama nga nammuan na gukaban na pangikagi na ta nakabisadu na ira nga teksto ta Biblia.

 Aru nga aktibidad i makua ta baddi nga balay mi. Tatukkami nga magistudy. Maski nu dua laman i kuarto mi, tatun naddian i traveling overseer anna pioneer ira.

 Ari kuruga interesadu i dua nga manang ku ta Biblia. Tapus nanaw ira ta balay turi ta nakitawa ngana ira. Ngem kakayà mi na manang ku nga si Cesira nga ginnan i pabbibbig na yama mi tu Biblia. Magayayya kami gapa ta makapagaram ira nga palappa na brother ira nga mabbisita ta baddi nga grupo mi.

 Kanayun ngà mevulu ta yamà anna ta tanakuan ira ta pallayyagayya, ngem megafu ta pasirakku piga vulan nga pinasikakku i nono ku tapenu makibbida i layyagayyakku. Maski nu kunnatun, mas ziminakal i pangaya ku kani Jehova anna nabawtisowan ngà ta Hulio 1950. Nakua ta balay mi i palappa para ta bawtismo anna kabalin na minay kami ta bebay para mabawtisowan. Ta tumunug nga dagun, neyasayn ta lugar mi i magatawa nga special pioneer. Kanayun ngà mevulu nira ta pallayyagayya. Nu mas aru i tiempò nga mallayyagayya, mas mabi ngana para nio nga kuan yatun. Mas kakayà ku ngana yatun nga passerbi kani Jehova!

 Si Piero Gatti i ollu nga circuit overseer mi. a Pinagaram nà nga mappayunir anna magali ta lugar nga makawag ta mallayyagayya ira. Ariakku vuluvuga nanono yatun. Tradision ta lugar mi nga maddian ta balay i babbay ira adde ta makitawa ira. Yari nga ta Marso 1952, nappayunir ngà ta lugar mi. Kakku nanono nu kunnasi kadakal i efekto naw nga desision ta pattolè.

 Tatun nga tiempo, kayà gapa nga mappayunir na mabbing nga sister nga si Anna. Naddian yayya nikami tapenu makkavulu kami nga mallayyagayya. Ta 1954, neyasayn kami nga masserbi tu special pioneer ta Perugia, siudad nga ma-250 kilometro i karayyu na anna awan vuluvuga tu Saksi tatun.

 Kakkasta yatun nga ekspiriensa! Bente pagalaman i dagukku anna ariakku vuluvuga nanaw ta ili mi fuera laman nu umay kami ta kombension kavulu i magana ku. Yari tu kagitta na umay ngà ta tanakuan nga parte na mundo! Mavurung si yamà megafu ta sikami laman ni Anna i maddian tatun, yari tu zinuffunan nakami nga magaleg tu paddianammi. Narrenta kami tu kuarto nga meyusa gapa tu Kingdom Hall. Ta gafu na, sikami laman nga dua i magatende ta study ira. Ngem magayayya kami lagapa nga nallayyagayya ta Perugia anna ta aranni ira nga ili anna babario tatun. Ari nabbayag, navvunga i pappursigi mi. Mattanga-ragun i nappasa, nagali i tadday nga brother ta Perugia anna yayya ngana i mangikondukta ta study ira. Turi ta manaw kami ta 1957 para ta tumunug nga asayment mi, egga ngana i nabuu tu tadday nga baddi nga kongregasion ta Perugia.

 Ta baddi nga siudad na Terni, ta central Italy i tumunug nga asayment mi. Magayayya kami nga mallayyagayya ta Terni megafu ta aru ngana i interesadu ira tatun nga lugar. Aru gapa i kapurueba tatun. Maski nu nabalin ngana i rehimen na Fascist ta 1943, aru lagapa nga autoridad i mappursigi nga pagimmangan i Saksi ira ni Jehova ta pangilayyagayya ta mensahe na Biblia anna kayà da nga egga i lisensia mi nga mallayyagayya ta babalay.

