Ta pamegafu na dagun 2023, iddanamattam nga makasta i mesimmu nittam anna ta familia tam. Ngatta positibo i pagimamma tam ta mappange?

 Mabibbig ta Biblia i mapia nga dumug nga temporario anna aranni ngana nga masolba i ngamin ira nga problema nga meparubang nittam sangawe. Kakurugan na, i Biblia ay “netura tapenu matudduan ittam nga magiddanama gafu ta . . . kapasikan na nono nga maggafu ta Masanto nga Tura.”—Roma 15:4.

•   Tapenu mammuan paga i meyannung ta promesa ira na Biblia, bibbigan i artikulo nga “Makakaasa Ka sa Isang Magandang Kinabukasan.”

 I iddanama nga egga ta Biblia ay neyarig ta “angkla na ikararua tam” onu inango tam. (Hebreo 6:19) Pasikannan ittam natun nga iddanama. Moffunan na ittam nga arubangan i problema tam ira, mabbalin tu positibo, anna magayayya. Angngarigan na:

•   Ammuan nu kunnasi nakoffun i iddanama na Biblia ta tadday nga lalaki nga narigatan nga alsan i bisiu na. Girawan i video nga Manakiku Ngana i Pattolè.

•   Innan nu kunnasi makoffun nittam i iddanama na Biblia nu matay i iddeddukattam. Girawan i video nga Banna-bannay Para ta Natayan Ira.

 Iddanaman na aru nga totolay nga makasta i mesimmu nira, ngem ari ira siguradu nga mesimmu yatun. Neruma i promesa ira na Biblia. Ngatta? Megafu ta i promesa ira na Biblia ay naggafu mismu kani Jehova nga Dios a nga “ari vuluvuga nga malladdug.” (Tito 1:2) Si Jehova laman i egga i pakapangngua na nga ituppal i ngamin ira nga promesa na; mawayya na nga kuan i “anni laman nga ikaya na.”—Salmo 135:5, 6.

 Membita ka nga mabbenefisio ta mapattalakkan nga iddanama nga maggafu ta Biblia. Mapasikammu i pattalo mu tatun gukaban na ‘paggigiammum tu mapia ta Masanto nga Tura.’ (Kingngua 17:11) Puruebammu yaw gukaban na libre nga paggigiammu tu Biblia. Igafum i 2023 nga positibo i pagimamma mu ta mappange!