Ta nappasa nga 30 nga dagun, matageno na totolay nga memammo anna mas nakkasta i pavvurulu na aru nga nasion. Ngem nanguli yatun nga pagimamma da megafu ta mesissimmu ta maddaggun.

•   “Mavurung i totolay nga mafektan na gerra ta Gaza i karuan ira nga nasion nga aranni tatun megafu ta pallaban na Israel anna Hezbollah ta border na Lebanon.”—Reuters, Enero 6, 2024.

•   “Maddaggun nga atakeyan na grupo nga kontroladu na Iran i nadduruma nga lugar, anna namegafu mangana nga magangngua i Iran tu nuclear weapon. Ka-alyansa ngana gapa sangawe na Iran i Russia anna China yatutta mamappeligro yatun ta western ira nga nasion.”—The New York Times, Enero 7, 2024.

•   “Narresulta tu grabe nga kadaral i tulu-tuloy nga pangatake na Russia ta Ukraine.”—UN News, Enero 11, 2024.

•   “I mappopprogreso nga ekonomia anna fuersa militar na China, i mas umata-atannang nga paningan na Taiwan ta nasiodda, anna i tension na Beijing anna Washington ay awayya na nga marresulta ta parralaban.”—The Japan Times, Enero 9, 2024.

 Anni i kagian na Biblia ta manguloli nga situasion na mundo sangawe? Marresulta kari yatun ta world war?

 Awan tu espesipiko nga kagian na Biblia meyannung ta gerra sangawe. Ngem kinagi na nga umaru i parralaban ta kaggawattam nga mangalsa ta imammo ta davvun.—Nepakannammu 6:4.

 Dati ngana nakagi ta libru na Daniel nga “ta tiempo na panuppalan,” i makapangngua ira nga nasion ta mundo ay “makkatubbu-tubba,” onu marralaban tapenu mabbalin tu pinakamakapangngua. Megafu tatun, mawag da i aru nga fuersa militar anna maggasto tu aru nga kuartu.—Daniel 11:40, 42, 43.

 Kinagi na Biblia nga mas marrake i situasion na mundo nige makkasta. Kinagi ni Jesus nga “mas nga kanninipang noka i ziga-riga . . . anne paga ta nesissimmu gari namegafu ta nekaparo na mundo.” (Mateo 24:21) Yatun nga “ziga-riga” ay mangultimu ta gerra nga magalan tu Armagedon nga nadeskriba bilang ‘gerra na dakal nga aggaw na Dios nga Makapangngua sa Ngamin.’—Nepakannammu 16:14, 16.

 Ngem mangipaliag i Armagedon, ari tu manaral. Megafu tatun nga gerra, pangultimuan na Dios i pammaguray na totolay nga narresulta ta aru nga makadaral nga gerra. Tapenu mammuan nu kunnasi nga marresulta ta mannanayun nga imammo i Armagedon, bibbigan i tumunug ira nga artikulo:

•   “Ano ang Digmaan ng Armagedon?”

•   “Makasta nga Balita i Armagedon!”