 Kanayun nga daddaddanan na pulis ira i Saksi ira ni Jehova. Nu mittan, matammangngammi ira nu umay kami ta lugar nga aru i totolay na, ngem ari nga kanayun. Namiddua ngà ngana nga napagimmang anna naaresto. Ta ollu nga naaresto ngà, mallayyagayya ngà kavulu i circuit overseer. Inaresto kami na pulis anna niyangay dakami ta police station. Kinagi da nga ari kami autorisadu nga mallayyagayya anna pinammulta dakami. Ari kami nappaga megafu ta ari mabba yatun mekontra ta dob. Mannennerbios ngà! Ngem mappappabalo ngà kani Jehova megafu ta ari ngà magitetadday. Nanono ku i nakagi ta Isaias 41:13: “Ari ka maganassing. Uffunattaka.” Napalawakkami anna turi ta nabista i kaso mi, inabsuelto yatun na judge. Kabalin na annam nga vulan i mekadua nga kaarestò. Magitadday ngà tatun ngem naabsuelto ngà uli.

 Manono ku nga excited ngà ta kombension turi ta 1954 ta Naples, ta southern Italy. Paddattal ku tatun, nabboluntariu ngà nga mappakarenu ta venue. Neyasayn ngà nga mappakarenu aranni ta stage. Nasingakku tatun i guaguapo nga mabbing nga attendant nga si Antonio Caparelli, payunir nga naggafu ta Libya. Nagali i familia na ta Italy ta dekada 1930.

 Magayayya anna magutu si Antonio. Mammotor yayya magadde ta Libyan Desert tapenu layyagayyan i Italiano ira nga maddian tatun. Kanayukkami nga makkatura. Ta 1959, nanoli yayya ta Italy. Piga vulan yayya nga naddian ta Bethel ta Rome nige na nga naasayn tu special pioneer ta siudad na Viterbo, ta central Italy. Mas nga naddukko kami ta kataggi-tadday anna nappakasal kami ta Setiembre 29, 1959. Naddian ngà ta Viterbo kavulu si Antonio.

 Kawagammi i lugar nga paddianammi anna pagatendeyammi tu study ira. Ari nabbayag, narrenta kami tu kuarto nga kagitta na baddi nga shop anna egga i baddi nga banyu na ta likug. Nipay mi ta aggig i pagiddammi anna sinerrammi yatun tu screen. Yatun ngana i kuarto mi. Nu mittan, kuammi tu sala i karuan nga parte na kuarto mi. Nu mittan, Kingdom Hall gapa. Ari nga komfortable yatun nga kuarto. Ariakku maddian tatun nu sakan laman magitadday. Ngem magayayya ngà megafu ta kavulu ku si Antonio.

 Ta 1961, neyasayn si Antonio tu circuit overseer. Ngem mawag na i magiskuela tu tanga-vulan para ta congregation servant onu overseer ira. Mawag ku gafu i magitetadday ta tanga-vulan. Ikabbi ku i baggì, mas ngana nu gabi nu magitetadday ngà ta kuarto mi. Ngem magayayya ngà megafu ta usan ni Jehova si Antonio. Yari tu nabbalin ngà tu busy tapenu ariakku matageno i pappasa na tiempo.

 Kanayukkami nga mabbiahe megafu ta trabahu mi ta sirkito. Minay kami ta Veneto, ta lugar ta northern Italy, magadde ta south, ta lugar na Sicily. Ta gafu na awan tu takay mi, yari tu nab-bus kami. Mittan, naddalakkami ta lubak-lubak nga dalan paumay ta arayyu nga lugar na Sicily. Zinafung nakami na wawwaragi ira ta istasion na bus anna egga i vulu da tu asno tapenu mangattu ta bagahe mi ira. Naka-amerikana anna kurbata si Antonio anna naka-dress ngà gapa. Siguradu nga kaggalo nga masingan nga lumaka-lakag kami kavulu i kusetcheru ira anna i asno nga nangattu ta bagahe anna typewriter mi.

 Vuka-palag nga nangiyawa i wawwaragi ira maski nu mariga laman ira. Awan tu banyu onu danum na karuan ira nga babalay. Mittan, naddiakkami ta kuarto nga piga ragun ngana nga ari neyusa. Kagabian na, makabala-balittag ngà ta pakkatrug ku yari tu nilukag nà ni Antonio. Turi ta inalsammi i bed sheet, nakaddag kami. Napappannu tu insekto i pagiddammi! Awan tu makua mi megafu ta tangnga na gabi ngana. Yari tu kiningngua mi i mawayya mi tapenu alsan i insekto ira anna nakkatrug kami uli.

