SIGGA-SIFU KAMU!
2023: Kavvuru-vurung nga Dagun—Anni i Kagian na Biblia?
Ta 2023, aru ira ta nesimmu ta interu mundo i mamakurug nga matotolay ittam ngana ta kagian na Biblia nga “pangurianan ira nga aggaw.” (2 Timoteo 3:1) Innan nu kunnasi nga i mesissimmu ira sangawe ay eksakto ta dati ngana ira nga kinagi na Biblia nga mesimmu.
I Biblia anna i mesissimmu ta mundo
“Makadumug kamu noka tu gerra ira.”—Mateo 24:6, NW.
“Umara-aru i gulu ta madduruma nga parte na mundo.” a
Innan i artikulo ira nga “Sinni i Mangurag ta Sibilyan Ira?” anna “Maturu $2 Trillion i Nagastu na Gobiernu ta Interu Mundo Para ta Military.”
“Mallunig noka ta madduma-ruma nga lugar.”—Marcos 13:8.
“Namegafu ta 2023, egga i nerekord nga 13 nga lunig ta interu mundo nga maturu tu magnitude 7 i sikan na, pinaka-aru yatun nga nesimmu ta tanga-ragun namegafu ta nar-record kami.” b
Innan i artikulo nga “Masiki-sikan Anna Makadaral ira nga Lunig, Nesimmu ta Turkey Anna Syria.”
’Kanninipang nga panakkilalan.’—Lucas 21:11.
“Nangultimu ngana i tiempo na global warming; ngem egga ittam ngana ta tiempo nga mas maggrabe i global warming.”—António Guterres, UN secretary-general. c
Innan i artikulo nga “Heat Wave ta Interu Mundo ta Summer na 2023.”
“Mabbisin i totolay.”—Mateo 24:7.
“2023: Kavvuru-vurung nga dagun para turi ira ta marigatan nga iyawa i material nga pakawagan na familia da.” d
Innan i artikulo nga “Grabe nga Pakkurang tu Makan ta Interu Mundo nga Resulta na Gerra Anna Climate Change.”
“Ziga-riga ta pangurianan ira nga aggaw.”—2 Timoteo 3:1.
“Tadday ta kada walu nga tolay ta interu mundo i egga problema na ta mental nga gawa-gawayyan.” e
Innan i artikulo nga “Umara-aru nga Tinedyer i Makkaproblema ta Mental Health Da.”
Anni i ekspektattam nga mesimmu ta 2024?
Awan tu makekagi nu anni i mesimmu ta 2024. Ngem ipasingan na mesissimmu ta mundo nga aranni ngana nga talianan na Pappatulan na Dios, onu i nelangitan nga gobiernu i gobiernu na tolay. Pangultimuan na gapa i ngamin nga makagafu ta pazziga-riga anna pavuru-vurung.—Daniel 2:44; Nepakannammu 21:4.
Durante ta paginnag tam tatun, nu makatageno ittam tu pavvuru-vurung, makapattalo ittam ta uffun na Dios. Ta kagian na Biblia:
“Nu i assing ay duttal niakan, sikaw i ek-ku pammakatalakkan.”—Salmo 56:3.
Kunnasi tam mepasingan i pattalo tam ta Dios? Imbitaddakamu nga gigiammuan i promesa ira na Biblia meyannung ta mappange nga awan ngana noka tu pazziga-riga. Puruebammu i libre nga paggigiammu tu Biblia tapenu mammuammu anna na familiam nu kunnasi kamu mabenefisiowan ta promesa ira na Biblia.
a Foreign Affairs, “A World at War: What Is Behind the Global Explosion of Violent Conflict?” ni Emma Beals anna Peter Salisbury, Oktubre 30, 2023.
b Earthquake News, “Year 2023: Number of Major Earthquakes on Course for Record,” Mayo, 2023.
c United Nations, “Secretary-General’s Opening Remarks at Press Conference on Climate,” Hulio 27, 2023.
d World Food Programme, “A Global Food Crisis.”
e World Health Organization, “World Mental Health Day 2023,” Oktubre 10, 2023.