 Ngem ari tu danatun i pinakamariga nga neparubang niakan, nu ari, i pappasirakku. Ta ollu nga pabbisita mi ta kongregasion, narigatan ngà mapeggan tu kofun. Ngem kayà ku i mabbalin tu makapagaram anna moffunan i sister ira yari tu nappursigi ngà. Ta uffun ni Jehova, ta ultimu na ligguan, mas komfortable ngà ngana. Pribilehiò i makipattrabahu ta wawwaragi ira anna masingan i kinavuka-palag, kinamatalo, anna pangaya da kani Jehova.

 Ta 1977, kabalin na piga ragun nga passerbi mi ta sirkito anna distrito nga trabahu, b nembitakkami ta Bethel ta Rome tapenu manguffun para ta 1978 “Victorious Faith” International Convention. Kabalin na piga vulan, nabbalikkami tu miembro na familia na Bethel. Ari nabbayag, naasayn si Antonio bilang Branch Committee.

 Bagu nga ekspiriensa para niakan i paddian ta Bethel. Yari tu nu mittan, ari ngà komfortable megafu ta pappasirakku. Ngem ta pamendision ni Jehova anna uffun na tanakuan ira nga Bethelite, nabbalin ngà nga komfortable ta paddian ta Bethel.

 Ta tumunug ira nga dagun, neparubakkami ta bagu nga kapurueba—i pattaki ni Antonio. Ta 1984, naoperan ta futu si Antonio, anna kabalin na mammafulu nga ragun, mas nakkaru i taki na. Tapus ta 1999, nammuan na nga egga i malignant nga tumor na. Magawa-gawayyan yayya ngem ari na nga naffu i grabe nga taki na. Mariga para niakan nga masingan nga makkakafi yayya. Kanayun ngà makimemallo kani Jehova nga iddan nà tu sikan tapenu masuportakku i atawà. Kanayukku gapa nga bibbigan i Salmo ira. Yaw i mamanna-bannay niakan nu mavuru-vurung ngà. Natay si Antonio ta Marso 18, 1999. Ma-40 dagukkami nga magatawa.

 Awayyam matageno nga magitetadday ka maski nu aru i kakavulu mu. Pia ngana laman ta natageno ku i pangaya anna pamanna-bannay na Bethelite ira anna na wawwaragi ira nga nakilalà ta traveling work. Ngem sobra lagapa i daddam ku mas ngana nu manoli ngà ta kuartò ta Bethel nu gabi. Nakoffun niakan i pakimallo, paggigiammu, anna pappasa na tiempo tapenu ari ngà ngana kuruga maraddam. Ari nabbayag, kappagayayya ngana uli nga nonopan i pinavvulu mi ni Antonio maski yari i ekspiriensa mi ira. Mattalo ngà nga daddamman ni Jehova si Antonio anna masingakku yayya uli sonu mapaginnolay yayya.

 Aru i napuruebakku nga trabahu ta Bethel anna ta maddagun, masserbi ngà ta sewing department. Magayayya ngà nga kuan i trabahu nga makabenefisio ta dakal nga familià ta Bethel. Nabbalin ngà gapa tu busy ta trabahu nga pallayyagayya. Maski nu ari ngana kagitta na dati i makuà, magayayya ngà lagapa nga ilayyagayya i mapia nga dumug na Pappatulan. Kakayà ku nga kuan yatun namegafu paga ta kabbikku. Yari tu pagarammakku i abbing ira nga mappayunir megafu ta ammù nga kappagayayya yaw nga trabahu.

 Nu nonopakku i ma-70 dagun nga passerbì tu full-time, nasingakku nga zinuffunan anna binendisionan nà ni Jehova. Minappasiran ngà lagapa, yari tu nu ari ngà zinuffunan ni Jehova, siguradu nga awan vuluvuga tu nakuà. Nakangay ngà ta arayyu ira nga lugar. Aru i makapagaram nga nasingakku anna naekspiriensà. Nakilalà gapa i totolay ira nga nanguffun niakan nga magigiammu i importante ira nga gannug. Yari tu makagì nga magayayya ngà nga kuan uli ngamin yatun.